Hienierał Suravikin u kastryčniku 2022 hoda prapanoŭvaŭ udaryć jadziernaj zbrojaj, kab spynić ukrainski nastup
Razmovu Suravikina z načalstvam pierachapiła amierykanskaja vyviedka, piša The New York Times.
Kamandujučy rasijskaj armijaj va Ukrainie Siarhiej Suravikin u kastryčniku 2022 hoda prapanoŭvaŭ nanieści ŭdar taktyčnaj jadziernaj zbrojaj, kab spynić nastup ukrainskaj armii na poŭdni.
Razmovu Suravikina pierachapiła amierykanskaja vyviedka. Pra toje, što rasijskija vajskovyja abmiarkoŭvali jadzierny ŭdar, amierykanskaja presa paviedamlała i raniej. Ale tady nie było viadoma, chto mienavita prapanoŭvaŭ taki krok adčaju.
Da taho momantu amierykanskija śpiecsłužby aceńvali vierahodnaść vykarystańnia Rasijaj jadziernaj zbroi va Ukrainie ŭ 5—10 pracentaŭ. Paśla pierachopu razmovy Suravikina pazicyja CRU źmianiłasia: tam kazali, što, kali rasijski front na poŭdni abryniecca, vierahodnaść składzie ŭžo 50 pracentaŭ.
USU ŭ žniŭni-listapadzie 2022 hoda aktyŭna nastupali na Chiersonskim napramku. Cikava, što kali jeŭrapiejski hienieralitet vitaŭ takoje raźvićcio padziej, to ŭ Vašynhtonie byli inšyja nastroi. Jak piša The New York Times, hałoŭnyja daradcy prezidenta Bajdena niervova razvažali, ci nie varta naadvarot paprasić ukraincaŭ zapavolić nastup.
Hetaja chvilina mahła stać dla Ukrainy najlepšaj mahčymaściu nanieści Rasii pierałomny ŭdar. Ale taksama heta mahła być najlepšaja mahčymaść raspalić šyrokamaštabnuju vajnu, jakoj ŭ Vašynhtonie nie chacieli.
Pa vyniku, u listapadzie USU vyzvalili Chierson. U Rasii adstupleńnie z horada nazvali taktyčnym. Užo ŭ studzieni 2023 hoda Pucin zvolniŭ Suravikina z pasady kamandujučaha rasijskaj armijaj va Ukrainie.
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary