Ci varta ličyć palitviaźniami zatrymanych «siektantaŭ-ekstremistaŭ»? Adkazvaje Leanid Sudalenka
Źjaviłasia videa, jak hubazikaŭcy zatrymlivajuć sa zbrojaj i ščytami 11 čałaviek — heta funkcyjaniery i lidary siekty «RPC — Carskaja impieryja». Zatrymanych abvinavačvajuć u stvareńni ekstremisckaha farmavańnia, i heta pieršy raz, kali palityčny artykuł vykarystoŭvajuć u zusim inšaj śfiery. Spytali ŭ pravaabaroncy Leanida Sudalenki, jak heta razumieć.
Leanid charaktaryzuje padziei vakoł siekty jak elemient pieradvybarčaj začystki:
«Napiaredadni [prezidenckich] vybaraŭ i vybarčaj kampanii ŭłada choča ŭsio kantralavać, a da vybaraŭ zastałosia, kažuć, paŭhoda. U vypadku z tym, što ŭładzie ŭžo padkantrolnaje, jana nie budzie palahčać kantrol. Maju na ŭvazie prasłuchoŭvańnie čynoŭnikaŭ i ŭsich, chto moža bolš-mienš upłyvać na situacyju ŭ krainie — jany ŭsie pad poŭnym kantrolem śpiecsłužbaŭ. A tut źjaŭlajecca siekta, niepadkantrolnaja ŭładzie.
Usio apazicyjnaje pole začyščanaje. Niazhodnyja z uładaj ludzi ŭklučyli mocny režym unutranaj samacenzury i prosta maŭčać, žadajuć pieračakać hety čas. U krainie nadzvyčajnaja situacyja, i jana nie moža doŭha ciahnucca, rana ci pozna ŭ krainu vierniecca zakon i ŭsio budzie pa-inšamu».
Dziaržava, upeŭnieny Sudalenka, hatovaja karać u suviazi z hetym usio toje, što joj niepadkantrolnaje. Jana budzie zahladvać nie tolki ŭ fortki, ale i ŭ zamočnuju adtulinu prostych ludziej, kab viedać, pra što ludzi šepčucca napiaredadni vybaraŭ.
Ci aznačaje heta, što zatrymanyja «carskaimpiercy» — palitviaźni? Leanid kaža, što ŭsio zaležyć ad artykułaŭ, pa jakich asudziać hetych ludziej. Na siońnia ŭ ich dačynieńni raspačatyja kryminałki z abvinavačvańniem u stvareńni ekstremisckaha farmavańnia i va ŭdziele ŭ im. Sudalenka miarkuje, što kali nie vypłyvuć nijakija novyja abstaviny spravy, zatrymanych pryznajuć palitviaźniami. Kali siarod ich jość hramadzianie Rasii, ich pieradaduć u RF. Ale inšaziemnaje hramadzianstva — nie pieraškoda dla taho, kab pryznali palitviaźniem čałavieka, jakoha asudzili ŭ Biełarusi.
Pravaabaronca źviartaje ŭvahu, što členaŭ siekty brali šturmam siłaviki ŭ broniekamizelkach, sa ščytami i zbrojaj. Pry hetym, kali mierkavać pa videa siłavikoŭ, zatrymanyja naŭrad ci stvarali dla ich vialikuju niebiaśpieku:
«Hetym śpiecsłužbam i hubazikam niama čym zajmacca. HUBAZ musić zmahacca z arhanizavanaj złačynnaściu, ale jaje niama. Ludziej zatrymlivajuć z surjoznym uzbrajeńniem, jak asabliva niebiaśpiečnych złačyncaŭ, kab nadać hetamu ŭsiamu vyhlad, byccam hetaja słužba patrebnaja. A nasamreč hetych hubazikaŭ treba raspuskać z-za niepatrebnaści.
Siońnia pryznačyli siektantaŭ być ekstremistami i terarystami, zaŭtra pryznačać kahości inšaha. Vybary ŭ Biełarusi zaŭždy prachodzili ŭ režymie śpiecapieracyi, tym bolš što z 2020 jany pabačyli — adpuskać kantrol nielha. [Hetaja] ŭłada nie moža kiravać inšym šlacham, jak šlacham nahniatańnia strachu ŭ hramadstvie. Bo kali jany nie buduć heta rabić, ludzi pačnuć adčuvać svabodu, a svabodnych ludziej nielha kantralavać».
Čym bližej da vybaraŭ, tym bolš u hramadstvie budzie elemientaŭ začystki, miarkuje Leanid. Heta datyčyć i padobnych historyj:
«Prapahanda časta kaža, što ŭ Biełarusi zastalisia niazhodnyja, schavalisia pad plintusam, dyk buduć ich vyjaŭlać. Kraina viartajecca ŭ horšyja časy, u tatalitarnaje byłoje, kali ludzi admaŭlalisia ad rodnych i nazyvali ich vorahami naroda. Tak i ciapier, historyja paŭtarajecca. Adzin spadzieŭ, što heta doŭha nie praciahniecca, bo nie moža kraina raźvivacca, kali ŭ joj poŭnaje biaźmiežža i nie pracujuć zakony».
«Naša Niva» — bastyjon biełaruščyny
PADTRYMAĆ
Kamientary
Imi " siektantami" pavinny zanimacca " hrinpis" ci " navinki" a nie pravaabaroncy.
Kožny chto tak nia ličyć - pryznaje za dziaržavaj pryvilej pryznačać biasškodnyja dziejańni złačynnymi i nakładać praź biasškodnyja dziejańni restrykcyi.