Mask pajšoŭ z kozyraŭ: kožny dzień da vybaraŭ budzie razyhryvać miljon dalaraŭ
Iłan Mask paabiacaŭ razyhryvać pa adnym miljonie dalaraŭ kožny dzień da prezidenckich vybaraŭ siarod vybarščykaŭ u Piensilvanii, jakija padpišuć jaho pietycyju ŭ abaronu pieršaj i druhoj papravak da Kanstytucyi ZŠA. Pra heta jon zajaviŭ na pieradvybarnym mierapryjemstvie ŭ štacie Piensilvanija ŭ padtrymku respublikanca Donalda Trampa.
Pietycyja apublikavana na sajcie zasnavanaha Maskam kamiteta America PAC, jaki zajmajecca padtrymkaj Trampa.
U joj vybarščykam prapanujecca padtrymać pieršuju i druhuju papraŭki da amierykanskaj Kanstytucyi — u padtrymku punktaŭ, jakija tyčacca svabody słova i prava na našeńnie zbroi.
«Adna z prablem, ź jakoj my sutykajemsia, palahaje ŭ tym, jak nam danieści da ludziej infarmacyju ab hetaj pietycyi? Bo tradycyjnyja ŚMI nie žadajuć paviedamlać pra heta. Vy viedajecie, nie ŭsie padpisany na [mianie ŭ sacsietcy] X. I ja padumaŭ, jak nam danieści da ludziej infarmacyju ab hetym? Dumaju, hetaja navina vykliča sapraŭdny ažyjataž», — skazaŭ Mask.
Paśla hetaha miljarder abraŭ z zały adnaho z hledačoŭ i ŭručyŭ jamu ček na miljon dalaraŭ, paviedamlaje The Hill.
The Hill adznačaje, što raniej Mask paabiacaŭ vydzialać vybarščykam u «vahalnych» štatach pa 47 dalaraŭ za padpisańnie pietycyi. Dla žycharoŭ Piensilvanii jon pavialičyŭ hetuju sumu da 100 dalaraŭ.
Pavodle The New York Times, fiederalny zakon kvalifikuje jak złačynstva płatu za ŭdzieł u hałasavańni ci rehistracyju dla ŭdziełu ŭ hałasavańni. Adnak płacić vybarščykam za padpisańnie pietycyi nie ličycca parušeńniem zakonu ŭ ZŠA. Akramia taho, tyja, chto padpiša pietycyju, mohuć stać metaj America PAC dla ahitacyi za Trampa.
Vybary prezidenta ZŠA projduć 5 listapada. Piensilvanija — adzin z najvažniejšych štataŭ dla Donalda Trampa i jaho sapiernicy ad Demakratyčnaj partyi Kamały Charys u prezidenckaj honcy, piša «Mieduza».
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie8
Kamientary
jon što - niezaležny mo nat ad hrošaŭ ?