«Paŭpłyvaj na heta, ty ž možaš». Siamja z Dniapra źviarnułasia da svajho svajaka — pamočnika ministra abarony Biełarusi
Žychar ukrainskaha horada Dniapro Hleb Voinaŭ zapisaŭ emacyjny videazvarot da svajho rodnaha brata Aleha, jaki zajmaje pasadu načalnika Departamienta mižnarodnaha vajskovaha supracoŭnictva Minabarony Biełarusi, piša partał Informator.ua.
Da svajho brata Hleb Voinaŭ vyrašyŭ źviarnucca ŭ suviazi z rasijskim uvarvańniem va Ukrainu:
«Ty, Aleh, naradziŭsia i vyras u Dniapry. Zaraz ty słužyš u Biełarusi, zajmaješ pasadu pamočnika ministra abarony Respubliki Biełaruś pa pytańniach vajskovaha supracoŭnictva. Ciapier u nas u krainie idzie vajna i ja b chacieŭ, kab ty pa miery svaich siłaŭ i mahčymaściaŭ prykłaŭ jak maha bolš namahańniaŭ, kab spynić heta krovapralićcie. Heta poŭnaje varjactva».
U zapisie videazvarotu pryniała ŭdzieł i žonka Hleba:
«Tut žyvie tvaja mama, napeŭna, samy rodny i darahi dla ciabie čałaviek, — skazała žančyna. — My ničoha nie viedali ab tym, što budzie vajna. Pra toje, što vy chočacie pryniać u joj udzieł. Jak ty budzieš hladzieć u vočy nam? My taboj hanarylisia, my nie chočam, kab nam było soramna, što našy svajaki žyvuć u Biełarusi. U ciabie taksama jość dzieci, syn, dačka. Jak vy možacie heta dapuścić?! Vy možacie na heta paŭpłyvać. Tut ciače kroŭ našych dziaciej, ich zabivajuć, a vy robicie vyhlad, što hetaha nie viedajecie? Tut strašna, my ŭ piekle».
Aleh Voinaŭ zajmaje pasadu načalnika Departamienta mižnarodnaha vajskovaha supracoŭnictva Ministerstva abarony Biełarusi — pamočnika ministra pa pytańniach mižnarodnaha vajskovaha supracoŭnictva. Jon naradziŭsia ŭ 1967 hodzie ŭ Dnieprapiatroŭsku Ukrainskaj SSSR. U 1984 hodzie pastupiŭ u Novasibirskaje vyšejšaje vajenna-palityčnaje ahulnavajskovaje vučylišča. Słužbu prachodziŭ u Biełaruskaj vajskovaj akruzie. U 2015 hodzie jamu prysvoili zvańnie hienierał-majora.
«Lipa va ŭsich sensach». Voś jak buduć vyhladać drevy ŭ vazonach na hałoŭnym minskim praśpiekcie. Błohiery atrymali zadańnie imi zachaplacca10
Kamientary