Na dziaržaŭnym telebačańni pakazali siužet pra zbyt miasa z žyviolnych mohilnikaŭ
Tuchłaje miasa «reanimavali» i pradavali praz kramy.
Telekanał ANT pakazaŭ siužet pra biznes na miasie z žyviolnych mohilnikaŭ, pra jaki ŭ minułym miesiacy zhadvaŭ Łukašenka. U materyjale paviedamili, što HUBAZiK zatrymaŭ udzielnikaŭ złačynnaj hrupy, jakija adkopvali ŭ žyviolnych mohilnikach tušy zahinułych žyvioł, raźbirali ich i admyvali miasa myjnym srodkam.
Śćviardžajecca, što kradziažom zajmalisia ludzi, raniej sudzimyja za kradziež bujnoj rahataj žyvioły na terytoryi Minskaj, Mahiloŭskaj i Homielskaj abłaściej. Za miescami zdabyčy jany sačyli z dapamohaj fotapastak i, kali było biaśpiečna, pryjazdžali na raźbirańnie.
Aŭtary zajaŭlajuć, što miasa pa złačynnym łancuhu pastupała na pryłaŭki kramaŭ. Pierad prodažam jaho «reanimavali», dla aptovych prodažaŭ, źmiešvajučy z dobraj pradukcyjaj, pastaŭki išli ŭ tym liku i ŭ Rasiju.
Pavodle infarmacyi namieśnika načalnika adździeła pa rasśledavańni złačynstvaŭ suprać ułasnaści USK pa Minskaj vobłaści Paŭła Hryšaleviča, u štacie vytvorčaha cecha pryvatnaha pradpryjemstva mielisia svaje vieterynarny ŭrač i technołah. U siužecie pradstaŭleny zapis, dzie, jak śćviardžajecca, technołah raić pramyć tušy sodaj abo srodkam dla posudu Fairy.
«Hety paŭfabrykat jałavičny źjaŭlajecca niaśviežym i maje prykmiety psavańnia. Heta śviedčyć pra toje, što hetaje miasa atrymana ad žyvioł chvorych, źniasilenych albo zabitych u stanie ahonii, što zabaroniena vieterynarna-sanitarnymi praviłami. Vyjaŭlenyja bakteryja rodu Salmonella i bakteryi hrupy kišačnaj pałački, što źjaŭlajecca niebiaśpiečnym dla ŭžyvańnia jak ježy ludźmi», — kaža ŭ siužecie dyrektar Minskaj abłasnoj vieterynarnaj łabaratoryi Ivan Pyrcak.
Śćviardžajecca, što zatrymanyja ŭsie asnoŭnyja fihuranty biznesu.
«Usim — ad «raźbiralnikaŭ» da pradaŭcoŭ pahražaje da 10 hadoŭ pazbaŭleńnia voli», — kaža hołas za kadram.
U siužecie taksama zajavili, što vyjaŭlena i ŭtojvańnie padziažu ŭ niekatorych haspadarkach, ź jakim taksama raźbirajucca.
Nahadajem, na naradzie ab raźvićci APK u krasaviku Alaksandr Łukašenka apisaŭ žudasny vypadak u Lubani Minskaj vobłaści, dzie, pavodle jaho słoŭ, nasielnictvu pradavałasia «miasa» z žyviolnych mohilnikaŭ.
«Nie viedaju navat, jak nazvać hetych ludziej, dajšli da taho, što kanfiskoŭvali z žyviolnych mohilnikaŭ tušy paŭšaj bujnoj rahataj žyvioły, raźbirali ich i pradavali hetaje miasa (u dvukośsiach) nasielnictvu. Paviedamicie, jakija miery pryniatyja. Pryčym hetym śviatatactvam zajmalisia i vieterynarnyja ŭračy, i bryhadziry sielhasarhanizacyj troch rajonaŭ Minskaj vobłaści (Lubań, Asipovičy, Staryja Darohi)», — zajaŭlaŭ jon.
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»1
Kamientary