Łandśbierhis zaklikaŭ Ukrainu nie padpisvać nijakich damoŭ z ZŠA

Žurnalisty spytali ŭ palityka, ci zhodny jon z tezisam, što «my stracili ZŠA?»

— Ja b skazaŭ inakš: nam ciapier treba rychtavacca da baraćby z Rasijaj va ŭmovach, kali ZŠA bolš aryjentavanyja na Rasiju, čym na nas. Ja liču, što słova «stračany» aznačaje niešta kančatkovaje, a hetaha ciapier niama. Vy viedajecie, što na nastupnym tydni my možam ubačyć u tvitary prezidenta [ZŠA] niešta, što pryncypova supiarečyć jaho ciapierašnim zajavam. Heta całkam mahčyma, — miarkuje Habryelus Łandśbierhis. 

Na jaho dumku, u palityki Donalda Trampa, «niama dakładnych metaŭ». Ale heta nie samaja vialikaja prablema, miarkuje Łandśbierhis. 

— Samaja vialikaja prablema Trampa ŭ tym, što Pucin jaho ŭžo złaviŭ i złaviŭ u pastku. Tramp apynuŭsia ŭ pastcy svajho žadańnia dasiahnuć chutkaha mirnaha pahadnieńnia. Na što Pucin adkazaŭ: ja mahu zrabić tak, što vy atrymajecie chutkuju ŭhodu, kali astatniaje nie maje značeńnia. «Astatniaje nie maje značeńnia» aznačaje, što astatniaje atrymlivaje Pucin. Heta značyć, jon atrymlivaje ŭsio, — kaža palityk.

Toje možna skazać i pra NATO. Niezrazumieła, jak NATO moža funkcyjanavać z takoj pazicyjaj, jakuju zajmajuć Złučanyja Štaty ciapier, kaža palityk:

— Vidavočna, što Pucin padšturchoŭvaje Trampa da spynieńnia vajennaj prysutnaści ZŠA ŭ Jeŭropie. Ja nikoli nie sumniavaŭsia, što jon paprosić ab hetym. I kali Pucin pastavić Trampu ŭmovu — «abo vy vyviedziecie vojski ź Jeŭropy, abo vy nie atrymajecie chutkaj ździełki», — to heta znoŭ zahonić prezidenta Trampa ŭ pastku.

Na pytańnie, što rabić Ukrainie ŭ hetych umovach, palityk adkazvaje:

— Praciahvajcie zmahacca i nie biarycie na siabie nijakich abaviazacielstvaŭ. 

Nie padpisvajcie nijakich pahadnieńniaŭ z ZŠA. Nie zhadžajciesia ni na ździełki pa minieralnych resursach, ni na palityčnyja pahadnieńni — ni za što.

Navat kali Tramp vas šantažuje, pamiatajcie, što rašeńnie za vami. Vaš lepšy kozyr — heta siła, jakuju ŭžo prademanstravali ŭkraincy.

U toj ža čas było b razumna padrychtavacca da bolš ciažkich časoŭ. Tamu što ja ŭpeŭnieny: kali Ukraina i Jeŭropa admoviacca ad ździełki Trampa, Pucin pojdzie na eskałacyju.

Bolš za toje, vidavočna, što ŭ hetym vypadku Tramp moža skaracić amierykanskuju dapamohu jak Ukrainie, tak i Jeŭropie ŭ cełym, — miarkuje Łandśbierhis.

Na jaho dumku, situacyja nie bieznadziejnaja, Jeŭropa maje resursy, kab dapamahčy Ukrainie. U tym liku, heta zamarožanyja rasijskija aktyvy. 

— Śviet ciapier vielmi chutka mianiajecca. Naprykład, budučy kancler Hiermanii Frydrych Mierc u svaim pieršym intervju paśla vybaraŭ faktyčna skazaŭ, što jaho meta — padrychtavać Jeŭropu da baraćby biez ZŠA. Takim čynam, navat Hiermanija, kraina z mocnymi paślavajennymi suviaziami sa Złučanymi Štatami i dziesiacihodździami ahulnaj historyi z ZŠA, budzie mieć urad, jaki skaža: usio skončana. I Ukraina taksama pavinna heta ŭśviadomić, — kaža jon.

Łandśbierhis ličyć, što Jeŭropa nie prosta pavinna pakłapacicca pra svaju abaronu — važna, kab Jeŭropa pieraklučyła chutkaść nieadkładna — «na praciahu niekalkich dzion ci tydniaŭ».

— U advarotnym vypadku Jeŭropa apyniecca ŭ najvialikšaj niebiaśpiecy, ź jakoj kali-niebudź sutykaŭsia kantynient, — miarkuje jon. 

Na pytańnie, ci mahčymy ŭ hetym hodzie mir, litoŭski palityk adkazaŭ, što ŭ hetym hodzie «pieramirje mahčyma».

— Ale vajna budzie praciahvacca, pakul Pucin nie paciarpić parazu, — kaža jon. 

• 15
• 1
• 0
• 0
• 0
• 2
• 0
• 0