Statkievič: Ukraina moža adkazać «brudnaj bombaj» na rasijski jadzierny ŭdar

«Pamiž RF dy Ukrainaj idzie honka ŭzbrajeńniaŭ, važnaja častka jakoj — spabornictva ŭ efiektyŭnaści srodkaŭ pavietranaha napadu (SPN). Pieravažna, heta spabornictva tyčycca dronaŭ dy balistyčnych rakiet», — piša palityk.

Dziakujučy hnutkaj i efiektyŭnaj abaronnaj pramysłovaści dy bieśpieraškodnamu dostupu da mižnarodnaha rynku kampanientaŭ, a taksama, mahčymaści vykarystańnia dla naviadzieńnia kaśmičnaj spadarožnikavaj sietki «Starlink», u honcy dronaŭ pieravahu maje Ukraina. Dumaju, što jaje pieravaha ŭ dalnabojnych udarach dronami jašče bolš uzmocnicca, kali ŭkraincy, u adpaviednaści z łohikaj raźvićcia SPN, niepaźbiežna dojduć da vykarystańnia ŭ hetych udarach amierykanskaha dośviedu praryvu mocnaj supraćpavietranaj abarony.

Naprykład, jak u Chanoi padčas vjetnamskaj vajny. Kali bolš kankretna — funkcyjanalnaha ešałanavańnia hrupoŭki pavietranaha ŭdaru i pahłybleńnia śpiecyjalizacyi jaje elemientaŭ.

U honcy balistyčnych rakiet, jakija majuć na paradak bolšyja, čym u dronaŭ, naboj i chutkaść, dziakujučy nazapašanamu savieckamu dośviedu i zachavanaj vytvorčaj bazie, vidavočnuju pieravahu maje Rasija. Ale Ukraina ŭžo pačała vypraboŭvać ułasnyja balistyčnyja rakiety. Uličvajučy dośvied i mahčymaści ŭkrainskaj vajennaj pramysłovaści, možna prahnazavać, što da kanca hoda abmieny ŭdarami balistyčnych rakiet pamiž praciŭnikami stanuć blizkimi da parytetu.

Kali Ukraina prademanstruje svaje balistyčnyja mahčymaści adrazu ŭ zanadta vialikich maštabach, to heta stanie šokam dla rasijskaha hramadstva. Mohuć pašyrycca patrabavańni ŭžyvańnia suprać Ukrainy jadziernaj zbroi ad ludziej, jakija nie razumiejuć realnych nastupstvaŭ takoha kroku, u tym liku, i dla Rasii. Bo navat tolki adna Ukraina, biez zachodnich sajuźnikaŭ, zdolnaja na, chaj asimietryčny, ale jadzierny adkaz.

Ja maju na ŭvazie, h. zv., «brudnuju bombu», kali nad terytoryjaj praciŭnika z dapamohaj zvyčajnaha zaradu, naprykład, avijabombaŭ ci rakiet, raspylvajucca radyjoaktyŭnyja rečyvy, jakich va Ukrainy, dziakujučy najaŭnaści atamnych elektrastancyj, dastatkova. A z dapamohaj ułasnych balistyčnych rakiet arhanizavać taki adkaz na rasijski jadzierny ŭdar — całkam vyrašalnaja zadača. Haračym hałovam siarod rasijskich palitykaŭ i publicystaŭ varta razumieć, što jadzierny ŭdar, naprykład, pa Kijevie, moža vyklikać u adkaz radyjoaktyŭnaje zaražeńnie, znoŭ ža naprykład, Maskvy ci Sankt-Pieciarburha.

Mnie vielmi padabajecca Kijeŭ, padabaŭsia i Sankt-Pieciarburh. Nie chaciełasia b, kab hetyja harady stali nieprydatnymi dla žyćcia.

Tym bolej nie chaciełasia b, kab rasijski jadzierny ŭdar adbyŭsia ź Biełarusi, naprykład, rasijskimi rakietami «Iskander» ź jadziernymi bojehałoŭkami z rajonu Asipovičaŭ. Kab Biełaruś u adkaz atrymała jašče adzin radyjacyjny ŭdar, tolki ŭžo nie pa ŭskrainie krainy, jak u 1986 hodzie, a, naprykład, pa našaj stalicy. Liču, što adnaho Čarnobyla nam i tak chapiła.

Hulacca jadziernaj zbrojaj — śmiarotna niebiaśpiečnaje varjactva. Dazvalać čužoj dziaržavie hulacca svajoj jadziernaj zbrojaj na našaj ziamli — heta ŭžo varjactva z suicydalnymi schilnaściami, apraŭdać jakoje niemahčyma nijakimi racyjanalnymi arhumientami.

Nielha dapuskać, kab na biełaruskaj ziamli raźmiaščałasia čužaja jadziernaja zbroja. Tym bolej, kab jana vykarystoŭvałasia adsiul suprać inšych krain. Biełaruś pavinna być niejtralnaj i biaźjadziernaj. Dla biełarusaŭ heta ŭžo ŭmova žyćcia ci śmierci», — napisaŭ Mikałaj Statkievič

• 15
• 0
• 0
• 1
• 0
• 0
• 0
• 0