75-hadovy viciebski aktyvist vyjšaŭ na volu paśla 15 sutak aryštu, prysudžanaha jamu za nibyta niesankcyjanavanaje pikietavańnie. Jaho zatrymali 28 lipienia na stancyi Bihosava (heta apošni čyhunačny prypynak na biełaruska-łatvijskim pamiežžy), bo padčas pravierki dakumientaŭ u dyziel-ciahniku pamiežniki zaŭvažyli «Pahoniu» na ŭnutranym baku vokładki jahonaha pašparta. U Vierchniadźvinskim RAUS dakumient pryznali naŭmysna paškodžanym.
Pakul apazicyjanier adbyvaŭ aryšt, jaho znajomyja i siabry zmahli daviedacca padrabiaznaści pra incydent i jaho nastupstvy.
Barys Chamajda jechaŭ dyziel-ciahnikom «Połack-Bihosava», bo źbiraŭsia adtul piecham pajści ŭ Rosicu — uziać udzieł u pilihrymcy ŭ pamiać rosickich pakutnikaŭ — ksiandzoŭ Juryja Kašyry i Antonija Laščeviča. Pravierku dakumientaŭ u ciahniku pravodziŭ małady pamiežnik: zaŭvažyŭšy nalepku z «Pahoniaj» na miescy dziaržaŭnaha hierba Respubliki Biełaruś, jon paviedamiŭ pra heta kiraŭnictvu. Barysa Chamajdu zatrymali na pieronie i zaviali ŭ karavulnaje pamiaškańnie, dzie jon pravioŭ niekalki hadzinaŭ.
Uvieś hety čas pamiežniki railisia z kiraŭnictvam rajadździeła milicyi, ci źjaŭlajecca vyjava «Pahoni» ekstremisckaj simvolikaj. Potym jaho advieźli ŭ Vierchniadźvinski RAUS, skazaŭšy, što jon budzie zatrymany na termin da troch sutak — abo da sudu, abo da vyzvaleńnia z vybačeńniami.
Spraŭdziŭsia pieršy varyjant: 1 žniŭnia administracyjnuju spravu Barysa Chamajdy razhladała sudździa Vierchniadźvinskaha rajsuda Taćciana Kuklina. Na sud aktyvista pryvieźli ŭ kajdankach. Sudździa pryznała Chamajdu vinavatym pavodle č.1 art. 24.23 (parušeńnie paradku arhanizacyi i praviadzieńnia masavaha mierapryjemstva).
Krynica, blizkaja da Vierchniadźvinskaha RAUS, raspaviała, u jakich umovach adbyvaŭ aryšt viciebski aktyvist. Kamiery, dzie trymajuć aryštantaŭ, mieściacca ŭ sutareńni, tudy amal nie traplaje dzionnaje śviatło, tamu ŭvieś čas, navat nočču, haryć elektyryčnaja lampačka. Daloka nie maładomu čałavieku daviałosia spać na žaleznych narach biez matraca — tak ciapier paŭsiudna abychodziacca z «palityčnymi». Niekalki raz za noč da jaho prychodzili z pravierkami — budzili i raspytvali pra zdaroŭje.
Administracyjny pratakoł na Chamajdu byŭ składzieny tolki na druhija sutki pa zatrymańni. Bo apazicyjanier, jaki maje vyšejšuju jurydyčnuju adukacyju, pačaŭ aburacca, što jaho ŭtrymlivajuć niezakonna.
Milicyjanty napisali, što Barys Chamajda znarok źmiaściŭ nalepku z «Pahoniaj» u pašpart, i raz jaje ŭbačyŭ pamiežnik, to mahli ŭbačyć i inšyja ludzi.
Siabry aktyvista pryhadvajuć, što hetaj nalepcy ŭ pašparcie ŭžo bolš za 15 hadoŭ, z taho času Chamajda minimum trojčy vyjazdžaŭ ź Biełarusi, i nikoli raniej pamiežniki nie źviartali ŭvahi na vokładku pašparta.
Supracoŭniki Vierchniadźvinskaha RAUS vyrašyli, što dakumient sapsavany. Uładalniku jaho nie viarnuli, skazaŭšy, što pierašluć u adździeł milicyi pa miescy žycharstva, bo pašpart vymahaje zamieny.
Čytajcie taksama:
Homielskamu barmienu Viatoškinu zamianili «chatniuju chimiju» na kałoniju
HUBAZiK zatrymaŭ biełarusa za toje, što jon u World of Tanks raźmiaściŭ «Pahoniu» na tanku
HUBAZiK prymusiŭ mužčynu źvieści tatuiroŭku z radkom «Nie być skotam»
-
Antanina Kanavałava raskazała, jak jaje prymušali padpisać prašeńnie pra pamiłavańnie
-
«Ja pieršamajskaje bydła i limita, bazaru nul. Ale blizki da centra pryniaćcia rašeńniaŭ». Što Tur piša pad psieŭdanimam u «ekstremisckim» čacie
-
«Chapaj jaje za azadak, zaciahni ŭ tualet». U Varšavie zajavili ŭ prakuraturu na pikap-treniera ź Biełarusi Aleksa Leśli
«Ja pieršamajskaje bydła i limita, bazaru nul. Ale blizki da centra pryniaćcia rašeńniaŭ». Što Tur piša pad psieŭdanimam u «ekstremisckim» čacie19
Kamientary