Ramantyčnaja kamiedyja, muzyčny bajopik i histaryčnaja drama — try samyja papularnyja filmy na Netflix
Hetyja stužki ŭznačalili rejtynh stryminhavaha servisu ŭ apošni tydzień krasavika.
Treciaje miesca — «Apošniaje karaleŭstva: siem karaloŭ pavinny pamierci»
Histaryčnaja drama, śpin-of sieryjała «Apošniaje karaleŭstva», u asnovie jakoha — cykł ramanaŭ Biernarda Kornueła «Saksonskija historyi». Premjera filma adbyłasia 14 krasavika.
Na praciahu piaci siezonaŭ histaryčnaha sieryjała «Apošniaje karaleŭstva» hledačy sačyli za losam hałoŭnaha hieroja Utreda Biebanburhskaha, jaki z malenstva dobra źviedaŭ dźvie zusim roznyja kultury — skandynavaŭ i anhličan — i sprabavaŭ abjadnać hetych ludziej. Pa chodzie siužeta brytanskija ziemli ŭ rešcie rešt pieratvarylisia ŭ arenu baraćby za ŭładu pamiž zachopnikami i spadčyńnikami, jakija taksama praśledujuć roznyja mety.
U filmie, jaki staŭ praciaham epičnaha sieryjała, Utreda i jaho paplečnikaŭ čakaje padarožža pa razroźnienym karaleŭstvie. Ich meta — stvaryć adzinuju Anhliju, uvasobić maru niabožčyka karala Edvarda pra ŭźjadnańnie ziamiel, a taksama paćvierdzić praroctva, jakoje abviaščaje, što «siem karaloŭ pavinny pamierci, kab usia Brytanija abjadnałasia».
Na sajcie recenzij Rotten Tomatoes film maje stanoŭčy rejtynh 87% na asnovie 15 ahladaŭ krytykaŭ ź siaredniaj acenkaj 7,1/10.
Druhoje miesca — «Uitni Chjustan: ja chaču patančyć z kimści»
Muzyčny bajopik źjaviŭsia na Netflix 22 krasavika, ale ŭ kinateatrach byŭ vypuščany jašče letaś u śniežni. Stužka atrymała nieadnaznačnyja vodhuki krytykaŭ, jakija vysoka acanili ihru Naomi Aki (Uitni Chjustan) i Stenli Tučy (Kłajv Devis — pradziusar i siabar śpiavački), a taksama muzyčnyja frahmienty, ale raskrytykavali scenaryj.
Na sajcie recenzij Rotten Tomatoes 44% sa 131 recenzii krytykaŭ majuć stanoŭčy charaktar ź siaredniaj acenkaj 5,3/10. Kansensus veb-sajta abviaščaje: «Jašče adzin bajopik dla naščadkaŭ, adnosna hladzielny film «Ja chaču patančyć z kimści» pakidaje ŭ vas adčuvańnie, byccam vy byli na scenie z Uitni Chjustan, ale tak i nie zmahli ź joj patančyć».
Amierykancy nazvali najlepšuju pieśniu pra kachańnie — videa
Pieršaje miesca — «Turystyčny daviednik pa kachańni»
Čarhovaja kamiedyja pra padarožža ŭ ekzatyčnuju krainu (pryvitańnie, «Zakinuty horad» z Sandraj Bułak, «Kvitok u vyraj» z Džordžam Kłuni i Džulijaj Robiertc, «Majo pirackaje viasielle» z Dženifier Łopiez i inšyja stužki) vyjšła 21 krasavika. Praŭda, u novym filmie akcent bolš nie na pryhodach, a na ramantycy — praz što stužka, chutčej, nabližajecca da šyroka viadomaj «Ješ. Malisia. Lubi». Na sajcie Rotten Tomatoes 69% z 16 vodhukaŭ krytykaŭ stanoŭčyja, ź siaredniaj acenkaj 5,6/10.
Napisanaja amierykankaj vjetnamskaha pachodžańnia Ejren Donachju i natchnionaja jaje padarožžami, nakiravanymi na vyvučeńnie svaich karanioŭ, historyja raspaviadaje pra mieniedžarku pa padarožžach, jakaja maje prablemy ŭ asabistym žyćci i, kab niešta źmianić, vypraŭlajecca ŭ Vjetnam. Siarod pryhodaŭ hałoŭnuju hierainiu Amandu čakaje i sustreča z pryhožym hidam, ź jakim jana navat advažycca skraści turystyčny aŭtobus.
U filmie źnialisia viadomyja amierykanskija i vjetnamskija akciory.
Pa słovach Rejčeł Li Kuk, vykanaŭcy roli hałoŭnaj hieraini i pradziusarki filma, stužka — heta «ščyraje i z humaram pryznańnie ŭ lubovi da Vjetnama va ŭsioj jaho krasie».
Što jašče pahladzieć:
Sieryjał «Misis Devis»: hety siužet vas dakładna ździvić
Pra što sieryjał BEEF («Hryźnia»), jaki ŭsie nazyvajuć krutym?
Top sieryjałaŭ ad žurnalistaŭ «Našaj Nivy». Niekatoryja ź ich dakładna stanuć adkryćciom dla vas
Na abiedzie Łukašenki i Si Czińpina prysutničała i adzinaja dačka kitajskaha lidara11
Kamientary