Siarod siońniašnich kadravych pryznačeńniaŭ Łukašenki źviartaje na siabie ŭvahu toje, što kiravać Departamientam archivaŭ i spravavodstva Ministerstva justycyi pryznačyli Aleha Voinava. Dahetul jon kiravaŭ Nacyjanalnym histaryčnym archivam.
Zrešty, niahledziačy na papiaredniaje miesca pracy, prafiesijnym archivistam Aleha Voinava nazvać składana. Na kiravańnie histaryčnym archivam jon byŭ «kinuty» tolki ŭ mai 2022 hoda, a dahetul usiu svaju karjeru rabiŭ u vojsku. Apošniaje jahonaje miesca pracy na vajskovaj słužbie — pamočnik ministra abarony pa pytańniach mižnarodnaha vajskovaha supracoŭnictva, a vajskovaje zvańnie — hienierał-major.
Zvolnili Aleha Voinava z vajskovaj słužby nie za niejkija hrachi, a pa ŭzroście. U sakaviku 2022-ha jamu spoŭniłasia 55 hadoŭ — a heta dla vajskoŭcaŭ ź jahonym zvańniem hraničny termin. Pavodle zakonu termin słužby, praŭda, moža padaŭžacca Łukašenkam, ale ŭ vypadku Voinava jon heta rabić čamuści nie paličyŭ patrebnym.
Adnak i ŭ apału adstaŭny hienierał nie patrapiŭ, prosta jamu znajšli prymianieńnie ŭ inšaj halinie — jak viadoma, byłyja vajskoŭcy ciapier u canie dla taho, kab «navodzić paradak» u razumieńni režymu i ŭ cyvilnych śfierach. Ministr justycyi, niepasredny ciapierašni načalnik Voinava, darečy, taksama hienierał-major, były vysokapastaŭleny funkcyjanier z Unutranych vojskaŭ.
Pra toje, što Voinaŭ na pasadzie dyrektara asobnaha archiva doŭha nie zatrymajecca, a jamu źbirajucca daručyć usiu archiŭnuju halinu, havaryli, darečy, adrazu paśla jahonaha aficyjnaha pryznačeńnia. Papiaredniamu dyrektaru Departamienta archivaŭ i spravavodstva Viktaru Kurašu, taksama ŭ frondzie adnosna režymu nie zaŭvažanamu, prosta vyrašyli pierad vychadam na piensiju dać adznačyć na pasadzie 100-hodździe archiŭnaj słužby Biełarusi.
Cikavy štrych ź bijahrafii Aleha Voinava — jon naradziŭsia va ukrainskim Dnieprapiatroŭsku (ciapier Dniapro). Jahonyja svajaki i ciapier žyvuć tam, a paśla napadu Rasii na Ukrainu zapisali videazvarot da svajho svajaka, zaklikajučy jaho nie vajavać suprać radzimy samomu i paŭpłyvać na svajo kamandavańnie. Adnak hety zvarot nijakaha ŭpłyvu na jaho nie akazaŭ.
Nakolki nam viadoma, sam ukrainiec Voinaŭ u vajnie Rasii suprać Ukrainy na rasijskim baku, a zachop rasijskimi vojskami terytoryj na poŭdni i ŭschodzie Ukrainy ŭsprymaje jak ich «vyzvaleńnie».
Razam ź inšymi vysokapastaŭlenymi biełaruskimi vajskoŭcami Aleh Voinaŭ uniesieny ŭ adzin z sankcyjnych śpisaŭ Jeŭrasajuza.
Kamientary