U ispanskaj Valensii źjavilisia dziŭnyja kiryličnyja hrafici. Biełarus patłumačyŭ miascovym, što jany aznačajuć
U roznych rajonach ispanskaj Valensii na ścienach budynkaŭ užo niekalki miesiacaŭ źjaŭlajucca hrafici z nadpisam KLADIK, pobač ź jakim raźmieščanyja słovy kirylicaj — «koks» i «mief», a taksama adras internet-sajta. Dla bolšaści miascovych žycharoŭ hetyja nadpisy vyhladajuć jak zvyčajnyja hrafici, adnak ludzi ź viedańniem ruskaj movy adrazu raspaznajuć u ich rekłamu prodažu kakainu i miefiedronu, piša vydańnie Las Provincias.
Pavodle adkrytych źviestak, internet-damien, paznačany na hrafici, byŭ zarehistravany 12 sakavika 2026 hoda — prykładna tady ž u Valensii pačali źjaŭlacca pieršyja takija nadpisy. Ciapier hety damien vystaŭleny na prodaž, što moža śviedčyć pra toje, što sistema pakul nie pačała pracavać u horadzie. Pavodle infarmacyi rehistracyjnych danych, sajt byŭ stvorany va Ukrainie. U Nacyjanalnaj palicyi Ispanii zajavili, što pakul nie majuć infarmacyi pra dziejnaść takoj schiemy ŭ Valensii.
Źjaŭleńnie hrafici vyklikała abmierkavańnie na internet-forumach, asabliva siarod vychadcaŭ ź Biełarusi, Ukrainy i Rasii. Mienavita jany pieršymi źviarnuli ŭvahu, što nadpisy adpaviadajuć dobra viadomaj u krainach Uschodniaj Jeŭropy sistemie rekłamy narkotykaŭ. Jana pabudavanaja takim čynam, kab pradaviec i kupiec nikoli nie sustrakalisia asabista.
Biełarus, jaki ŭžo kala piaci hadoŭ žyvie ŭ Valensii, raskazaŭ žurnalistam, što padobnyja nadpisy daŭno stali zvyčajnaj źjavaj u Minsku. Pavodle jaho słoŭ, ubačyŭšy pieršaje takoje hrafici ŭ Valensii, jon adčuŭ soram i staŭ bajacca, što padobnaja dziejnaść moža niehatyŭna paŭpłyvać na staŭleńnie da ŭschodniesłavianskich supolnaściaŭ u Ispanii.
Sposab raspaŭsiudžvańnia pavodle hetaj schiemy nazyvajecca «zakładki». Jon nahadvaje servis dastaŭki. Kupiec pierachodzić pa spasyłcy, paznačanaj na hrafici, abo karystajecca botam u Telegram, vybiraje patrebnaje rečyva, apłačvaje jaho kryptavalutaj i atrymlivaje fatahrafiju schovanki razam z dakładnymi GPS-kaardynatami. Paśla hetaha jon samastojna zabiraje pakiet.
Narkotyki zahadzia chavajuć u parkach, sadach abo inšych hramadskich miescach, dzie ich paźniej znachodzić kupiec.
Arhanizacyja hetaj schiemy maje vyraznuju strukturu. Na vierchnim uzroŭni znachodziacca arhanizatary, nižej — składy, dzie narkotyki fasujuć na nievialikija dozy. Paśla hetaha tak zvanyja «zakładčyki» raźmiaščajuć pakiety ŭ zahadzia vybranych miescach. Asobnuju rolu vykonvajuć ludzi, jakija nanosiać rekłamnyja nadpisy na ścieny. Ich najmajuć praz Telegram, abiacajučy lohki zarobak abo raźličvajučysia nievialikimi sumami hrošaj ci samimi narkotykami. Unutry takich arhanizacyj hetych vykanaŭcaŭ nazyvajuć «miasam», padkreślivajučy ich lohkuju zamiennaść.
Nadpisy «koks» i «mief» aznačajuć adpaviedna kakain i miefiedron. Apošni — sintetyčny narkatyčny srodak, jaki ŭ Jeŭrapiejskim sajuzie zabaronieny z 2010 hoda z-za vysokaj ryzyki dla zdaroŭja i chutkaha raźvićcia zaležnaści. Jon vyklikaje karotkačasovuju ejfaryju, uzmacniaje adčuvańnie badzioraści i kamunikabielnaści, ale taksama moža pryvodzić da tachikardyi, pavyšeńnia arteryjalnaha cisku, tryvožnaści, paranoi i mocnaj narkatyčnaj zaležnaści.
Ciapier čytajuć
Kolki biełarusaŭ atrymali polskaje hramadzianstva za apošni čas. Ličby ŭražvajuć41
Kamientary