Šviejcarski futbolny kamientatar sutyknuŭsia z krytykaj praz adsutnaść zhadki pra represii ŭ Biełarusi

Spartyŭny viadučy SRF (Schweizer Radio und Fernsehen ci Šviejcarskaja teleradyjokampanija) Saša Rufier padvierhsia krytycy praz zamoŭčvańnie masavych represij u Biełarusi padčas svajho analizu słabych bakoŭ biełaruskaj futbolnaj zbornaj. Pra heta napisała šviejcarskaje vydańnie Tages-Anzeiger.

Razmova idzie ab razbory niedachopaŭ biełaruskich futbalistaŭ, jakija jašče ŭ kancy sakavika razhromna prajhrali šviejcarcam u adboračnym matčy da čempijanatu Jeŭropy pa futbole (hetuju situacyju raniej užo kamientavali i kapitan zbornaj Biełarusi, i jaje hałoŭny trenier).

U svaim analizie žurnalist Saša Rufier apuściŭ fakt masavych palityčnych represij u Biełarusi, jakija naŭprost adbilisia na jakaści hulni biełaruskaj zbornaj, abmiežavaŭšysia tolki słovami ab «pracesie apracoŭki biełaruskaha futboła» i «prosta kiepskaj hulni biełarusaŭ».

«Rufier zmaŭčaŭ ab niepasrednym upłyvie na biełaruskuju zbornuju represij z boku režymu Łukašenki i kazaŭ tolki pra niejkija pracesy apracoŭki biełaruskaha futboła. Žurnalist nie staŭ zhadvać toje, što niełajalnych i pa sumiaščalnictvie dobrych hulcoŭ režym Łukašenki zusim prybraŭ sa zbornaj i nie tolki», — piša vydańnie Tages-Anzeiger.

U vyniku Rufiera abvinavacili ŭ parušeńni žurnalisckich pryncypaŭ daniasieńnia praŭdy i zachavańnia spraviadlivaści, a šviejcarska-niamieckaja pravaabarončaja arhanizacyja Libereco ŭvohule skiravała adkrytuju skarhu na adras Šviejcarskaj teleradyjokampanii, dzie pracuje Saša Rufier.

Adnak kampanija adchiliła skarhu Libereco, zajaviŭšy ab adsutnaści parušeńnia pryncypaŭ spraviadlivaści i praŭdy, a taksama adznačyŭšy, što «sport pa-za palitykaj».

«Naš asnoŭny biznes — heta sport, a nie palityka. My paviedamlajem hledačam ab dadatkovych faktach tolki ŭ vypadku, kali dla samoj aŭdytoryi heta aktualna. Niahledziačy na ​​ŭsiu krytyku na adras biełaruskich i rasijskich spartoŭcaŭ, hulni futbolnych i inšych zbornych — heta ŭ pieršuju čarhu pra najlepšyja vystupy i emocyi, a nie pra palityku», — zajavili ŭ adkaz na krytyku i skarhi ŭ Šviejcarskaj teleradyjokampanii.

Pry hetym, jak adznačaje vydańnie Tages-Anzeiger, teleradyjokampanija sama była siarod tych, chto pisaŭ pra represii ŭ biełaruskim hramadstvie i sporcie. A žurnalist Saša Rufier umaŭčaŭ ab situacyi ŭ Biełarusi niaprosta tak: jon atrymaŭ vymovu jašče padčas čempijanatu śvietu pa futbole ŭ Katary, kali, naadvarot, adkryta aśviatlaŭ prablemy z pravami čałavieka ŭ hetaj krainie, što nie spadabałasia jaho najmalnikam.

• 5
• 0
• 1
• 7
• 2
• 4
• 18
• 0