550 rubloŭ za adzin artykuł. Kolki prapahandysty ŭ SB zarabili na ačarnieńni Bialackaha, Daškieviča i Zołatavaj
Dniami «Kibierpartyzany» paviedamili pra ŭzłom sajta dziaržaŭnaj haziety «SB. Biełaruś siońnia» i raźmiaścili ŭ sietcy 21 hihabajt infarmacyi, siarod jakoj — danyja karystalnikaŭ i administrataraŭ partała za 2014—2025 hady. «Lusterka» vyvučyła archiŭ i vyjaviła tam infarmacyju pra hanarary prapahandystaŭ za artykuły, jakija ačarniajuć hałoŭnaha redaktara Tut.by Marynu Zołatavu, nobieleŭskaha łaŭreata Alesia Bialackaha i aktyvista Źmitra Daškieviča.
Źviestki ab hanararach u «źlivie» nie poŭnyja. Tam jość šmat zhadak rekłamnych artykułaŭ. Adnak niama ničoha pra vypłaty štatnym prapahandystam, nakštałt Ludmiły Hładkaj. Vierahodna, uzłamanaja baza źmiaščaje danyja tolki pra ludziej, jakija nie źjaŭlajucca pastajannymi supracoŭnikami haziety Administracyi Łukašenki.
Tym nie mienš infarmacyi ab hanararach za prapahandysckija materyjały chapaje. U rejtynh «samych darahich» uvajšli čatyry publikacyi.
Na pieršym miescy — kałonka ahladalnika «SB. Biełaruś siońnia» Andreja Mukavozčyka pa matyvach suda nad hałoŭnym redaktaram Tut.by Marynaj Zołatavaj ad 14 lutaha 2019 hoda. Za jaje prapahandyst atrymaŭ 300 rubloŭ.
Cikava, što ŭ «źlitych» danych hety tekst zhadvajecca jašče dvojčy. Paznačana, što za jaho dadatkova zrabili dźvie vypłaty — 150 i 100 rubloŭ. Ci ŭsio ź ich atrymlivaŭ Mukavozčyk, infarmacyi niama. Tym nie mienš hety materyjał abyšoŭsia redakcyi «SB. Biełaruś siońnia» ŭ 550 rubloŭ, abo 255 dalaraŭ pa aktualnym na toj momant kursie Nacbanka.
Na druhim — manipulatyŭny artykuł ad 25 lipienia 2018 hoda pra Źmitra Daškieviča, adnaho ź lidaraŭ «Maładoha frontu». Tady jon inicyjavaŭ kampaniju pa abaronie ŭročyšča Kurapaty ad budaŭnictva ŭ jaho achoŭnaj zonie biznes-centra. Aŭtar materyjału nie paznačany, jon padpisany adździełam žurnalisckich rasśledavańniaŭ prapahandysckaha vydańnia. Za jaho redakcyja zapłaciła 200 rubloŭ, abo 101 dalar na toj momant.
Treciaje miesca ŭ jašče adnoj kałonki Andreja Mukavozčyka pra sud nad Marynaj Zołatavaj u 2019 hodzie. Za jaho adyjozny prapahandyst atrymaŭ 150 rubloŭ (kala 70 dalaraŭ).
Zamykaje rejtynh sudovy repartaž ad 3 sakavika 2023 hoda. U im eks-pravaabaronca, a ciapier aŭtarka prapahandysckaha vydańnia Alena Krasoŭskaja raspaviadaje pra prysud pravaabaroncam centra «Viasna» Alesiu Bialackamu, Valancinu Stefanoviču, Dźmitryju Sałaŭjovu i Uładzimiru Łabkoviču. Artykuł Krasoŭskaj kaštavaŭ 133 rubli, abo kala 47 dalaraŭ na toj dzień.
Ciapier čytajuć
Chto toj redaktar biełaruskaj Vikipiedyi, jakoha pasadzili na dva hady za «dyskredytacyju Biełarusi»6
Kamientary