Na 94-m hodzie žyćcia pamior viadomy ŭkrainski paet, hramadska-palityčny dziejač, Hieroj Ukrainy Dmytro Paŭłyčka, paviedamiła «Ukrainskaja praŭda». Jaho pieśnia «Dva kolori» stała narodnaj.
Pierad tym staršynia Nacyjanalnaha sajuza piśmieńnikaŭ Ukrainy Michaił Sidaržeŭski napisaŭ u fejsbuku:
«Siońnia ŭviečary pamior Dmytro Paŭłyčka. Mnie tolki što pra heta paviedamiŭ Bahdan Horyń sa spasyłkaj na dačku piśmieńnika».
Dmytro Paŭłyčka byŭ adnym z samych značnych ukrainskich paetaŭ. Ź im byli dobra znajomyja i navat siabravali i biełaruskija tvorcy.
Naradziŭsia jon u 1929 hodzie na terytoryi ciapierašniaj Ivana-Frankoŭskaj vobłaści, jakaja ŭ toj čas uvachodziła ŭ skład Polščy. U 1945 hodzie vajavaŭ u składzie Ukrainskaj paŭstanckaj armii, za što paśla byŭ na 8 miesiacaŭ źniavoleny savieckaj uładaj.
Pieršyja kroki ŭ litaratury rabiŭ u Lvovie, u 1964 hodzie pierajechaŭ u Kijeŭ. U 1971—1978 hadach byŭ hałoŭnym redaktaram časopisa «Vsieśvit», jaki drukavaŭ pa-ŭkrainsku tvory suśvietnaj litaratury. Sam byŭ viadomy jak plonny pierakładčyk z roznych moŭ.
Z časoŭ pierabudovy aktyŭna ŭdzielničaŭ u palityčnym žyćci, zaŭsiody padtrymlivaŭ nacyjanalnyja siły. Nieadnarazova byŭ deputatam Viarchoŭnaj Rady, u 1990-ja — pasłom Ukrainy ŭ Słavakii i Polščy.
Mnohija viedajuć ukrainskuju pieśniu «Dva kolori», aŭtar słoŭ da jaje akurat Dmytro Paŭłyčka.
Ciapier čytajuć
Žycharka Daniecka zajechała praź Biełaruś va Ukrainu, kab pamianiać pašpart i pajechać žyć u Jeŭropu. Akazałasia, pierad tym jana vajavała za Rasiju1010
Kamientary