Na płatformie Vodblisk staŭ dastupny karotkamietražny film «Voziera radaści»
Na płatformie Vodblisk źjaviŭsia biełaruski film, jaki pakazali na siamidziesiaci kinafiestyvalach śvietu, dzie jon atrymaŭ tryccać uznaharod: ihravaja stužka «Voziera radaści» režysiora Alaksieja Pałujana. Film vyłučaŭsia na premiju «Oskar» u 2021 hodzie i trapiŭ u łonh-list premii.
Stužka «Voziera radaści» źniataja pavodle adnajmiennaha ramana viadomaha biełaruskaha piśmieńnika Viktara Marcinoviča. Raman vyjšaŭ jakraz tady, kali režysior pačaŭ pracavać nad scenaryjem da filma. U toj ža čas siabar režysiora padaryŭ jamu knihu «Voziera radaści». Pa słovach Alaksieja Pałujana, jon adrazu napisaŭ Viktaru Marcinoviču i paprasiŭ dazvołu na ekranizacyju, ale z ahavorkaj, što heta budzie svabodnaja adaptacyja. Piśmieńnik pahadziŭsia.
Sama stužka — pra dzieviacihadovuju dziaŭčynku pa imieni Jasia, jakaja pieražyvaje śmierć maci, a baćka adpraŭlaje jaje ŭ internat. Ale adnojčy Jasia źbiahaje, kab viarnucca dadomu.
Aproč ramana, za asnovu filma režysior uziaŭ piersanalnuju siamiejnuju historyju: baćka režysiora taksama, jak i hierainia Jasia, vychoŭvaŭsia ŭ internacie, kudy jahony baćka addaŭ jaho paśla śmierci maci.
Hałoŭnuju rolu ŭ karcinie vykanała Nastaśsia Plac, vychavanka škoły-internata ŭ Mahilovie. U pošukach hieraini Alaksiej Pałujan z kamandaj abjeździli nie adzin internat i znajšli dziaŭčynku akurat u apošnim miescy z tych, dzie pravodzili kastynhi.
Režysior «Voziera radaści» nie raz padkreślivaŭ, nakolki hety film asablivy dla jaho:
«Ja žadaŭ raskazać dramu pra mocnaha čałavieka, jaki ŭ dzieviać hadoŭ advažvajecca budavać svoj šlach samastojna. Tamu dla mianie było važna, kab hałoŭnuju rolu vykanała dzicia ź internata. Mnie paščaściła sustreć Naściu Plac u mahiloŭskim internacie. Jana pavieryła mnie i pryadkryła čaścinku svajho hłybokaha śvietu».
Na kastynhu dla masoŭki ŭ Astroŭskaj škole znajšli vykanaŭcu roli Antosia, Jasinaha siabra ŭ internacie, — Alaksandra Prymšyca. Taksama z Astroŭskaj škoły Palina Kudzina, jakaja prafiesijna spraviłasia z rolaj Paliny, Jasinaj siabroŭki. U adnym ź intervju režysior Alaksiej Pałujan adznačaje važnaje nazirańnie pra pracu dziaciej-akcioraŭ u filmie «Voziera radaści»:
«U im hrajuć dzieci, jakija robiać heta pa-darosłamu».
Roli astatnich piersanažaŭ vykonvajuć viadomyja ŭ Biełarusi akciory: Ihar Sihaŭ, Śviatłana Anikiej, Aleś Małčanaŭ, Alena Zuj-Vajciachoŭskaja, Taćciana Marchiel i Dzianis Tarasienka. A ŭ adnym z epizodaŭ navat źniaŭsia biełaruski piśmieńnik Viktar Marcinovič, čyj raman zakładzieny ŭ asnovu siužeta filma.
«Voziera radaści» — film, źniaty ŭ supracy Biełarusi, Hiermanii i Ispanii. I techničnaja častka kamandy była sapraŭdy internacyjanalnaj. Akramia biełarusaŭ, nad filmam pracavali kiniematahrafisty z Hiermanii, Irana, Hruzii, Ukrainy, Šatłandyi i Bałharyi.
Stužku zdymali na praciahu kastryčnika 2017 hoda ŭ čatyroch biełaruskich vioskach Lachavickaha rajona: Vostraŭ, Alchaŭcy, Lipsk i Lubiejki.
Heta całkam biełaruskamoŭny film. Z 2010 hoda Alaksiej Pałujan razmaŭlaje tolki na biełaruskaj movie, tamu dla jaho nie stajała pytańnie, na jakoj movie buduć razmaŭlać hieroi stužki.
U filmie hučyć muzyka biełaruskaha kalektyvu Vuraj, jaki ekśpierymientuje ź biełaruskim falkłoram i złučaje jaho z elemientami roznych stylaŭ sučasnaj muzyki. Sami muzyki taksama źjaŭlajucca ŭ adnoj sa scen «Voziera radaści».
Premjera filma adbyłasia ŭ 2018 hodzie na francuzskim fiestyvali karotkaha kino ŭ Klermon-Fieranie, jaki ličycca najbujniejšym festam dla karotkamietražnych filmaŭ u śviecie.
Prahlad filma «Voziera radaści» z zamiežža dastupny za 5 dalaraŭ. Dostup da filma zachoŭvajecca 30 dzion z momantu pieršaha prahladu, a hladzieć jaho možna lubuju kolkaść razoŭ. Hledačy, jakija znachodziacca na terytoryi Biełarusi, mohuć hladzieć biaspłatna ŭvieś repiertuar miedyjateki Vodblisk u 2023 hodzie.
Kamientary