«Adkryła pakiet — u zamovie nie chapała stravy». Biełaruska paspračałasia z fastfud-restaranam
Historyju niaŭdałaj siamiejnaj viačery raskazała Onliner čytačka Kaciaryna: jaje sprečka z adnym z fastfud-restaranaŭ adbyłasia praz apłačanuju stravu, jakoj nie akazałasia ŭ dastaŭlenaj zamovie. Pavodle jaje słoŭ, viarnuć hrošy atrymałasia tolki praź niekalki miesiacaŭ.
Kaciaryna raspaviadaje, što sprečnaja situacyja zdaryłasia 14 vieraśnia 2024 hoda: u toj subotni viečar jana chacieła pravieści čas ź siamjoj, pahladzieć kino i zamović fastfud. Ježu zakazali ŭ KFC — praz dadatak, z samavyvazam z restarana i apłataj anłajn. Ahulnaja suma skłała 70,70 rubla.
— Praz 10 chvilin na elektronnuju poštu pryjšło paviedamleńnie, što zamovu možna zabirać. Za im pajšoŭ syn i viarnuŭsia dadomu. Ja adrazu ž adkryła pakiet i vyjaviła, što ŭ im nie chapała «Baskiet Duet vostry». Heta była strava dla muža, 500 hramaŭ ježy. Ja patelefanavała ŭ słužbu padtrymki, spadziavałasia, što pamyłka chutka vypravicca i syn zmoža zabrać častku zamovy, jakoj nie staje. Pa telefonie mianie zapeŭnili, što praviaduć słužbovuju pravierku i pieratelefanujuć ciaham paŭhadziny, ale za hety čas tak nichto i nie źviazaŭsia. Zamiest taho kab hladzieć kino, daviałosia zajmacca prablemaj ź ježaj. Jašče praz 10 chvilin ja sama pieratelefanavała ŭ słužbu padtrymki — tam skazali, što sa mnoj źviažucca zaŭtra. U vyniku ježa astyła, nastroj sapsavaŭsia, siamiejny adpačynak nie atrymaŭsia.
Na nastupny dzień, pavodle słoŭ Kaciaryny, ź joj tak i nie źviazalisia, a skarhu ŭ mabilnym dadatku praihnaravali. Tady, praz amal miesiac, jana napisała skarhu niepasredna ŭ restaranie. Adkaz pryjšoŭ jašče praź miesiac — z prabačeńniami i kuponam na biaspłatnuju kavu. Ale hrošy za niedastaŭlenuju stravu tak i nie viarnuli.
U siaredzinie listapada Kaciaryna napisała paŭtornuju skarhu, dzie ŭžo patrabavała nie tolki viarnuć 20,40 rubla za «Baskiet Duet», ale i 100 rubloŭ kampiensacyi maralnaj škody za praciahłaje vyrašeńnie pytańnia.
Hrošy ŭsio ž viarnuli
My źviarnulisia pa kamientar u kampaniju «Bieł Fud Siervis», jakaja kiruje restaranami KFC u Biełarusi. Paśla ŭnutranaha rasśledavańnia pradstaŭniki sietki paviedamili:
— My praviali rasśledavańnie i vyjavili, što niapravilna spracavaŭ skrypt koł-centra. Prablemu ŭžo vyrašyli i viarnuli hrošy za zamovu.
Fakt viartańnia srodkaŭ paćvierdziła i Kaciaryna. Pavodle jaje słoŭ, viernutyja byli ŭsie 70,70 rubla, a nie tolki 20,40 rubla za «Baskiet Duet». Akramia taho, u jakaści kampiensacyi joj padaryli niekalki suvieniraŭ: termakubak, butelku dla vady i mazaiku.
Na hety momant pretenzij da restarana ŭ jaje bolš niama.
Ciapier čytajuć
Były biełaruski vajar sutki katavaŭ svajho siabra, a paśla zabiŭ siabie3
Kamientary