Na sindrom paślaarhazmavaha niedamahańnia pakutuje kala 50 mužčyn u śviecie. Što jany adčuvajuć?
Historyju 22-hadovaha mužčyny ź Izraila, jaki z 14-hadovaha ŭzrostu pakutavaŭ na redkuju chvarobu, raskazała vydańnie DailyMail. Kožny raz paśla ejakulacyi małady čałaviek adčuvaŭ dzikuju stomu, boli ŭ myšcach, ślozaciačeńnie i stan, kali mozh nie pracuje. Simptomy zachoŭvalisia niekalki hadzin ci niekalki dzion paśla seksu, masturbacyi i navat paśla načnych palucyj.
Dziŭnaje zachvorvańnie ŭskładniła jaho žyćcio, jon bajaŭsia intymnych adnosin. Paśla doŭhich hadoŭ pakut ad depresii i tryvožnaści jon źviarnuŭsia da daktaroŭ, kab vyśvietlić, što moža być pryčynaj jaho stanu.
Śpiecyjalisty vyznačyli, što mužčyna maje vielmi redkaje zachvorvańnie, na jakoje pakutuje prykładna adzin na 100 miljonaŭ mužčyn — sindrom postarhaźmičnaha niedamahańnia (postorgasmic illness syndrome — POIS).
Hetaje zachvorvańnie ŭpieršyniu apisaŭ niderłandski nieŭrapsichijatr Marsiel Valdynhier (Marcel Waldinger) u 2002 hodzie i vyznačyŭ kryteryi dyjahnostyki. Da ich adnosiacca hrypapadobnyja simptomy, jakija ŭźnikajuć pa mienšaj miery paśla dzieviaci ź dziesiaci ejakulacyj na praciahu niekalkich chvilin abo hadzin, doŭžacca ad dvuch da siami dzion i sami saboju spyniajucca.
Bolšaść pacyjentaŭ adčuvajuć stomlenaść i boli, ale ŭ niekatorych raźvivajucca surjoznyja simptomy, takija jak tachikardyja ci parušeńni maŭleńnia.
U niekatorych mužčyn POIS pačynaje prajaŭlacca ŭ pieryjad pałavoha vyśpiavańnia, u inšych — paźniej. Zafiksavany vypadak jaho prajaŭleńnia praz 20 hadoŭ paśla pałavoha vyśpiavańnia. U adnych pacyjentaŭ sindrom uźnik «imhnienna» na praciahu sutak, u inšych raźvivaŭsia pastupova na praciahu ad paŭhoda da hoda.
Dakładnaja pryčyna POIS nieviadomaja. Niekatoryja miarkujuć, što jon vyklikany aŭtaimunnaj reakcyjaj arhanizma, kali jon pamyłkova ŭsprymaje ŭłasnuju śpiermu jak pahrozu i vypracoŭvaje antycieły suprać jaje. Heta moža vyklikać zapalenčuju abo alerhičnuju reakcyju.
Inšyja padazrajuć, što pryčyna ŭ harmanalnym dysbałansie, naprykład, parušeńni ŭ pracy testasteronu abo inšych niejramiedyjataraŭ. Taksama mahčymyja i inšyja pryčyny, ale pakul daśledavańni nie dajuć dakładnaha adkazu.
Pra vypadak izrailskaha mužčyny daktary raskazali ŭ artykule, nadrukavanym u American Journal of Case Reports. Jak paviedamlajecca, mužčyna źviarnuŭsia pa miedycynskuju dapamohu paśla taho, jak pračytaŭ pra alerhiju na śpiermu. Adnak analiz pakazaŭ admoŭny vynik.
Daktary zapadozryli, što jahonyja arhazmy mahli aktyvizavać tučnyja kletki (mast cells) — imunnyja kletki, jakija znachodziacca ŭ złučalnych tkankach arhanizma i zvyčajna reahujuć na virusy i bakteryi. Ich aktyvacyja vyklikaje alerhičnyja reakcyi: hałaŭny bol, śvierb, młosnaść i inšyja simptomy, padobnyja da POIS.
Jak paviedamlajecca, pacyjentu pryznačyli Ksałar (omalizumab) — preparat, jaki zvyčajna vykarystoŭvajecca dla lačeńnia alerhii i astmy. Jon błakuje antycieły imunahłabulinu Je (IgE) i nie daje im źviazvacca z tučnymi kletkami i vyklikać alerhičnyja reakcyi.
Paśla siami miesiacaŭ terapii simptomy źnikli. Mužčyna paviedamiŭ, što ciapier moža mieć intymnaje žyćcio biez nastupstvaŭ.
Heta ŭsiaho druhi viadomy vypadak pośpiechu Ksałara ŭ lekavańni POIS. Upieršyniu jon byŭ vykarystany ŭ 33-hadovaha mužčyny z Turcyi, jaki pakutavaŭ na hrypapadobnyja simptomy na praciahu siami dzion paśla kožnaj ejakulacyi.
Aŭtary adznačajuć, što z momantu vyjaŭleńnia POIS bolš za 20 hadoŭ tamu va ŭsim śviecie było zarehistravana tolki kala 50 vypadkaŭ hetaj chvaroby.
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju18
Kamientary