«Ja nie mianiaŭ numar». Makron zajaviŭ, što hatovy razmaŭlać z Pucinym pra spynieńnie vajny va Ukrainie
Prezident Francyi Emanuel Makron zajaviŭ, što adkaža na telefanavańnie Uładzimira Pucina, kali ŭ prezidenta Rasii buduć «surjoznyja prapanovy» nakont ustalavańnia miru va Ukrainie. Pra heta jon skazaŭ na pres-kanfierencyi pa vynikach samitu lidaraŭ Jeŭrasajuza ŭ Brusieli, piša «Mieduza».
«Ja nie mianiaŭ svoj numar [telefona]», — skazaŭ Makron.
Tak jon prakamientavaŭ słovy prezidenta Rasii na pramoj linii pra toje, što Makron pierastaŭ ź im kamunikavać.
Francuzski lidar adznačyŭ, što heta nie jon raźviazaŭ vajnu, «parušajučy damovy», i heta nie Francyja «ździajśniała vajennyja złačynstvy va Ukrainie, što robić praktyčna niemahčymym dyjałoh».
«Kali ŭ prezidenta Pucina jość žadańnie da dyjałohu i surjoznyja prapanovy pa prasoŭvańni napierad, vychadu z kanfliktu [va Ukrainie] i pabudovie tryvałaha miru, heta značyć z pavahaj da mižnarodnaha prava i, takim čynam, da intaresaŭ i suvierenitetu Ukrainy, ja prymu telefanavańnie», — zajaviŭ prezident Francyi.
Padčas pramoj linii 14 śniežnia Uładzimir Pucin zajaviŭ, što hatovy da kantaktaŭ z Makronam, ale adnosiny z Francyjaj byli spynienyja pa inicyjatyvie jaje prezidenta. Sa słoŭ Pucina, jon «nie ŭchilajecca ad hetych kantaktaŭ», ale kali Makron nie žadaje razmaŭlać.
«U nas byli dastatkova dobryja pracoŭnyja adnosiny. Ja, jak vy viedajecie, u Francyi byvaŭ, spadar Makron pryjazdžaŭ u Rasiju. Ale ź niejkaha momantu prezident Francyi spyniŭ z nami kamunikacyju. Nie my ž spynili, nie ja ž spyniŭ. Heta jon spyniŭ. Kali jość cikavaść — kali łaska, my hatovyja», — skazaŭ Pucin.
Makron — adzin z hałoŭnych suśvietnych lidaraŭ, chto sprabavaŭ vieści pieramovy z Uładzimiram Pucinym pierad vajnoj va Ukrainie i paśla jaje pačatku.
Ciapier čytajuć
Što viadoma pra viciebčuka, jakoha vinavaciać u sprobie padryvu samalota ŭ Hiermanii15
Kamientary