Polskija śpiecsłužby zatrymali dvuch biełarusaŭ — ich vinavaciać u padrychtoŭcy dyviersij pa zadańni Kramla
Jak paviedamlajuć polskija śpiecsłužby i prakuratura, za padrychtoŭku dyviersij i masavych padpałaŭ byli zatrymanyja dva hramadzianiny Biełarusi i adzin hramadzianin Polščy, jakija rabili heta pa zahadzie rasijskaha HRU. ŚMI pryvodziać i niekatoryja detali pra ich asoby.
Jak paviedamlaje polskaje vydańnie «Reč Paspalitaja», dva biełarusy i adzin palak rychtavali masavyja dyviersii i padpały handlovych centraŭ, restaranaŭ i budaŭničych składoŭ u niekalkich bujnych haradach Polščy.
Asnoŭnym zakazčykam dyviersij, pa viersii śledstva, źjaŭlajecca rasijskaje HRU, piša vydańnie.
Pa infarmacyi śledčych, zapłanavanyja padpały byli nakiravanyja na toje, kab vyklikać chaos i strach u Polščy, naniosšy škodu majomaści i ludziam.
Za kožny paškodžany ci źniščany abjekt vykanaŭcam prapanoŭvałasia ŭznaharoda ŭ 10 tysiač jeŭra.
«Adnamu ź biełarusaŭ 37 hadoŭ, a małodšamu 35 hadoŭ. U adnaho ź ich jość biełaruski pašpart, a ŭ inšaha była karta palaka. Abodva žyli ŭ pryharadzie i ŭ samoj Varšavie.
Treci zatrymany, 40-hadovy palak, žyvie ŭ Pamorskim vajavodstvie», — paviedamlaje «Reč Paspalitaja» sa spasyłkaj na krynicy ŭ polskich śpiecsłužbach i prakuratury.
Aryštavanych biełarusaŭ i palaka ŭžo aficyjna abvinavacili «va ŭdziele ŭ arhanizavanaj złačynnaj hrupoŭcy, nakiravanaj na ažyćciaŭleńnie dziejnaści ŭ intaresach zamiežnaj vyviedki suprać Respubliki Polšča» (č. 1 art. 258 KK Polščy), a taksama «va ŭdziele ŭ dziejnaści rasijskaj vyviedki ŭ abmien na abiacańnie atrymać materyjalnuju vyhadu ad dyviersijnych i sabatažnych dziejańniaŭ na terytoryi Polščy» (č. 7 art. 130 KK Polščy).
Sankcyi pa abodvuch artykułach praduhledžvajuć pakarańnie da pažyćciovaha źniavoleńnia.
Ciapier čytajuć
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary