Hubarevič patłumačyŭ, čamu rašyŭ udzielničać u prezidenckich vybarach
Kiraŭnik likvidavanaha ŭładami Ruchu «Za svabodu» i ekśpiert pa rehijanalnym raźvićci Narodnaha antykryzisnaha kiravańnia Juraś Hubarevič paviedamiŭ, što źbirajecca ŭdzielničać u novych prezidenckich vybarach. Jon užo dasłaŭ u CVK zajavu, śpis inicyjatyŭnaj hrupy i inšyja dakumienty, nieabchodnyja dla rehistracyi ŭ jakaści kandydata. Jon raspavioŭ «Našaj Nivie», dziela čaho robić heta, kali inšyja pradstaŭniki apazicyi zaklikajuć ci bajkatavać vybary, ci hałasavać «suprać usich».
Palityk kaža, što ŭdzieł u vybarach — heta najpierš jaho prava jak hramadzianina Biełarusi:
«Ja maju pašpart hramadzianina Respubliki Biełaruś. Usie ŭzrostavyja cenzy mianie nie tyčacca. Maju ŭsie padstavy dziela taho, kab maja zajaŭka na ŭdzieł była zadavolenaja».
Paśla źmienaŭ u Kanstytucyju kandydat u prezidenty pavinien pražyć nie mienš za 20 hadoŭ u Biełarusi niepasredna pierad vybarami i nie mieć DNŽ inšaj krainy. Juraś Hubarevič kaža, što jaho hetyja abmiežavańni nie tyčacca, jon — prosta «časova nie ŭ Biełarusi».
«Na dadzieny momant ja nie maju nijakich vidaŭ na žycharstva. Maje dakumienty ŭ pracesie razhladu, ale rašeńnia niama», — śćviardžaje palityk. «Što tyčycca momantu pra pražyvańnie za miažoj, iznoŭ taki: zakon nie akreślivaje kankretnuju kolkaść dzion ci kolkaść hod, jakija treba pražyć za miažoj, kab hetaje abmiežavańnie pačało dziejničać. Tut taki jurydyčny niuans».
Juraś Hubarevič užo vyłučaŭsia na prezidenckija vybary ŭ 2020 hodzie, ale źniaŭ svaju kandydaturu paśla 15 sutak za «niesankcyjanavanaje pikietavańnie». Z taho momantu represii suprać luboha «inšadumstva» tolki ŭzmacnilisia, usie palityčnyja hulcy, jakija nie vyjechali za miažu, znachodziacca za kratami — jaki tady sens udzielničać u vybarach u takich umovach?
«Adna sprava — słovy, i inšaja — źbirańnie dokazaŭ i faktaŭ. My, kaniečnie, možam aceńvać hetyja vybary jak niedemakratyčnyja, i, chutčej za ŭsio, ź vielizarnaj dolaj vierahodnaści, maja zajaŭka nie budzie zadavolenaja, ale heta krok, jaki dadatkova paćvierdzić, što ŭ siońniašnich umovach kazać pra roŭnyja mahčymaści dla ŭsich kandydataŭ nie prychodzicca.
Tym bolš dla tych, chto pradstaŭlaje adrozny ad aficyjnaha pohlady. Režym zaŭsiody moža skazać: vy navat nie sprabavali, usie, chto chacieŭ zajavicca, zajavilisia i ŭziali ŭdzieł u vybarach, my nikoha nie abmiažoŭvali. Maja zadača — pakazać, ci tak heta nasamreč».
U inicyjatyŭnuju hrupu palityka ŭvajšli ludzi, jakija byli ŭ joj u 2020 hodzie. Pry stanoŭčym vyniku Hubarevič płanuje adpravić zanosić sabranyja podpisy ŭ CVK svaju davieranuju asobu, jak toje robić Łukašenka.
«Tut treba, kab taksama byŭ roŭny padychod da ŭsich kandydataŭ — ja štości nie pamiataju, kab Łukašenka nasiŭ sam svaje dakumienty ŭ CVK».
Kamientary
Apublikujcie śpis inicyjatyŭnaj hrupy Hubareviča. I chto jaho davieranaja asoba, jakaja paniasie sabranyja podpisy ŭ CVK?
A to CVK (a značyć aŭtamatyčna i KDB) viedajuć, chto ŭ śpisie Hubareviča, a narod nie viedaje.
Nie ŭsio napisali. Na sajcie KR paznačana, što jon jašče Namieśnik pradstaŭnika Abjadnanaha Pierachodnaha Kabinieta, adkazny za farmavańnie kadravaha reziervu dla novaj Biełarusi.
Uvachodzić u frakcyju Kaardynacyjnaj Rady - kaalicyja Kamanda Łatuški i Ruch «Za Svabodu».