Pažar u niebiaśpiečnaj blizkaści ad Paryža: na tušeńnie lesu Fantenbło nakiravali samaloty
Na poŭdzień ad francuzskaj stalicy bušuje bujny lasny pažar, jaki ŭłady acharaktaryzavali jak niebiaśpiečny i vyklučnaha maštabu. Dla tušeńnia pažaru ŭ lesie Fantenbło terminova nakiravali dva pažarnyja samaloty, piša Bi-bi-si.
Napiaredadni Dnia ŭziaćcia Bastylii — nacyjanalnaha śviata i vychadnoha dnia ŭ Francyi — pažar surjozna paŭpłyvaŭ na transpartnyja znosiny. Častkova pierakryta hałoŭnaja aŭtamahistral krainy, jakaja złučaje poŭnač i poŭdzień, a raniej ahoń zabłakavaŭ i aŭtamahistral, što viadzie na ŭschod ad Paryža.
Parušany taksama ruch na vysakachutkasnaj čyhunačnaj linii na poŭdzień Francyi.
Jak paviedamiła francuzskaja čyhunačnaja kampanija SNCF, u niadzielu ŭviečary ciahniki, jakija prybyvali na Lijonski vakzał u Paryžy abo adpraŭlalisia ź jaho, zatrymlivalisia da šaści hadzin.
Les Fantenbło znachodzicca prykładna za 60 kiłamietraŭ na paŭdniovy ŭschod ad Paryža. Ranicaj u paniadziełak ułady paviedamili, što ahoń chutka raspaŭsiudziŭsia ŭžo na 800 hiektaraŭ, i płošča pažaru praciahvaje pavialičvacca.
Zaraz u Paryžskim rehijonie staić haračaje i suchoje nadvorje — rehijon pieražyvaje ŭžo treciuju chvalu śpioki.
Papiaredniaja chvala śpioki ŭ Francyi prymusiła časova spynić pracu troch atamnych elektrastancyj, kab paźbiehnuć skidu ciopłaj achaładžalnaj vady ŭ pierahretyja vadajomy.
Arhanizatary viełahonki «Tur de Frans» praz sarakahradusnuju śpioku skaracili niadzielny etap na 30 kiłamietraŭ.
Kamientary