«Hipierbałoid inžyniera Haryna». Biełaruś i Rasija anansavali, što stvarajuć «vielmi mahutnuju» łaziernuju zbroju suprać bieśpiłotnikaŭ
Adno ź biełaruskich pradpryjemstvaŭ zapeŭnivaje, što novaja sistema zmoža źniščać bieśpiłotniki na adlehłaści ŭ dziasiatki kiłamietraŭ.
Biełaruś i Rasija stvarajuć novuju bajavuju łaziernuju ŭstanoŭku, jakaja zmoža źniščać drony na vialikaj adlehłaści. Pra heta paviedamiła 30 maja rasijskaje ahienctva TASS sa spasyłkaj na biełaruskaje pradpryjemstva «Navukova-techničny centr «ŁEMT» BiełOMA».
Jakraz hetaje pradpryjemstva sumiesna ź inšymi dvuma rasijskimi navukova-techničnymi instytutami budzie na praciahu dvuch hadoŭ raspracoŭvać łaziernuju sistemu mahutnaściu 100 kVt i dalokaściu stralby «ŭ niekalki dziasiatkaŭ kiłamietraŭ» dla źniščeńnia bieśpiłotnikaŭ.
Pa słovach pradstaŭnika biełaruskaj kampanii, pratatyp novaj sistemy pakažuć užo sioleta, a sam łazier budzie «vielmi mahutnym».
«Majem sumiesny prajekt ź dźviuma rasijskimi kampanijami pa raspracoŭcy vielmi mahutnaj i daskanałaj łaziernaj sistemy dla baraćby ź bieśpiłotnikami. «Hipierbałoid inžyniera Haryna» čytali (fantastyčny raman Alaksieja Tałstoha. — NN)? Voś novaja ŭstanoŭka taksama budzie paražać łaziernym promieniem bieśpiłotniki na adlehłaści dziasiatkaŭ kiłamietraŭ», — zapeŭnivaje pradstaŭnik «ŁEMT».
Sama kampanija, pa paviedamleńniach TASS, užo pakazvała svoj inšy pratatyp łaziernaj pryłady na vajennaj vystavie MILEX-2023, jakaja prachodziła ŭ Minsku jašče ŭ mai. Tady «ŁEMT» prademanstravaŭ kudy mienšy pa mahutnaści bajavy łazierny modul z dalokaściu stralby da 1,5 km, jaki moža pieranosicca ŭ kantejnierach i ŭstaloŭvacca na transpart. Hetaja sistema nibyta prajšła paśpiachovyja vyprabavańni i spadabałasia adnamu z zakazčykaŭ ź Blizkaha Uschodu.
Na sajcie «ŁEMT» skazana, što kampanija zajmajecca daśledavańniem i vytvorčaściu optyka-elektronnych pryboraŭ «padvojnaha pryznačeńnia» (to-bok dla hramadzianskich i vajennych patreb). U asartymiencie pradpryjemstva fihurujuć niekalki katehoryj tavaraŭ: aptyčnyja pryceły, kampanienty bieśpiłotnikaŭ i sistem SPA, prybory dla achovy dziaržaŭnaj miažy, łaziernyja dalamiery, miedycynskaje abstalavańnie i h. d.
Zusim niadaŭna «ŁEMT» i inšyja biełaruskija pradpryjemstvy trapili va ŭkrainski sankcyjny śpis terminam na 10 hadoŭ za ŭdzieł u rasijskaj vajennaj ahresii suprać Ukrainy.
Kamientary