«Heta prosta cud, što ja palacieła». Pasažyrka samalota z Dubaja stała na bok biełarusaŭ, jakija prosiać kampiensacyju ad apieratara

Raniej turapieratar admoviŭ pasažyru, jaki spaźniŭsia, u kampiensacyi vydatkaŭ na darohu dachaty. Jak vynikaje ź piśmovaha adkazu ad «Rostynha», aŭtobus dastaviŭ turystaŭ za hadzinu i piatnaccać chvilin da vyletu. Hid papiaredziŭ turysta pra mahčymaje spaźnieńnie, ale toj pajšoŭ afarmlać Tax Free, havorycca ŭ liście. Mužčyna heta admaŭlaje: viartańnie padatkaŭ jon nie afarmlaŭ. Pry hetym jon raskazaŭ, što na ŭvachodzie ŭ aeraport patraciŭ čas na abmotku bahažu. Zapeŭnivaje, što heta zaniało ŭsiaho niekalki chvilin.

«Astatnija turysty, jakija taksama jechali na hetym tranśfiery, paśpiachova palacieli», — havorycca ŭ piśmovym adkazie «Rostynh». Turyst byŭ aburany hetaj farmuloŭkaj. Pavodle jaho słoŭ, akramia ich ź siabram na hetym kankretnym tranśfiernym aŭtobusie była ŭsiaho adna turystka, jakaja lacieła ŭ Minsk. Usie astatnija pasažyry nakiroŭvalisia ŭ Kišynioŭ.

Pakolki viersii turapieratara i dvuch siabroŭ-turystaŭ raschodziacca, było cikava vysłuchać treci bok — tuju samuju pasažyrku, jakaja dabirałasia ŭ aeraport tranśfieram ad prymajučaj kampanii Voyage Tours.

Pavialičyć

«My jechali ŭ aeraport biaskonca doŭha»

Alena raskazała, što ŭ toj dzień jaje z hatela zabrali vielmi rana (kala 13:40, a vylataŭ samalot u 18:15).

«Ja jašče ŭ turahienta pytałasia, čamu nas tak rana zabirajuć. Jon skazaŭ: aeraport vialiki, treba, kab vy pryjechali za try hadziny da rejsa. Ja padumała, nu dobra, dziŭna: za try dyk za try. Zabrali vielmi rana mianie, potym jašče niedzie hadziny paŭtary, napeŭna, my jeździli pa inšych hatelach. Usio heta było vielmi marudna, pakul sabrali ŭsich ludziej. Potym my zachraśli ŭ korku. Faktyčna da aeraporta ŭvieś maršrut byŭ u rajonie 10 kiłamietraŭ. Ale jechali my prosta biaskonca doŭha, bolš za dźvie hadziny dabiralisia dakładna. U mianie siabroŭka lacieła ranišnim rejsam, i jana dajechała za 30 chvilin na taksi».

Turystka kaža, što starałasia nie panikavać, bo daviarała turapierataru. Zvyčajna jana padarožničaje samastojna, a hetym razam vyrašyła rassłabicca. Alena paćvierdziła, što ŭ ich aŭtobusie akramia jaje byli ŭsiaho dva turysty, jakija nakiroŭvalisia ŭ Minsk. Astatnija pasažyry vyjšli ŭ inšym terminale.

«Hid skazaŭ «Kišynioŭ onli», ale mahčyma, hetyja mužčyny nie pačuli. Hid addaŭ čamadany, ludzi pajšli ŭ aeraport, i tut hid viartajecca ŭ aŭtobus, bačyć, što ja siadžu adna. Napeŭna, u jaho było ŭ papiercy paznačana, što try čałavieki pavinny jechać u nastupny terminał. Jon za imi pabieh i viarnuŭ ich u aŭtobus. My patracili na heta jašče niedzie chvilin z 5—6.

I tut ja ŭžo pačała chvalavacca, bo razumieła: kali ja nie paśpieju za hadzinu da vyletu [na rehistracyju], u mianie mohuć nie pryniać bahaž. Ale ja heta viedaju, bo pastajanna padarožničaju samastojna. Ludzi, jakija nikoli sami nie lotali, nie abaviazanyja viedać, što pryjom bahažu zakančvajecca čaściej za ŭsio za hadzinu. Znoŭ ža, kali ja prylatała ŭ hety aeraport, ja bačyła, jaki jon vielizarny, i razumieła, što hadzina dla jaho — heta uvohule ništo».

«Ja liču, što viny mužčyn u spaźnieńni niama»

Pavodle słoŭ dziaŭčyny, tranśfier pryvioz turystaŭ u patrebny terminał niedzie za hadzinu dvaccać da vyletu. Alena była ŭžo «na nizkim starcie» i paśpiašałasia da stojek.

«Za mnoj išoŭ hid, jon taksama kudyści lacieŭ u svaim kirunku. Zzadu išli hetyja dvoje mužčyn. Ja im kažu: «A vy nie budziecie śpiašacca? Raju paśpiašacca, bo ŭ nas naohuł niama času». Jany kažuć: «Nam treba aformić Tax Free». Hid bieh za mnoj, i jon jašče tak uśmichnuŭsia i kaža, u ich niama času na Tax Free. Potym jon da ich padyšoŭ, ale mužčyny zastalisia niedzie tam zzadu. Ja razumieła, što jany ŭžo nie palaciać 100%».

Alena kaža, što pa paradzie hida dabiehła da bližejšych stojek rehistracyi ad avijakampanii Emirates. Akazałasia, tam možna było zarehistravacca i na rejs Flydubai. Pierad dziaŭčynaj była nievialikaja čarha, ale jana paprasiła ludziej jaje prapuścić napierad, patłumačyła, što spaźniajecca na samalot. Kali Alena pieradavała svoj pašpart, zastavałasia ŭsiaho paru chvilin da zakryćcia rehistracyi.

«Mnie rabotnica na stojcy prama skazała: kali b vy spaźnilisia na dźvie chviliny, vy b nikudy nie palacieli, prynamsi, z bahažom. To-bok navat kali b hetyja mužčyny nie zatrymalisia na ŭpakoŭcy čamadanaŭ, navat kali b jany biehli śledam za mnoj, ale stajali ŭ čarzie ŭžo paśla mianie, jany b usio adno nikudy nie palacieli z bahažom. Kali b ja nie paprasiła hetych troch čałaviek [u čarzie] mianie prapuścić, ja b taksama nikudy nie palacieła. Heta prosta niejki cud cudoŭny [što ja nie spaźniłasia]».

Alena adznačaje, što navat paśla paśpiachovaj rehistracyi joj pryjšłosia biehčy da hiejtaŭ: aeraport vialiki, i aryjentavacca ŭ im składana. Jana nie paśpieła kupić toje, što płanavała, u kramie duty free, nie paśpieła schadzić u tualet pierad vyletam. U toj dzień jana pieražyła vielmi mocny stres.

«U momancie ja taksama chacieła pisać [pretenziju] turahientu i turapierataru, chacieła vyśvietlić, chto budzie vinavaty, kali nastupnym razam sa mnoj zdarycca takaja situacyja. Ale potym usio heta zabyłasia, zhładziłasia, ja ŭsim raskazała pra hety vypadak i supakoiłasia. Ale kali mnie potym skinuli ludzi spasyłku na vaš artykuł, nanava nachłynuli ŭsie hetyja emocyi. Ja liču, što viny mužčyn u tym, što jany spaźnilisia, niama nijakaj. Kali ty biareš tur, ty raźličvaješ na toje, što ty budzieš spakojny i rassłableny, i nie dumaješ, što tabie pryjdziecca biehčy z chutkaściu śviatła ŭ aeraporcie».

• 5
• 0
• 0
• 0
• 0
• 0
• 0
• 0