Byłoha načalnika Homielskaha adździaleńnia BČ pryznali vinavatym u karupcyi, ale pakinuli na voli
U Homieli vynieśli prysud pa karupcyjnaj spravie ŭ dačynieńni da słužbovych asob Biełaruskaj čyhunki. Siarod abvinavačanych byŭ i były kiraŭnik Homielskaha adździaleńnia Ryhor Dvorak.
Usiaho na łavie padsudnych apynulisia siem słužbovych asob. Ich abvinavacili ŭ kradziažy šlacham złoŭžyvańnia słužbovymi paŭnamoctvami, dačy i atrymańni chabaru, a taksama słužbovaj padrobcy, piša miascovaje vydańnie «Fłahštok».
Pa źviestkach śledstva, abvinavačanyja vykarystoŭvali dla asabistych patreb majomaść, jakaja nabyvałasia dla pradpryjemstva. Heta byli łožki, tumby, matracy, a taksama bytavaja technika.
Rabotnikam BČ taksama pastavili ŭ vinu złoŭžyvańni pry ździajśnieńni zakupak. Majomaść nabyvałasia pa zavyšanych cenach, a roźnicu ŭ cenach słužbovyja asoby prysvojvali sabie. Złačynstvy ździajśnialisia ŭ pieryjad z 2019 pa 2021 hod.
Samaje surovaje pakarańnie ŭ vyniku było vyniesienaje načalniku filijała budaŭniča-mantažnaha ciahnika №354 na stancyi «Homiel». Fihurant kryminalnaj spravy atrymaŭ 5 hadoŭ pazbaŭleńnia voli ŭ kałonii ŭzmocnienaha režymu.
U toj ža čas były načalnik Homielskaha adździaleńnia BČ Ryhor Dvorak zastaniecca na voli. Sud pryznačyŭ jamu pakarańnie ŭ vyhladzie 4 hadoŭ pazbaŭleńnia voli z adterminoŭkaj vykanańnia prysudu na 2 hady.
Ryhor Dvorak kiravaŭ Homielskim adździaleńniem BČ na praciahu dzieviaci hadoŭ. Akramia taho, jon byŭ i členam Savieta Respubliki 6-ha sklikańnia. U 2020 hodzie homielskija čyhunačniki vychodzili na pikiet u znak pratestu suprać represij z boku kiraŭnictva Homielskaha adździaleńnia BČ. Rabotniki śćviardžali, što zvalnieńni niazhodnych adbyvalisia pa asabistym rasparadžeńni Dvoraka.
Ciapier čytajuć
Na mitynhu ŭ Vilni zatrymali pravakatara. A Cichanoŭski zajaviŭ pra namier dabivacca sustrečy ź Zialenskim31
Kamientary