U intervju Bild eks-prezident Ukrainy Piatro Parašenka vyłučyŭ surjoznyja abvinavačańni suprać Uładzimira Zialenskaha.
«Jon — niaščasny lidar kamandy, jakaja viadzie nacyju ŭ bok dyktatury. Ale Ukraina — heta nie Rasija, i my nie dazvolim, kab va Ukrainie ŭstalavałasia dyktatura».
Parašenka nazvaŭ sankcyi suprać siabie i svajoj partyi «atakaj na svabodu i demakratyju». Na pytańnie, čamu jon znachodzicca pad sankcyjami, Parašenka nie zmoh dać adkazu:
«Ja — adziny palityčny lidar, adziny lidar apazicyi, jaki padpaŭ pad sankcyi biez anijakich tłumačeńniaŭ. Toje, što tut adbyvajecca, — heta antykanstytucyjna, heta niezakonna, niama nijakaha sudovaha rašeńnia. Heta prosta vielmi durnoje, niezakonnaje, złačynnaje parušeńnie zakona».
Bild zrabiŭ niekalki zapytaŭ na hety kont pres-sakrataru prezidenta Zialenskaha, ale adkazu nie atrymaŭ.
Na pytańnie, ci maje racyju prezident ZŠA Donald Tramp u svaich abvinavačańniach suprać Zialenskaha i Ukrainy, Parašenka adkazaŭ:
«Kali vy pytajeciesia mianie pra dyktaturu, to adkaz vidavočny — dyktatar heta Pucin. Ale absalutna nieprymalna, kali Ukraina nabližajecca da miežaŭ demakratyi i svabody, kali adbyvajucca napady na miascovaje samakiravańnie, kali lidar apazicyi padviarhajecca niezakonnamu i antykanstytucyjnamu pieraśledu.
Heta pavinna być nieadkładna spyniena. Nie tamu, što sprava datyčycca mianie, a tamu što my pavinny zachoŭvać adzinstva. A adzinstva — heta vyrašalny, vielmi mocny faktar, kab spynić Pucina».
Niadaŭna źjavilisia paviedamleńni, što Tramp choča adstaŭki Zialenskaha. Parašenka prakamientavaŭ heta tak:
«Chto budzie lidaram Ukrainy — heta sprava ŭkrainskaha naroda. […] Viedajecie, što Zialenski skazaŭ u svajoj pieradvybarčaj prahramie ŭ 2019 hodzie? Jon skazaŭ: «Ja nie budu bałatavacca na druhi termin. Ja zavieršu svoj pieršy termin i sydu». Kali heta jaho pramaja abiacanka, čamu ja pavinien vykazvać svajo mierkavańnie na hety kont? Ja raźličvaju na jaho».
Parašenka taksama kazaŭ u intervju pra ciažkija vajennyja straty Ukrainy. Apošnim časam USU, asabliva ŭ Kurskaj vobłaści, byli vymušanyja adstupić.
«My pavinny nieadkładna spynić straty ludziej, nieadkładna spynić stratu terytoryj. I my pavinny nieadkładna spynić stračvać čas», — skazaŭ Parašenka.
Pavodle byłoha prezidenta, Ukrainie nieabchodna źmianić padychody da viadzieńnia vajny, kab strymać rasijskuju armiju. Pierš za ŭsio, ličyć jon, treba zabyć słovy «nastupalnaja apieracyja» i zasiarodzicca na abaronie i budaŭnictvie ŭmacavańniaŭ.
Piatro Parašenka z časoŭ svajho paražeńnia na prezidenckich vybarach u 2019 hodzie zastajecca voraham ciapierašniaha prezidenta Ukrainy Uładzimira Zialenskaha. Ciapier Zialenski nakłaŭ na jaho sankcyi.
Lidaru najbujniejšaj apazicyjnaj partyi zabaroniena pakidać krainu, jon pazbaŭleny dostupu da svajoj majomaści i nie moža poŭnaściu vykonvać svaje funkcyi jak parłamientaryj, piša Bild.
Pryčyny sankcyj dahetul zastajucca niavyznačanymi. Pavodle čutak, havorka idzie pra «dziaržaŭnuju zdradu». Apazicyja ž bačyć u hetym palityčna matyvavanuju kampaniju Zialenskaha z metaj prymusić palityčnaha kankurenta maŭčać.
Kamientary