U Biełarusi zaćvierdzili Kancepcyju dziaržaŭnaj žyllovaj palityki Respubliki Biełaruś da 2030 hoda. Zroblena heta pastanovaj Saŭmina ad 7 sakavika 2025 hoda № 144, apublikavanaj na Nacyjanalnym pravavym partale.
Pryjarytetam u Kancepcyi nazvanyja zabieśpiačeńnie žyllom asobnych katehoryj hramadzian, jakija majuć patrebu ŭ dziaržpadtrymcy, i renavacyja žyłych damoŭ, nieprydatnych dla pražyvańnia, u tym liku sa znosam i ŭźviadzieńniem na ich miescy novych.
Taksama akcentujecca nieabchodnaść naroščvańnia abjomaŭ budaŭnictva arendnaha žylla i žyłych pamiaškańniaŭ sacyjalnaha karystańnia.
Zhodna z płanavanymi vynikami, da 2030 hoda zabiaśpiečanaść nasielnictva ahulnaj płoščaj žylla pavinna vyraści z 29,9 da 33 «kvadrataŭ» na adnaho čałavieka. Pry hetym dolu arendnaha žylla i žyłych pamiaškańniaŭ sacyjalnaha karystańnia ŭ ahulnym abjomie žyllovaha fondu chočuć davieści da 5 pracentaŭ.
Siaredni košt «kvadrata» ahulnaj płoščy žylla, pabudavanaha ź dziaržpadtrymkaj, nie pavinien pieravyšać pamieru naminalnaj naličanaj siaredniaj zarpłaty.
Płanujecca, što da 2030 hoda štohod nie mienš za 4 pracenty hramadzian (siemjaŭ), jakija stajać na ŭliku, buduć atrymlivać žyllo i palapšać svaje žyllovyja ŭmovy. U tym liku 1,5 pracenta — pry dapamozie arendnaha žylla i žyłych pamiaškańniaŭ sacyjalnaha karystańnia, i 2,5 pracenta — uźviadzieńnia, rekanstrukcyi, nabyćcia žylla.
Abjomy rekanstrukcyi (renavacyi) pavinny składać štohod nie mienš za 3 pracenty ad nieŭładkavanaha žyllovaha fondu ŭ haradach i nie mienš za 1 pracent na vioscy.
Dolu ahulnaj płoščy žylla, abstalavanaha vadapravodam i kanalizacyjaj, chočuć davieści: u haradach i pasiołkach — da nie mienš za 92 pracenty, na vioscy — da nie mienš za 60 pracentaŭ.
Ciapier čytajuć
28‑hadovaj biełaruscy paśla žudasnaj avaryi ŭ Tajłandzie nie mohuć akazać dapamohu — niama patrebnaj kryvi1
Kamientary