50:0! I heta lik nie rehbijnaha, a futbolnaha matča ŭ biełaruskim čempijanacie
U čempijanacie Biełarusi pa futbole ŭ druhoj lizie adna kamanda zabiła inšaj 50 miačoŭ, sama nie prapuściŭšy nivodnaha, paviedamlaje sajt Bel.Football. U matčy sustrakalisia dźvie kamandy ź Viciebskaj vobłaści: «Miory» na svaim poli prymali «Rasony».
Taki fienamienalny vynik zafiksavany na fonie dziŭnaha supiernictva pamiž kiraŭnictvam Ministerstva sportu i turyzmu (ministram ciapier źjaŭlajecca Siarhiej Kavalčuk) i Biełaruskaj fiederacyi futboła (ABFF) na čale z byłym staršynioj Viciebskaha abłvykankama Mikałajem Šarśniovym, jakoje nie adbyvajecca niedzie kułuarna pad schavanym ad čužych vačej dyvanom, a vyjšła na ŭsieahulny ahlad.
Ministerstva i fiederacyja siarod inšaha nie mohuć razabracca, chto ź ich maje arhanizoŭvać spabornictvy ŭ druhoj futbolnaj lizie i jaki maje być farmat hetaha turniru. Nie pryjšoŭšy da zhody, kožnaja sa struktur sprabuje arhanizavać spabornictvy pad svajoj ehidaj, a kankurentu stavić pałki ŭ koły. Tak, ministerstva 29 krasavika vydała nastupnuju zajavu:
«Paviedamlajem, što zhodna z respublikanskim kalandarnym płanam praviadzieńnia spartyŭnych mierapryjemstvaŭ ABFF nie źjaŭlajecca arhanizataram čempijanatu Respubliki Biełaruś pa futbole 2024 hoda siarod mužčynskich kamand druhoj lihi, pakolki jaho arhanizataram vystupajuć Ministerstva sportu i turyzmu i ŭpaŭnavažanyja im arhanizacyi. Praviadzieńnie ABFF anałahičnaha mierapryjemstva źjaŭlajecca niedapuščalnym i vychodzić za ramki jaje paŭnamoctvaŭ».
Tym nie mienš, u kancy minułaha tydnia spabornictvy ŭ druhoj lizie pad ehidaj ABFF usio ž farmalna startavali. Ale pad ciskam ministerstva kamandy ŭ ich admaŭlajucca hulać, tamu na hety momant ź dziesiaci zapłanavanych matčaŭ adbyŭsia tolki adzin. A «pryhožy» vynik 50:0 zafiksavany ŭ alternatyŭnym turniry, jaki sprabuje zładzić ministerstva.
3 maja ABFF raspaŭsiudziła pres-reliz, zhodna ź jakim usie hulni druhoha tura pieranosiacca na bolš poźni termin. A ŭ najbližejšy paniadziełak maje adbycca pazačarhovaje pasiadžeńnie vykankama ABFF pa pytańni farmatu druhoj lihi. U naradzie voźmuć udzieł i pradstaŭniki Minsportu. Mahčyma, paśla taho baki dojduć da niejkaj zhody.
Choć pytańnie praviadzieńnia čempijanatu ŭ druhoj lizie — nie adzinaje, jakoje vyklikaje roznahałośsi. Taksama baki abvinavačvajuć adzin adnaho ŭ finansavych prablemach kłubaŭ.
Ciapier čytajuć
«Ja skazaŭ na videa, što mianie nie katujuć — na toj momant heta było praŭdaj. A paśla mianie bili dźvie hadziny». Ukrainski žurnalist dva hady pravioŭ u rasijskim pałonie — voś što jon pieražyŭ1
Kamientary