Som, kurkuma, paryki z čałaviečych vałasoŭ: siem niezvyčajnych tavaraŭ, jakimi Vjetnam handluje ź Biełaruśsiu
Učora pačaŭsia aficyjny vizit Alaksandra Łukašenki ŭ Vjetnam. Heta pieršaja pajezdka kiraŭnika krainy ŭ piaty termin.
Za dzieviać miesiacaŭ sioleta Biełaruś i Vjetnam nahandlavali na 107 miljonaŭ dalaraŭ. Prykładna stolki ž, jak z Aŭstryjaj ci Bałharyjaj. Biełaruś maje stanoŭčaje salda ŭ handli z Vjetnamam ŭ pamiery 57 miljonaŭ.
My pahladzieli, što ž niezvyčajnaha z vjetnamskich tavaraŭ zakuplaje Biełaruś. Viadoma, tut havorka nie pra arachis ci harbatu.
1. Som
Vjetnam źjaŭlajecca najbujniejšym pastaŭščykom soma ŭ Biełaruś. Dakładniej, ekspartujuć hetuju rybinu jašče tolki rasiejcy. Sioleta Biełaruś nabyła ŭ Vjetnama zamarožanaha soma na sumu 53 tysiačy dalaraŭ, a file soma až na 687 tysiač. Dva hady tamu Łukašenka raskazvaŭ, jak złaviŭ na Prypiaci 57-kiłahramovaha soma. Ciapier toje samaje jon moža pasprabavać paŭtaryć na Miekonhu.
2. Hurki i karnišony
Sioleta my zakupili ŭ Vjetnamie marynavanych hurkoŭ i karnišonaŭ na 67 tysiač dalaraŭ. Bolš pastaŭlaje tolki Indyja.
3. Karyca i kurkuma
Karycu (ci cynamon) Biełaruś zakuplaje ŭ asnoŭnym u Rasii i Indanezii. Ale kuplaje časam i ŭ Vjetnama, i ŭ Madahaskara. U Vjetnama sioleta nakuplali amal na 2,5 tysiačy dalaraŭ.
A voś inšych śpiecyjaŭ – kurkumy – Biełaruś nabyła ŭ Vjetnamie až na 100 dalaraŭ, ale navat takija źviestki zafiksavanyja ŭ ličbach Nacyjalnaha statystyčnaha kamiteta.
4. Sojevy sous
Nie Japonija i nie Kitaj, a mienavita Vjetnam źjaŭlajecca hałoŭnym pastaŭščykom u Biełaruś hetak lubimaha mnohimi sojevaha sousa. Vjetnam pradaŭ nam hetaha pradukta na 278 tysiač dalaraŭ (242 tony), a Japonija – tolki na 23 tysiačy (16 ton).
5. Tenisnyja rakietki
Całkam moža być, što siońnia budučyja Viktoryi Azaranki i Maksimy Mirnyja trenirujucca jakraz z rakietkami vjetnamskaj vytvorčaści. Bolš rakietak prychodzić tolki z Kitaja i Rasii.
6. Słanovaja kość
A tut Vjetnam uvohule faktyčna ŭnikalny eksparcior. Słanovuju kość nam pradaje jašče tolki Indyja. U krainy Cho Šy Mina my nabyli hetaha pradukta sioleta na 5,5 tysiačy dalaraŭ.
7. Paryki i barody z čałaviečych vałasoŭ
Prostyja ludskija vałasy nam pastaŭlaje ŭ asnoŭnym Indanezija. A voś užo hatovyja paryki, barody i viejki z čałaviečych vałasoŭ iduć z Rasii, Kitaja i Vjetnama. Letaś Biełaruś nabyła ŭ apošniaha takoj pradukcyi na 8,9 tysiač dalaraŭ.
Mama Baženy Jaremič, jakaja rychtuje pryhažuń dla Łukašenki, kupiła elitny katedž koštam $837 tysiač24
Kamientary