Rubia — adzin z samych viadomych prychilnikaŭ aktyŭnaj zamiežnaj palityki ZŠA. Jon viadomy rezkaj krytykaj aŭtarytarnych režymaŭ — kitajskaha, iranskaha, kubinskaha.
Abrany prezident ZŠA Donald Tramp maje namier naminavać sienatara ad Fłarydy Marka Rubia na pasadu dziaržaŭnaha sakratara. Pra heta ŭ paniadziełak uviečary paviedamili amierykanskija ŚMI sa spasyłkaj na atačeńnie Donalda Trampa, paviedamlaje Radyjo Svaboda.
53-hadovy Marka Rubia, syn kubinskich imihrantaŭ, adzin z samych viadomych prychilnikaŭ aktyŭnaj zamiežnaj palityki Złučanych Štataŭ. Jon viadomy rezkaj krytykaj aŭtarytarnych režymaŭ — kitajskaha, iranskaha, kubinskaha.
Padčas pieršaha prezidenckaha terminu Donalda Trampa Rubia byŭ adnym ź inicyjataraŭ zakonaprajekta, jaki ŭskładniaje praceduru admovy ZŠA ad členstva ŭ NATO. Heta byŭ adkaz na skieptyčnaje staŭleńnie prezidenta Trampa da NATO. Adnak paśla Rubia vykazvaŭ padobnyja z Donaldam Trampam pohlady pa mižnarodnych pytańniach.
U krasaviku hetaha hoda jon byŭ adnym z 15 sienataraŭ-respublikancaŭ, jakija prahałasavali suprać vydzialeńnia Ukrainie 95-miljardnaha pakieta dapamohi.
U svaich apošnich intervju jon kazaŭ pra toje, što Ukrainie nieabchodna zasiarodzicca na dasiahnieńni damoŭlenaści z Rasijaj, kali navat jano nie pryviadzie da viartańnia ŭsioj akupavanaj Rasijaj ukrainskaj terytoryi. Kanflikt, ź jahonych słoŭ,»nieabchodna zaviaršyć». «Ja nie prychilnik Rasii, ale, na žal, realnaść palahaje ŭ tym, što vajna va Ukrainie skončycca ŭ vyniku mirnaha pahadnieńnia», — kazaŭ Rubin u niadaŭnim intervju telekampanii NBC.
Krynicy haziety New York Times u asiarodździ Trampa padkreślivajuć, što rašeńnie adnosna pryznačeńnia Marka Rubia moža być źmieniena ŭ apošniuju chvilinu.
Raniej u paniadziełak było abvieščana ab tym, što Donald Tramp maje namier pryznačyć na pasadu svajho daradcy pa pytańniach nacyjanalnaj biaśpieki člena Pałaty pradstaŭnikoŭ ad Fłarydy Majkła Uołca, jaki taksama viadomy jak prychilnik rašučaj źniešniaj palityki, asabliva ŭ dačynieńni da Kitaja i Irana.
Uołc, jaki słužyŭ u siłach śpiecyjalnaha pryznačeńnia padčas vajennaj kampanii ŭ Afhanistanie rezka krytykavaŭ rašeńnie administracyi Bajdena ab vyvadzie vojskaŭ z hetaj krainy.
Na pasadu pradstaŭnika ZŠA ŭ AAN Donald Tramp maje namier pryznačyć Eliz Stefanik, jakaja pradstaŭlaje ŭ Pałacie pradstaŭnikoŭ štat Ńju-Jork. Jana hałoŭnym čynam viadomaja svajoj aktyŭnaj padtrymkaj Izraila. Jana zaklikała da» poŭnaj pieraacenki « finansavańnia AAN Złučanymi Štatami i błakavańni srodkaŭ, što vydzialajucca na ahienctva AAN, jakoje pradastaŭlaje humanitarnuju dapamohu palestynskim uciekačam.
Ciapier čytajuć
Statkievič raskazaŭ, jak vyžyvaŭ u źniavoleńni. I čym zajmajecca ciapier1
Kamientary