JESPČ razhladaje skarhu biełaruski, jakuju Litva pazbaviła dazvołu na žycharstva — žančyna 20 hadoŭ pracuje na dziaržaŭnym telebačańni
Jeŭrapiejski sud pa pravach čałavieka pačaŭ razhladać skarhu hramadzianki Biełarusi, jakoj anulavali dazvoł na žycharstva ŭ Litvie praz pracu na dziaržaŭnym TB. Žančyna padała pazoŭ suprać Litvy ŭ suviazi z parušeńniem prava na pryvatnaje i siamiejnaje žyćcio, paviedamlaje LRT.
U vieraśni 2019 hoda žycharka Hrodna vyjšła zamuž za hramadzianina Litvy i žyła na dva harady — u Druskininkai i Hrodnie. U Hrodnie biełaruska 24 hady pracuje zahadčycaj adździeła prodažaŭ i markietynhu ŭ teleradyjokampanii «Hrodna» — heta strukturnaje padraździaleńnie Biełteleradyjokampanii.
Z 2020 hoda Departamient mihracyi vydaŭ žančynie dva časovyja paśviedčańni na prava žycharstva, adnak kali ŭ mai 2023 hoda jana paprasiła zamianić dazvoł na časovaje pražyvańnie na padstavie ŭźjadnańnia siamji, to atrymała admovu.
Litoŭski Departamient mihracyi pryjšoŭ da vysnovy, što intaresy nacyjanalnaj biaśpieki važniejšyja za prava siamji być razam. Łohika litoŭskich uładaŭ była nastupnaj: kali čałaviek bolš za 20 hadoŭ pracuje na dziaržaŭnym TB, jon źjaŭlajecca łajalnym supracoŭnikam sistemy z naładžanymi suviaziami.
Akramia taho, žančynu abvinavacili ŭ padačy Departamientu mihracyi niedakładnych źviestak pra krainy, jakija jana naviedvała abo ŭ jakich žyła ŭ pieryjad dziejańnia paśviedčańnia. Zapaŭniajučy zajavu, žančyna nie ŭkazała, što pieryjadyčna naviedvała Biełaruś.
Joj sa žniŭnia 2023 hoda zabaronieny ŭjezd u Litvu na 2,5 hady.
Biełaruska sprabavała abaranić svaje pravy ŭ litoŭskich sudach, ale ŭsie pracesy prajhrała. Sudździ ŭ Vilni paličyli, što prava na siamiejnaje žyćcio nie parušana, bo muž moža pierajechać da žonki ŭ Biełaruś — maŭlaŭ, nijakich pieraškod dla hetaha niama.
Ciapier hetaja sprava dajšła da JESPČ. Mižnarodnym sudździam treba budzie adkazać na pytańnie, ci była zabarona na ŭjezd zakonnaj.
Pavodle danych Departamienta mihracyi, letaś 1634 hramadzianiny Biełarusi byli pryznanyja patencyjnaj pahrozaj nacyjanalnaj biaśpiecy. Ź ich amal 400 nie atrymali časovyja vidy na žycharstva ŭ Litvie, a pa bolš jak tysiačy raniej pryniatych rašeńniaŭ pazicyja była źmienienaja.
Ciapier čytajuć
Što pościać biełaruskija sielebrycis, jakija apynulisia pad bombami i dronami ŭ krainach Bližniaha Uschodu1
Kamientary
U apošnim zaŭsiody kazali Drushieniki ci Druhzieniki. Druskininkai kazali niejkija abrusiełyja, dla jakich heta było čužoje.