«Ad Bresta da Varšavy dabralisia za 5 hadzin». Kolki času ciapier zajmaje pierasiačeńnie miažy na aŭtobusie?
Na pačatku krasavika na miažy z Polščaj źbiralisia vielizarnyja čerhi z aŭtobusaŭ. Pierachod miažy zajmaŭ pa 15—18 hadzin. Pacikavilisia, jak situacyja z aŭtobusami vyhladaje ciapier.
Travień pačali biez čerhaŭ
Najbolš napružanym punktam propusku zastajecca «Brest—Tarespal», jaki paśla zakryćcia «Babroŭnikaŭ» staŭ adzinym punktam na miažy z Polščaj, pryznačanym dla ruchu pasažyrskaha transpartu.
Biełarusy, jakija ŭ druhoj pałovie krasavika pierasiakali biełaruska-polskuju miažu na aŭtobusie, kažuć, što daroha ad Bresta da Varšavy zajmaje kala 8-9 hadzin. U horšych vypadkach na heta moža syści da 12-15 hadzin.
Tyja, chto jechaŭ u apošnich čysłach krasavika, užo dabirałasia ad Bresta da Varšavy ŭsiaho za 5-6 hadzin.
Karystalniki admysłovych čataŭ kažuć, što kali na sajcie Dziaržpahrankamiteta paznačanaja čarha z kala 5 aŭtobusaŭ, to pierachod miažy zvyčajna zajmaje kala 5 hadzin.
Adna hadzina zamiest piaci
Pry hetym, jak adznačajuć padarožniki, u pieršych čysłach traŭnia situacyja palepšyłasia. Naprykład, u noč z 3 na 4 traŭnia na miažy z Polščaj nie było čerhaŭ z aŭtobusaŭ, tamu na prachodžańnie spatrebiłasia krychu bolš za hadzinu. Dziakujučy hetamu, aŭtobus ruchaŭsia zhodna z raskładam, što dla ciapierašniaha času, chutčej, vyklučeńnie, čym norma.
Pra chutkaje pierasiačeńnie miažy kazali i inšyja biełarusy, jakija jechali praz «Brest—Terespal» na pačatku tydnia. Ludzi kažuć, što pierasiekli miažu mienš, čym za 2 hadziny. Jość tyja, chto 2 traŭnia pierasiakaŭ miažu na aŭtobusie za 1 hadzinu 20 chvilin, choć u papiarednija pajezdki na heta sychodziła ad 4 da 6 hadzin. Biełarusy, u jakich atrymałasia prajści miažu mienš, čym za 2 hadziny adznačajuć, što heta byŭ ich asabisty rekord za apošnija miesiacy.
Čerhi viartajucca?
Pačynajučy z 4 traŭnia znoŭ pačali źbiracca čerhi. Tak, pa stanie na 16 hadzin čaćviarha na miažy z Polščaj było bolej za 10 aŭtobusaŭ. Vierahodna, što pierachod miažy za 1-2 hadziny zastaniecca tolki va ŭspaminach tych, chto pierasiakaŭ jaje padčas doŭhich vychadnych u Polščy. Na inšych punktach propusku čerhaŭ z aŭtobusaŭ niama.
Što tyčycca inšaha vidu transpartu, to najbolšyja čerhi na vyjezd ciapier składajucca ź lehkavych aŭto. Ahułam u čakańni vyjezdu ź Biełarusi ŭ druhoj pałovie čaćviarha stajała bolš za 600 lehkavikoŭ, 280 ź ich u Breście.
Z hruzavym transpartam situacyja vyhladaje mienš napružanaj. Usiaho na vyjezd ź Biełarusi ŭčora paśla abiedu sabrałasia kala 300 hruzavikoŭ. Najbolš zahružanym zastajecca punkt propusku «Kamieny łoh», što na miažy ź Litvoj, tam čakała bolš za 150 fur.
«Zialonaja karta» chutka ŭsio. Jak buduć afarmlacca strachavyja polisy na aŭto dla vyjezdu za miažu?
Jeŭrapiejskija pieravozčyki hublajuć cikavaść da zapraŭki ŭ Biełarusi. Čamu?
Kamientary