Z «Pahoniaj» na vokładcy i štampam dla zamiežnych pajezdak. Jakija pašparty vydavali raniej u Biełarusi
Demsiły płanujuć u chutkim časie vypuścić novy pašpart dla biełarusaŭ, jakija nie mohuć viarnucca dadomu ci zamović novy dakumient u konsulstvie. Instahram-akaŭnt «Biełaruś 1990-ja, 2000-ja» zhadvaje, jakija pašparty vydavalisia raniej na terytoryi sučasnaj Biełarusi.
Paśla razvału SSSR i zdabyćcia niezaležnaści ŭ Biełarusi niekalki hadoŭ praciahvali vydavać savieckija pašparty ŭzoru 1974 hoda.
Svoj pašpart u biełarusaŭ źjaviŭsia tolki ŭ 1993 hodzie. Heta byŭ pašpart siniaha koleru z aficyjnym tady hierbam «Pahonia» na vokładcy. Słovy «Respublika Biełaruś» i «Pašpart» na im byli napisanyja tolki na biełaruskaj i anhlijskaj movach.
Pry hetym pašparty savieckaha ŭzoru praciahvali vydavać navat u 1994 hodzie. Ab prynaležnaści byłoha hramadzianina SSSR da niezaležnaj Biełarusi śviedčyŭ štamp na adnoj sa staronak z adpaviednym nadpisam: «Hramadzianin Respubliki Biełaruś», vykananym na biełaruskaj i anhlijskaj movach.
Pašparty hramadzianina RB uzoru 1993 hoda vydavali da 1996-ha. Novy pašpart zachavaŭ raniejšy koler, na vokładcy źjavilisia nadpisy na ruskaj movie, hierb «Pahonia» byŭ zamienieny na ciapierašni. Unutranaje afarmleńnie asnoŭnaha dakumienta taksama značna źmianiłasia.
Žyć z «čyrvonym» pašpartam možna było i praz 10 hadoŭ paśla razvału SSSR. Bolš za toje, u 1999 hodzie ŭładalniki savieckaha pašparta mahli vyjazdžać za miažu. Praŭda, dla hetaha ŭ tyja časy treba było pastavić adpaviedny štamp ź infarmacyjaj, što «pašpart pryhodny dla šmatrazovych vyjezdaŭ va ŭsie krainy śvietu».
Dakumient byŭ vyviedzieny z aficyjnaha abarotu tolki ŭ kancy 2002 hoda, kali 29 kastryčnika Saviet Ministraŭ pryniaŭ pastanovu № 1492 «Ab abmiežavańni terminu dziejańnia pašparta hramadzianina SSSR uzoru 1974 hoda i pašparta hramadzianina RB uzoru 1993 hoda». Razam z savieckim pašpartam admianili i pašpart z «Pahoniaj».
Za čverćviekavuju historyju pašpart uzoru 1996 hoda pieražyŭ niekalki niaznačnych madyfikacyj.
Dziejny ŭzor pašparta byŭ zaćvierdžany ŭ 2010 hodzie. U 2021 hodzie byŭ uviedzieny ŭ abaračeńnie bijamietryčny pašpart i ID-karta.
Pradstaŭniki biełaruskaj apazicyi pracujuć nad tym, kab biełarusy, jakija žyvuć za miažoj i nie mohuć viarnucca ci źviarnucca ŭ konsulstva, mahli atrymać novyja pašparty.
Palityki śćviardžajuć, što sam dakumient užo raspracavany i adpaviadaje standartam ICAO — Mižnarodnaj arhanizacyi hramadzianskaj avijacyi.
Zastavačnaje fota: Anatol Labiedźka
Čytajcie taksama: Kali demsiły płanujuć vypuścić novy biełaruski pašpart, dzie jon budzie dziejničać i chto jaho budzie vydavać
Kamientary