«Ja ŭ adčai». Biełarus, jakomu Litva nie addaje kupleny aŭtamabil, pačaŭ haładoŭku ŭ Kłajpiedzie

Jak stała viadoma «Biełsatu», mužčyna, jaki znachodzicca ŭ Kłajpiedzie, abvieściŭ haładoŭku 8 vieraśnia. Ryhor Aleksijevič płanuje tryvać stolki, «kolki chopić siłaŭ». Hramadzianin Biełarusi nazyvaje heta akcyjaj suprać błakavańnia ŭ Litvie mašyn, za jakija biełarusy zapłacili, ale vyvieźci ŭ našuju krainu nie mohuć.

«Hetyja aŭtamabili, balšynia ź ich, i moj taksama, byli kuplenyja da ŭviadzieńnia sankcyjaŭ suprać Biełarusi, a mienavita — 1 lipienia 2024 hoda. Toje, što našyja mašyny zatrymanyja, liču aburalnym biezzakońniem. Ja adčajaŭsia znajści raźviazańnie situacyi, ja pabyvaŭ u va ŭsich instancyjach, i adzinym vyjściem baču haładoŭku pratestu», — kaža jon. 

@belarusnovosti Litva nie otdajet biełorusu mašinu #avto #litva #biełaruś #biełaruśnovosti #rastamožka #minsksiejčas #prodažaavto ♬ DESTRUCTION - SCXR SOUL & NONTHENSE

Aleksijevič zapeŭniŭ, što budzie haładać maksimalna doŭha, kolki chopić siłaŭ. 

Biełarus taksama zaklikaŭ da razumieńnia «našych litoŭskich bratoŭ i siaścior» i zajaviŭ, što «takaja palityka hubić davier da Litvy».

«U kłajpiedski port kančatkova pierastanuć prychodzić hruzy, port prychodzić u zaniapad, ludzi stračvajuć pracoŭnyja miescy. Kali łaska, vaźmicie aktyŭny ŭdzieł u našaj akcyi, my vielmi spadziajemsia na vašaje razumieńnie i padtrymańnie», — zaklikaje Ryhor Aleksijevič.

Litva abmiežavała vyvaz aŭtamabilaŭ u Biełaruś, spasyłajučysia na sankcyi, i stała patrabavać bahata roznych dakumientaŭ, u tym liku dekłaracyju vytvorcy, jakaja maje paćvierdzić, što vytvorca viedaje kancavoha pakupnika ŭ treciaj krainie, što pakupnik nie budzie parušać sankcyjaŭ i što ahułam pastaŭkaju mašyny sankcyi nie buduć parušanyja.

Prablemy ŭźnikli i z užyvanymi aŭto sa značnymi defiektami. Takija mašyny nabyvajuć zbolšaha na aŭkcyjonach u ZŠA dziela nastupnaha ramontu i asabistaha vykarystańnia. I dekłaracyju vytvorcy na hetyja aŭtamabili atrymać niemahčyma.

Pavodle nieaficyjnych źviestak, u porcie ŭ Kłajpiedzie zachraśli blizu 4 tysiačaŭ mašynaŭ, što naležać biełarusam. Transpartavyja srodki stajać na płatnaj parkoŭcy, za zachavańnie patrabujuć da 20 jeŭraŭ štodnia.

Hałoŭnaja pretenzija biełarusaŭ da ŭładaŭ Litvy — niemahčymaść zabrać mašyny, kuplenyja da ŭchvaleńnia novych praviłaŭ. Była stvoranaja pietycyja na adras prezidenta susiedniaj krainy, zvarot padpisali bolš za tysiaču asobaŭ. Aŭtary prosiać dazvolić zabrać aŭtamabili, adznačajučy, što «razumiejuć metazhodnaść sankcyjaŭ».

• 3
• 3
• 12
• 3
• 0
• 10
• 3
• 1