ZŠA i Izrail nanosiać masiravanyja rakietnyja ŭdary pa Iranie
Pieršaja chvala ŭdaraŭ nanosiłasia pa abjektach supraćpavietranaj abarony i miescach bazavańnia rakiet. Udary taksama byli skiravanyja ŭ miescy znachodžańnia kiraŭnictva Irana, u tym liku ajatały Chamienei.
«Dziaržava Izrail naniesła papieradžalny ŭdar pa Iranie, kab likvidavać pahrozy ŭ dačynieńni da našaj krainy», — skazaŭ jon.
Kac adznačyŭ, što ŭ najbližejšy čas čakajecca ŭdar u adkaz pa Izraili, tamu ŭ krainie abvieščana nadzvyčajnaje stanovišča.
U Tehieranie prahrymieŭ vybuch, u nieba ŭźniaŭsia husty słup dymu.
Taksama CACHAŁ nanios sieryju ŭdaraŭ pa pazicyjach Chiezbały ŭ Livanie. U pieršuju čarhu pad udarami apynulisia rakietnyja ŭstanoŭki i składy sa zbrojaj.
https://t.me/nashaniva/112267
09:54
Izrailski Channel 12 sa spasyłkaj na krynicu piša, što ataku Izrail pravodzić sumiesna z ZŠA. Aficyjna ŭdzieł ZŠA pakul nie paćvierdžany.
Viarchoŭnaha lidara Irana Ali Chamieniei niama ŭ stalicy Irana Tehieranie — jon pieraviedzieny ŭ biaśpiečnaje miesca, paviedamiŭ aficyjny pradstaŭnik Reuters.
U centry Tehierana čuvać vybuchi, ludzi ŭ panicy ŭciakajuć.
09:57
Apieracyja płanavałasia niekalki miesiacaŭ, a data jaje pačatku była vyznačana niekalki tydniaŭ tamu, zajaviŭ pradstaŭnik Minabarony Izraila
10:02
Novymi ŭdarami Izraila pa Iranie padvierhlisia rezidencyja prezidenta, štab raźviedki Korpus vartavych Isłamskaj revalucyi i aeraport u Tehieranie
Viarchoŭny lidar Irana Ali Chamieniei adsutničaje ŭ stalicy — jon pieraviedzieny ŭ biaśpiečnaje miesca, paviedamlaje Reuters spasyłkaj na aficyjnaha pradstaŭnika iranskich uładaŭ.
10:07
U Tehieranie adklučyli suviaź i internet
Na dadzieny momant było atakavana kala 30 celaŭ.
Va ŭschodniaj i zachodniaj častkach stalicy Irana — Tehieranie — byli adklučany linii mabilnaj suviazi, u niekatorych rajonach asłablena padklučeńnie da internetu.
10:15
Udary naniesieny nie tolki pa Tehieranie. Vybuchi čuvać u haradach Kum, Isfachan (tam znachodzicca bujny zavod pa vytvorčaści bojeprypasaŭ Ministerstva abarony Irana), Kieriedž, Kiermanšach i Tebryz.
10:24
Tehieran rychtujecca da mier u adkaz, adkaz budzie razburalnym, zajaviŭ iranski čynoŭnik Reuters
Jak śćviardžaje The New York Times, udary Izraila i ZŠA pa Iranie adbylisia paśla taho, jak Donald Tramp rasčaravaŭsia ŭ pieramovach pa jadziernaj prahramie.
10:33
Mahčyma, razburana rezidencyja ajatały Ali Chamieniei
Ale sam viarchoŭny lidar Irana pieraviedzieny ŭ biaśpiečnaje miesca
10:35
Izrail i ZŠA rychtujucca da šmatdzionnaha kanfliktu ź Iranam
Pra heta piša The Times of Israel sa spasyłkaj na pradstaŭnika izrailskaha ŭrada.
Pa jaho słovach, metaj udaraŭ, naniesienych ranicaj 28 lutaha, stali abjekty iranskaha režymu i vajskovyja bazy.
Amierykanski čynoŭnik zajaviŭ televizijnamu kanału «Al-Džazira», što ŭdary nakiravany na padryŭ sistemy biaśpieki Irana.
Jak piša The New York Times, ZŠA nanosiać dziasiatki udaraŭ pa Iranie šturmavikami, jakija raźmieščany na vajskovych bazach pa ŭsim Blizkim Uschodzie.
Pierad atakaj ZŠA značna pavialičyli svaju vajennuju prysutnaść u rehijonie, razharnuŭšy dva avijanoscy, šerah eśmincaŭ i bolš za 50 źniščalnikaŭ.
10:36
Tramp: «My pačali maštabnuju vajennuju apieracyju ŭ Iranie, źniščym pahrozu z boku žorstkaha iranskaha režymu»
11:07
Kiraŭnictva Irana ŭ biaśpiecy
Prezident Masud Piezieškijan nie paciarpieŭ u vyniku atak ZŠA i Izraila, paviedamlaje iranskaje ahienctva Mehr sa spasyłkaj na krynicu.
Viarchoŭny lidar Irana ajatała Ali Chamieniei taksama nie paciarpieŭ — jon znachodzicca ŭ biaśpiečnym miescy za miežami Tehierana, zajaviła Reuters krynica z kiraŭnictva Irana.
11:11
Tramp: My źbirajemsia źniščyć ich rakiety i zraŭniać ich rakietnuju pramysłovaść ź ziamloj
Prezident ZŠA vystupiŭ sa zvarotam nakont ataki na Iran: «My źbirajemsia pierakanacca, što terarystyčnyja maryjanietki ŭ rehijonie bolš nie zmohuć destabilizavać mir».
Tramp u svajoj sacsietcy Truth Social apublikavaŭ zvarot nakont udziełu ZŠA ŭ atacy na Iran:
«Uzbrojenyja siły Złučanych Štataŭ pačali maštabnyja bajavyja dziejańni ŭ Iranie. Naša meta — abaranić amierykanski narod šlacham likvidacyi nieminučych pahroz z boku iranskaha režymu, zahannaj hrupy vielmi žorstkich, žachlivych ludziej. Jaho dziejnaść naŭprost padviarhaje niebiaśpiecy Złučanyja Štaty, našy vojski, našy zamiežnyja bazy i našych sajuźnikaŭ pa ŭsim śviecie.
Na praciahu 47 hadoŭ iranski režym skanduje «Śmierć Amierycy» i vioŭ biaskoncuju kampaniju krovapralićcia i masavych zabojstvaŭ, nakiravanuju suprać Złučanych Štataŭ, našych vojskaŭ i nievinavatych ludziej u mnohich, mnohich krainach.
[…] U apošnija hady maryjanietki režymu praciahvali ździajśniać nieźličonyja ataki na amierykanskija siły, dysłakavanyja na Blizkim Uschodzie, a taksama na vajenna-marskija i kamiercyjnyja sudny ZŠA i mižnarodnyja sudnachodnyja šlachi. Heta byŭ masavy teror, i my bolš nie źbirajemsia z hetym mirycca.
11:35
U Iranie praktyčna całkam adklučany internet
Uzrovień padklučeńnia da sietki składaje ŭsiaho 4% ad zvyčajnaha ŭzroŭniu, paviedamlaje servis manitorynhu błakirovak NetBlocks.
«Incydent adbyvajecca na fonie bajavych apieracyj ZŠA i Izraila i adpaviadaje mieram, jakija prymianialisia padčas minułahodniaj vajny ź Izrailem», — paviedamiŭ servis.
11:39
Premjer Izraila Bińjamin Nietańjahu zapisaŭ videazvarot u suviazi z udaram pa Iranie
Jon zajaviŭ, što Izrail i ZŠA pačali sumiesnuju apieracyju suprać «isnavanaj pahrozy», jakaja zychodzić ad Irana.
Pa jaho słovach, udar pa Iranie moža «stvaryć umovy dla taho, kab mužny iranski narod uziaŭ svoj los u svaje ruki».
12:03
U Jerusalimie prahučali vybuchi na fonie ataki ŭ adkaz Irana, paviedamlajuć The New York Times i Al Jazeera.
Akramia taho, dva novyja vybuchi prahučali ŭ stalicy Irana Tehieranie.
Iran pasprabavaŭ nanieści ŭdary pa amierykanskich bazach u Katarie, AAE i Bachrejnie
12:18
Katar i AAE začynili svajo pavietranaje prastoru. U AAE paviedamlajecca ab udary pa avijabazie Al-Dchafra.
12:22
Iran atakuje amierykanskija abjekty ŭ Iardanii
12:30
Bińjamin Nietańjahu abviaściŭ pra apieracyju «Leŭ, jaki ryčyć» suprać Irana
Zajavu premjera Izrala apublikavała pres-słužba izrailskaha ŭrada.
«Nastupnyja dni apieracyi «Leŭ, jaki ryčyć» patrabujuć ad nas usich ciarplivaści i stojkaści. My budziem stajać razam, zmahacca razam i razam zabiaśpiečym viečnaść Izraila», — padkreśliŭ jon.
Nietańjahu padziakavaŭ prezidentu ZŠA Donaldu Trampu za «histaryčnaje lidarstva» i adznačyŭ, što nielha dazvolić Tehieranu ŭzbroicca jadziernaj zbrojaj, «jakaja dazvoliła b jamu pahražać usiamu čałaviectvu».
12:45
Adnoj z hałoŭnych celaŭ pieršaj chvali ŭdaraŭ pa Iranie byli lidary isłamskaj respubliki
Krynicy NY Times tłumačać, što raźličvali na faktar niečakanaści.
Pavodle zadumy, užo padčas pieršaj chvali ŭdaraŭ pavinny byli być zabityja mnohija vysokapastaŭlenyja iranskija čynoŭniki.
13:18
Jemienskija chusity abviaścili pra adnaŭleńnie ŭdaraŭ pa sudnach ZŠA ŭ Čyrvonym mory
«My asudžajem amierykana-izrailskuju ahresiju suprać Isłamskaj Respubliki Iran, nakiravanuju na źniščeńnie raŭnavahi strymlivańnia. Vykazvajem poŭnuju i niepachisnuju salidarnaść ź Isłamskaj Respublikaj Iran, jaje kiraŭnictvam, uradam i narodam», — havorycca ŭ ich zajavie.
14:22
Pieršy viadomy spadarožnikavy zdymak rezidencyi ajatały Ali Chamieniei ŭ Tehieranie pakazvaje, što niekalki budynkaŭ byli źniščanyja.
Miescaznachodžańnie viarchoŭnaha lidara Irana nieviadomaje.
Hety kompleks zvyčajna vykarystoŭvajecca jak jaho aficyjnaja rezidencyja.
Izrailskija krynicy CNN nazvali mety siońniašnich udaraŭ siarod vysokapastaŭlenych iranskich čynoŭnikaŭ:
- ajatała Ali Chamieniei;
- prezident Masud Piezieškijan;
- načalnik Hienieralnaha štaba ŭzbrojenych sił Abdałrachim Musavi;
- sakratar Rady abarony Ali Šamchani;
- sakratar Rady nacyjanalnaj biaśpieki Ali Łarydžani.
14:40
«My vielmi blizkija da kančatkovaj pieramohi»
Syn apošniaha iranskaha šacha Reza Piechlevi zapisaŭ zvarot.
«Mienavita my, narod Irana, zavieršym hetuju zadaču ŭ hetaj apošniaj bitvie. Čas viarnucca na vulicy nabližajecca», — havorycca ŭ im.
14:46
Izrail apublikavaŭ pieršyja kadry ŭdaraŭ pa Iranie
Jak zajavili ŭ CACHAŁ, u miežach apieracyi vajskoŭcy źniščanyja «sotni iranskich vajennych celaŭ, uklučajučy puskavyja ŭstanoŭki rakiet u zachodnim Iranie».
14:58
40 dziaŭčynak zahinuli ŭ vyniku rakietnaha ŭdaru pa škole na poŭdni Irana
Padčas ranišniaha ŭdaru ZŠA i Izraila pa Iranie adna z rakiet trapiła ŭ pačatkovuju škołu dla dziaŭčynak u horadzie Minab, paviedamlajuć miascovyja ŭłady.
Pavodle papiarednich danych, zahinuła 40 školnic. Razbor zavałaŭ na miescy trahiedyi praciahvajecca.
15:20
AAE i Saudaŭskaja Aravija pryhrazili Iranu adkazam na ŭdary pa ich terytoryi
Tak, Ministerstva abarony Abjadnanych Arabskich Emirataŭ u svajoj aficyjnaj zajavie paviedamiła, što kraina stała abjektam «aburalnaj ataki z vykarystańniem iranskich balistyčnych rakiet».
15:40
Aeraporty Dubaja, što ŭ AAE, prypynili pracu.
16:10
U niebie nad Dubajem prahučała kala piaci vybuchaŭ. Ślady pracy SPA ŭ rajonach Dubai Hills Mall, Dubaj Maryna i nad hałoŭnym haradskim plažam.
Paviedamlajecca, što adnu ź iranskich rakiet źbili prosta nad piacizorkavym hatelem Atlantis The Royal, jaki znachodzicca na štučnym vostravie Palma-Džumiejra.
Druhuju iranskuju rakietu źbili prosta nad samym vysokim u śviecie kołam ahladu «Voka Dubaja», vyšynia jakoha składaje kala 250 mietraŭ. Atrakcyjon raźmieščany na štučnym vostravie Bluewater pobač z rajonam Dubaj Maryna.
17:13
Ministr abarony Irana Amir Nasirzade i kamandzir Korpusa vartavych isłamskaj revalucyi (KVIR) Machamied Pakpur ličacca zahinułymi ŭ vyniku izrailskich napadaŭ, paviedamlaje Reuters sa spasyłkaj na dźvie krynicy, znajomyja z vajennymi apieracyjami Izraila, i adnu rehijanalnuju krynicu.
17:33
Armija abarony Izraila (CACHAŁ) apublikavała novyja videazapisy apieracyi «Ryk lva».
Pavodle zajaŭ izrailskaha boku, na videa pakazana źniščeńnie puskavoj ustanoŭki balistyčnych rakiet na zachadzie Irana ŭ momant jaje padrychtoŭki da zapusku ŭ bok izrailskaj terytoryi.
תיעוד נוסף ממבצע "שאגת הארי"
צה"ל פועל בריכוז מאמץ לסיכול איומים לעבר עורף מדינת ישראל וכן סיכל משגרים רבים שהיו מוכנים לשיגור מיידי לעבר אזרחי מדינת ישראל.
במסגרת תקיפות חיל האוויר במערב איראן, זוהו פעילים מיחידת טילי הקרקע-קרקע של משטר הטרור האיראני מחמשים משגר במערב איראן… pic.twitter.com/X3HUAxcFYH
U CACHAŁ śćviardžajuć, što padčas apieracyi byli niejtralizavanyja «mnostva» puskavych ustanovak, jakija nibyta byli hatovyja da nieadkładnych udaraŭ pa Izraili.
18:03
Armija abarony Izraila ŭ sacsietcy X zajaviła pra zaviaršeńnie maštabnaha ŭdaru pa Iranie.
«Armija abarony Izraila (CACHAŁ) zaviaršyła šyrokamaštabnuju apieracyju pa źniščeńni stratehičnych sistem abarony iranskaha režymu. CACHAŁ nanios udary pa niekalkich stratehičnych sistemach supraćpavietranaj abarony, u tym liku pa sučasnaj sistemie SA-65 u rajonie Kiermanšacha na zachadzie Irana», — havorycca ŭ paviedamleńni izrailskaha abaronnaha viedamstva.
⭕️The IDF completed a broad strike on strategic defense systems of the Iranian regime.
The IDF struck multiple strategic aerial defense systems, including an advanced SA-65 system in the Kermanshah area of western Iran. pic.twitter.com/p3UI3aB50y
18:19
U Dubai paśla iranskaj ataki ŭźnik pažar u rajonie, dzie znachodzicca piacizorkavy hatel Fairmont The Palm.
Jak paviedamlajecca, rakieta ŭpała pobač ź piacizorkavym hatelem Fairmont The Palm u prestyžnym rajonie Pałm-Džumiejra.
Paviedamlajuć, što ŭ vyniku incydentu zaharełasia terytoryja kala hatela.
20:04
Pavodle paviedamleńniaŭ izrailskich ŚMI, rezidencyja viarchoŭnaha lidara Irana Ali Chamienei mocna paciarpieła ŭ vyniku avijaŭdaraŭ, a na terytoryi budynkaŭ bačnyja razbureńni. Sa spadarožnikavaha zdymka vynikaje, što častka zbudavańniaŭ źniščanaja. Pry hetym nieviadoma, dzie znachodziŭsia Chamienei padčas udaraŭ — u rezidencyi ci ŭ inšym miescy ŭ schoviščy.
Pradstaŭniki izrailskich uładaŭ zajavili, što pakul niama dakładnaj infarmacyi pra toje, jakija mienavita kiraŭniki iranskaha režymu mahli zahinuć, i vyśviatleńnie hetych źviestak patrabuje času. Adnačasova niekatoryja izrailskija ŚMI paviedamlajuć pra mahčymuju hibiel Chamienei, spasyłajučysia na ananimnyja krynicy i mierkavańni, što ŭsio bolš prykmiet śviedčać pra jaho likvidacyju.
20:14
Źjaviłasia videa traplańnia iranskaha «Šachieda» ŭ chmaračos u Bachrejnie. MUS krainy zajaviła, što adrazu niekalki žyłych budynkaŭ u stalicy Bachrejna Manamie trapili pad ataku. Praciahvajecca tušeńnie pažaraŭ i vyratavalnyja apieracyi.
Paviedamlajecca, što ŭ atakavanym chmaračosie ŭźnik pažar na vierchnich pavierchach.
Infarmacyi pra achviary i paciarpiełych pakul niama.
U toj ža čas iranskija ŚMI pišuć pra ŭdar pa hałoŭnamu kamandnamu centru VPS ZŠA ŭ Bachrejnie.
20:35
Iranski bieśpiłotnik atakavaŭ mižnarodny aeraport Kuviejta, jość paciarpiełyja, paviedamili va ŭpraŭleńni cyvilnaj avijacyi Kuviejta.
«Bieśpiłotnik atakavaŭ mižnarodny aeraport Kuviejta, u vyniku niekalki supracoŭnikaŭ atrymali lohkija ranieńni, a pasažyrskamu terminału T1 naniesienyja nievialikija materyjalnyja straty», — paviedamiła hazieta The Kuwait Times sa spasyłkaj na pradstaŭnika Hałoŭnaha ŭpraŭleńnia cyvilnaj avijacyi Kuviejta Abdułu ar-Radžy.
Paźniej stała viadoma, što pry hetaj atacy paciarpieli 12 čałaviek.
Taksama paviedamlajecca, što iranski dron nanios udar na avijabazie Ali-As-Salem u Kuviejcie, tam paciarpieli troje vajskoŭcaŭ.
Kamientary
Zaraz Iran trochi adstralaje rakiety, raskryje pazicyi - tady ŭžo ŭstupiać amierykancy.