Stała viadoma, jak ciapier žyvie ŭ Rasii siamja źbiehłaha prezidenta Ukrainy Janukoviča i jak jaho samoha ciapier zavuć
Žurnalisty ŭkrainskaha kanała «Telebačańnie Taronta» daśledavali žyćcio i finansavaje stanovišča byłoha prezidenta Ukrainy Viktara Janukoviča, jaki paśla ŭciokaŭ z Ukrainy ŭ 2014 hodzie žyvie ŭ Rasii. Pavodle rasśledavańnia, Janukovič razam sa svajoj hramadzianskaj žonkaj Luboŭju Palažaj moža žyć u Sočy, a sam były kiraŭnik Ukrainy nibyta karystajecca čužym imiem — «Aleh Lavonaŭ», piša «Ukrainskaja praŭda».
Jak śćviardžajuć žurnalisty, paśla ŭciokaŭ z Ukrainy hrupa byłych supracoŭnikaŭ dziaržaŭnaj achovy Ukrainy, jakija znachodziacca ŭ vyšuku, pierajechała ŭ Sočy i pačała pracavać u rasijskaj Fiederalnaj słužbie achovy. Mahčyma, hetyja ludzi achoŭvajuć Janukoviča i jaho blizkich.
Razam z achoŭnikami ŭ Rasii i za jaje miežami padarožničali Luboŭ Sadykava (raniej Palažaj), jaje dačka Maryja Sadykava i siastra Lubovi Nadzieja Marencava.
Žurnalisty źviazali Luboŭ Sadykavu z kompleksam «Błahadać» u Sočy na vulicy Jesaulenki. Hety abjekt raniej nazyvali «dačaj Janukoviča». Majontak zajmaje kala troch hiektaraŭ: tam jość niekalki damoŭ, vialikija ciaplicy, sad, kaplica, vadajom i vid na mora i hory.
Akramia taho, u Sadykavaj aformleny vialiki ziamielny ŭčastak pobač z zakinutym pansijanatam. Pavodle rasśledavańnia, z 2015 da 2025 hod jana aficyjna pracavała mieniedžarkaj u adnym z najbujniejšych rasijskich ahrapramysłovych kompleksaŭ, atrymlivajučy kala 50 tysiač rasijskich rubloŭ (kala 640 dalaraŭ) u miesiac. Žurnalisty dapuskajuć, što heta mahło być tolki farmalnaje pracaŭładkavańnie.
Za hety čas Sadykava atrymała va ŭłasnaść kala 337 hiektaraŭ sielskahaspadarčaj ziamli, jakuju potym zdavała ŭ arendu tamu ž ahrapradpryjemstvu. Za niekalki hadoŭ jana atrymała bolš za 50 miljonaŭ rubloŭ (kala 640 tysiač dalaraŭ) ad arendy i jašče amal 14 miljonaŭ rubloŭ (kala 179 tysiač dalaraŭ) ad prodažu nieruchomaści.
U cełym, pavodle źviestak žurnalistaŭ, za hady žyćcia ŭ Rasii na Sadykavu byli aformlenyja bolš za 370 hiektaraŭ ziamli ŭ Sočy i bolš za 2400 kvadratnych mietraŭ nieruchomaści: piać kvater, piać damoŭ i niekalki inšych pamiaškańniaŭ. Siarod ich — dźvie kvatery ŭ Maskvie płoščaj 102 i 147 kvadratnych mietraŭ.
Taksama stała viadoma, što ŭ 2024 hodzie Sadykava zarehistravała ŭ Sočy kampaniju «Ščodradar», adnak pavodle finansavaj spravazdačnaści ŭ 2025 hodzie pradpryjemstva atrymała straty kala dvuch miljonaŭ rubloŭ (kala 25,6 tysiačy dalaraŭ).
Žurnalisty miarkujuć, što sam Viktar Janukovič moža padarožničać pa Rasii pad imiem «Aleh Mikałajevič Lavonaŭ». Jany, praŭda, nie znajšli źviestak pra čałavieka z takim imieniem — niama infarmacyi pra miesca žycharstva, pracu ci kantakty. Adzinyja supadzieńni — data naradžeńnia 9 lipienia 1950 hoda, jakaja adpaviadaje dacie naradžeńnia Janukoviča, a taksama proźvišča Lavonaŭ, jakoje było dziavočym proźviščam jahonaj maci.
Rasśledavańnie taksama zakranuła byłuju aficyjnuju žonku Janukoviča Ludmiłu. Žurnalisty znajšli, što jaje numar telefona ŭ rasijskim partale dziaržaŭnych pasłuh z červienia 2026 hoda paznačany jak numar pamierłaj asoby. Adnak paćviardžeńnia jaje śmierci jany nie vyjavili.
Starejšy syn Janukoviča Alaksandr, pavodle infarmacyi žurnalistaŭ, razam z žonkaj i dvuma synami žyvie ŭ Rasii pad proźviščam Sakałovy. Da maja 2026 hoda jon nibyta mieŭ dostup da rasijskaj sistemy raspaznavańnia i adsočvańnia asobaŭ, jakoj karystajucca śpiecsłužby.
Taksama paviedamlajecca, što ŭ 2022—2023 hadach Alaksandr Janukovič lotaŭ pamiž Maskvoj i Sočy razam z kiraŭnikom 5‑j słužby FSB Rasii Siarhiejem Biasiedaj i jaho namieśnikam Anatolem Bolucham. Razam ź imi, pavodle danych rasśledavańnia, pad inšymi imionami padarožničali były hienieralny prakuror Ukrainy Viktar Pšonka i jahonaja žonka.
Žonka Alaksandra Janukoviča Alena, jakaja ŭ rasijskich dakumientach fihuruje jak Alena Sakałova, za hady žyćcia ŭ Rasii nabyła bolš za 27 tysiač kvadratnych mietraŭ nieruchomaści, u tym liku ŭ elitnym pasiołku kala Maskvy.
Pry hetym, pavodle źviestak rasijskaha Piensijnaha fondu, jana z 2009 hoda ličycca chatniaj haspadyniaj. Niahledziačy na heta, u 2024 hodzie na jaje bankaŭskich depazitach znachodziłasia kala 3,5 miljona dalaraŭ. Akramia rasijskaha hramadzianstva, jana, jak i dva jaje syny, maje hramadzianstva Abjadnanych Arabskich Emirataŭ.
Taksama žurnalisty vyśvietlili, što ŭnuk Viktara Janukoviča — Viktar — u 2024 hodzie mieŭ na rasijskich rachunkach amal 5 miljonaŭ dalaraŭ.
Rasśledavańnie śćviardžaje, što siamja byłoha ŭkrainskaha prezidenta paśla ŭciokaŭ praciahvaje žyć u Rasii, karystajučysia značnymi finansavymi resursami i mahčymymi suviaziami z rasijskimi strukturami.
«Ukraina ŭ NATA — heta daroha da hramadzianskaj vajny». U Rasii raptam dastali z šafy Janukoviča — kab jon pachvaliŭ Pucina
SBU ŭkaraniła svajho ahienta ŭ maskoŭski ofis paplečnika Janukoviča, jaki zajmaŭsia špijanažam dla FSB
Akademikam Rasijskaj akademii navuk abrali «kravasisiu» časoŭ Janukoviča
Eks-prezidentu Ukrainy Janukoviču zavočna dali 15 hadoŭ
Syn Janukoviča zarablaje miljardy na prodažy vuhalu z akupavanych terytoryj
Zialenski pazbaviŭ hramadzianstva palitykaŭ koła Janukoviča, jakija majuć rasijskaje hramadzianstva
Ciapier čytajuć
U Biełarusi znajšli kopiju šviejcarskich Alpaŭ — ale turystaŭ tam nie čakajuć1
Kamientary