Tvorča adoranyja «sapraŭdnyja dziaržaŭniki», jakija malujuć palityčnyja karykatury. Takija ludzi majuć prynieści roskvit dziaržaŭnym ŚMI
Padčas vystupleńnia na pasiadžeńni kalehii Mininfarma vice-premjer Ihar Pietryšenka vykłaŭ svaje dumki na viečnuju i balučuju dla łukašenkaŭskich čynoŭnikaŭ temu — jak choć trochi palepšyć jakaść dziaržaŭnych ŚMI, kab jany stali sapraŭdy efiektyŭnym instrumientam prapahandy. Prapanavanyja miery, treba dumać, adlustroŭvajuć nie tolki jahonaje asabistaje bačańnie.
«Paŭnavartasnaha ŭkamplektavańnia redakcyj kvalifikavanymi kadrami pa-raniejšamu dasiahnuć pakul nie ŭdajecca. U asobnych vypadkach adznačajecca nizki prafiesijny ŭzrovień žurnalistaŭ, asabliva ŭ rehijanalnych ŚMI. Niahledziačy na štohadovy vypusk VNU našaj krainy maładych śpiecyjalistaŭ, u niekatorych redakcyjach vakantnyja pasady nie zapaŭniajucca doŭhi čas», — skazaŭ Pietryšenka.
Vyrašeńnie kadravaj prablemy bačycca čynoŭniku ŭ zvyčajnaj dla biełaruskich uładaŭ paradyhmie:
«Siońnia lubaja arhanizacyja moža padabrać i nakiravać vypusknika pa metavym nakiravańni na navučańnie ŭ VNU. Treba maksimalna vykarystoŭvać hetuju mahčymaść dla taho, kab pryciahnuć da pracy ŭ rehijanalnych redakcyjach tvorča adoranych, a hałoŭnaje — matyvavanych maładych ludziej.
Ale i heta jašče nie aznačaje aŭtamatyčnaje atrymańnie arhanizacyjaj metavika. Tamu zasnavalniki rehijanalnych vydańniaŭ i redakcyi pavinny samym surjoznym čynam stavicca da padboru kandydatur dla takoha navučańnia, prafaryjentacyjnaj pracy z vypusknikami škoł i abituryjentami».
Biada tolki, što tvorčaja adoranaść i matyvavanaść maładych ludziej moža nie supaści ź inšymi absalutna abaviazkovymi patrabavańniami da kadraŭ:
«Jašče adzin važny aśpiekt pracy z kadrami — heta asobasnyja charaktarystyki kadravaha składu redakcyj. Pry pryznačeńni na pasady nieabchodna pryncypova padychodzić da acenki kožnaj kandydatury. Heta pavinny być nie tolki vysokaprafiesijnyja śpiecyjalisty, ale ŭ pieršuju čarhu sapraŭdnyja dziaržaŭniki, patryjoty svajoj krainy.
Taki padychod pavinien dziejničać i ŭ dačynieńni da acenki jakaści pracy prafiesarska-vykładčyckaha składu ŭstanoŭ vyšejšaj adukacyi, jakija zabiaśpiečvajuć padrychtoŭku žurnalisckich kadraŭ. Ministerstvu infarmacyi sumiesna ź Ministerstvam adukacyi nieabchodna praciahnuć kanstruktyŭnaje ŭzajemadziejańnie z adpaviednymi VNU pa hetych pytańniach. Tym bolš, dośvied pracy ŭ hetym napramku nazapašany dastatkovy».
A dla palapšeńnia jakaści kantentu dziaržaŭnych ŚMI, na dumku Pietryšenki, im treba šukać novyja formy pracy. I tut jahonaje myśleńnie dastatkova niečakanaje:
«Nieabchodna šukać novyja formy raboty. Jość dobry prykład — nie tolki ŭ centralnych, ale i ŭ rehijanalnych drukavanych ŚMI staŭ paśpiachova adradžacca niezasłužana zabyty žanr karykatury, asabliva na vostryja palityčnyja temy», — skazaŭ Pietryšenka.
Čytajcie taksama:
«Nas nie zapuhať». Voś chto stvaraŭ prałukašenkaŭskija stykierpaki ŭ telehramie
Chto stvaraje dzikija vokładki «Minskaj praŭdy»?
Paśla skandalnaj karykatury «Minskaja praŭda» zastałasia biez hałoŭnaj redaktarki
Udava aktyvista Maksima Čarniaŭskaha raskazała pra jaho pakuty pierad suicydam5
Kamientary