Japoniec 26 hadoŭ arandavaŭ kvateru, dzie zabili jaho žonku, kab zachavać dokazy ŭ spadziavańni na novyja technałohii. I ŭrešcie zabojcu znajšli

Jak paviedamlaje South China Morning Post, rasśledavańnie z samaha pačatku było maštabnym: u im udzielničali kala 100 tysiač palicejskich, byli apytanyja 5 tysiač čałaviek. Śledčyja vyjavili, što złačynca pamyła ruku, paranienuju padčas napadu, u rakavinie kvatery. Adnak vyniku heta nie dało.

Śledčyja zmahli vyznačyć tolki ahulnyja prykmiety padazravanaj: žančyna, hrupa kryvi B, rost kala 1,6 mietra, pamier abutku — 24 sm. Palicyja navat abviaściła ŭznaharodu za infarmacyju, ale i heta nie dapamahło.

Muž zahinułaj, Satoru Takaba, pryniaŭ niezvyčajnaje rašeńnie: jon pakinuŭ kvateru ŭ tym vyhladzie, u jakim jana była paśla złačynstva, i praciahvaŭ płacić za jaje arendu. Sam jon razam z synam žyŭ u inšym miescy i bolš nie žaniŭsia.

Paviedamlajecca, što za 26 hadoŭ jon vydatkavaŭ na arendu pustoj kvatery kala 22 miljonaŭ ijen (prykładna 145 tysiač dalaraŭ).

Satoru nie prybiraŭ kroŭ i nie źmianiaŭ ničoha ŭ interjery, spadziejučysia, što kali-niebudź novyja technałohii dapamohuć raskryć złačynstva. Paralelna jon sam sprabavaŭ pryciahnuć uvahu da spravy: razdavaŭ ulotki na vulicach, davaŭ intervju i zaklikaŭ ludziej dzialicca luboj infarmacyjaj.

Pierałom adbyŭsia tolki ŭ 2024 hodzie, kali palicyja adnaviła rasśledavańnie i źviarnuła asablivuju ŭvahu na ludziej z koła znajomych siamji. 30 kastryčnika 2025 hoda złačynca sama zdałasia palicyi.

Pavialičyć

Jak vyśvietliłasia, heta daŭniaja znajomaja Satoru — Kumika Jasufuku, jakoj ciapier 69 hadoŭ. Paviedamlajecca, što žančynu i raniej dapytvali, ale jana admaŭlałasia zdavać kroŭ dla DNK-analizu. Ciapier ža ekśpiertyza pakazała, što DNK, vyjaŭlenaja na miescy złačynstva, supadaje ź jaje. Žančyna była zatrymanaja pa padazreńni ŭ zabojstvie.

Pavodle słoŭ złačyncy, jana doŭhija hady žyła ŭ strachu i tryvozie, ale nie chacieła zdacca, kab nie stvarać prablem svajoj siamji. Tolki paśla taho, jak palicyja znoŭ źviazałasia ź joj, pavodle słoŭ Kumiki, jana była hatovaja da aryštu i vyrašyła pryznacca.

Dla Satoru Takaba imia padazravanaj stała šokam. Akazałasia, što heta jaho byłaja adnakłaśnica, jakaja kaliści była ŭ jaho zakachanaja, ale jon adchiliŭ jaje pačućci.

Pavialičyć

Paśla škoły jany nie padtrymlivali suviazi i ŭpieršyniu za 20 hadoŭ sustrelisia prykładna za piać miesiacaŭ da złačynstva — na sustrečy vypusknikoŭ školnaha tenisnaha kłuba. Jak uzhadvaje Satoru, žančyna kazała, što zamužam: «U mianie ŭsio dobra i z pracaj, i z vychavańniem dziciaci».

Da samoha złačynstva jana nijak nie turbavała siamju mužčyny, tamu Takaba navat nie razhladaŭ jaje jak mahčymuju padazravanuju. Bolš za toje, jon byŭ upeŭnieny, što zabojca daŭno pakinuła horad. Adnak vyśvietliłasia, što ŭsie hetyja hady žančyna žyła niepadalok ad kvatery, jakuju jon praciahvaŭ arandavać.

Pavodle dadzienych śledstva, 13 listapada 1999 hoda Kumika pryjšła da jaho žonki, kab pahavaryć, ale razmova pierarasła ŭ kanflikt, jaki skončyŭsia trahiedyjaj. Susiedzi jašče tady paviedamlali palicyi, što pierad zabojstvam čuli svarki ŭ domie achviary.

Paśla aryštu padazravanaj Takaba pryznaŭ, što jaho nastojlivaść nie była marnaj. I choć praŭda akazałasia niečakanaj i balučaj, jon padkreśliŭ: hałoŭnaje, što spraviadlivaść urešcie ŭziała vierch.

Jak paviedamlaje The Japan Times, 5 sakavika hetaha hoda žančynie było pradjaŭlena abvinavačańnie. Jaje čakaje sud prysiažnych. Paviedamlajecca, što Jasufuku spačatku davała pakazańni, ale paźniej skarystałasia pravam maŭčać, tamu matyŭ złačynstva pakul nie ŭstanoŭleny. Takaba zajaŭlaje, što nie maje nijakaha ŭjaŭleńnia, što mahło padšturchnuć jaho adnakłaśnicu da napadu na jaho žonku.

Psichijatryčnaja ekśpiertyza pakazała, što Jasufuku źjaŭlajecca psichična zdolnaj nieści kryminalnuju adkaznaść.

• 7
• 1
• 0
• 3
• 12
• 12
• 0
• 1