На дзяржаўным тэлебачанні паказалі сюжэт пра збыт мяса з жывёльных могільнікаў
Тухлае мяса «рэанімавалі» і прадавалі праз крамы.
Тэлеканал АНТ паказаў сюжэт пра бізнэс на мясе з жывёльных могільнікаў, пра які ў мінулым месяцы згадваў Лукашэнка. У матэрыяле паведамілі, што ГУБАЗіК затрымаў удзельнікаў злачыннай групы, якія адкопвалі ў жывёльных могільніках тушы загінулых жывёл, разбіралі іх і адмывалі мяса мыйным сродкам.
Сцвярджаецца, што крадзяжом займаліся людзі, раней судзімыя за крадзеж буйной рагатай жывёлы на тэрыторыі Мінскай, Магілёўскай і Гомельскай абласцей. За месцамі здабычы яны сачылі з дапамогай фотапастак і, калі было бяспечна, прыязджалі на разбіранне.
Аўтары заяўляюць, што мяса па злачынным ланцугу паступала на прылаўкі крамаў. Перад продажам яго «рэанімавалі», для аптовых продажаў, змешваючы з добрай прадукцыяй, пастаўкі ішлі ў тым ліку і ў Расію.
Паводле інфармацыі намесніка начальніка аддзела па расследаванні злачынстваў супраць уласнасці УСК па Мінскай вобласці Паўла Грышалевіча, у штаце вытворчага цэха прыватнага прадпрыемства меліся свае ветэрынарны ўрач і тэхнолаг. У сюжэце прадстаўлены запіс, дзе, як сцвярджаецца, тэхнолаг раіць прамыць тушы содай або сродкам для посуду Fairy.
«Гэты паўфабрыкат ялавічны з'яўляецца нясвежым і мае прыкметы псавання. Гэта сведчыць пра тое, што гэтае мяса атрымана ад жывёл хворых, знясіленых альбо забітых у стане агоніі, што забаронена ветэрынарна-санітарнымі правіламі. Выяўленыя бактэрыя роду Salmonella і бактэрыі групы кішачнай палачкі, што з'яўляецца небяспечным для ўжывання як ежы людзьмі», — кажа ў сюжэце дырэктар Мінскай абласной ветэрынарнай лабараторыі Іван Пырцак.
Сцвярджаецца, што затрыманыя ўсе асноўныя фігуранты бізнэсу.
«Усім — ад «разбіральнікаў» да прадаўцоў пагражае да 10 гадоў пазбаўлення волі», — кажа голас за кадрам.
У сюжэце таксама заявілі, што выяўлена і ўтойванне падзяжу ў некаторых гаспадарках, з якім таксама разбіраюцца.
Нагадаем, на нарадзе аб развіцці АПК у красавіку Аляксандр Лукашэнка апісаў жудасны выпадак у Любані Мінскай вобласці, дзе, паводле яго слоў, насельніцтву прадавалася «мяса» з жывёльных могільнікаў.
«Не ведаю нават, як назваць гэтых людзей, дайшлі да таго, што канфіскоўвалі з жывёльных могільнікаў тушы паўшай буйной рагатай жывёлы, разбіралі іх і прадавалі гэтае мяса (у двукоссях) насельніцтву. Паведаміце, якія меры прынятыя. Прычым гэтым святатацтвам займаліся і ветэрынарныя ўрачы, і брыгадзіры сельгасарганізацый трох раёнаў Мінскай вобласці (Любань, Асіповічы, Старыя Дарогі)», — заяўляў ён.
Прапагандысты запэўніваюць, што 196 палітвязняў ужо на свабодзе9
Каментары