Sud Zavodskaha rajona Minska asudziŭ 36-hadovaha minčuka da 9 hadoŭ kałonii pavodle artykuła ab vykradańni čałavieka (artykuł 182 KK), u žniŭni 2021 hoda jon z saŭdzielnikam vykraŭ, źbiŭ i zakapaŭ pa šyju ŭ piasok dvuch čałaviek. Na apublikavanaje rašeńnie suda źviarnuła ŭvahu «Zierkało».
Pavodle materyjałaŭ spravy, u abvinavačanaha i jaho 18-hadovaha zmoŭščyka zdaryŭsia kanflikt z dvuma mužčynami. Jany pryznačyli im sustreču na aŭtastajancy i, pahražajučy pistaletam, pasadzili ŭ mašynu. Adnamu z paciarpiełych raźbili hałavu rukajatkaj. U mašynie paciarpiełym źviazali ruki płastykavymi chamutami, adabrali ŭ ich usiu majomaść i pryšpilili łancuhami, jakija byli prymajstravanyja pad siadzieńniami. Na hałovy im nadzieli łyžnyja maski z zaklejenym škłom, rot zalapili skotčam.
Paciarpiełych advieźli za horad, dzie źmiaścili ŭ zahadzia vykapanuju jamu, i zasypali piaskom pa šyju, abmatali hałovy skotčam, zalapili vušy i pakinuli ŭ takim stanoviščy.
Praź niekatory čas adnamu z paciarpiełych udałosia vybracca ź jamy. Paśla jon dapamoh vyleźci ź jaje pryjacielu. Jany pajšli ŭ bok darohi, dabralisia da Minska i paviedamili pra zdareńnie ŭ milicyju.
Vykradalniki paśpieli schavacca, ich abviaścili ŭ vyšuk. Praz hod adnaho ź ich, starejšaha, zatrymali ŭ Maskvie i ekstradavali ŭ Biełaruś. Druhoha ŭsio jašče šukajuć.
Na padstavie zakona «Ab amnistyi ŭ suviazi z Dniom narodnaha adzinstva» termin minčuku pamienšyli na adzin hod.
Kamientary