Eks-muž Mielnikavaj: Pra źniknieńnie Anžaliki nikudy nie źviartaŭsia, nie baču sensu

Padčas razmovy supracoŭniki «Jeŭraradyjo» pradstavilisia žurnalistami, nie ŭdakładniŭšy ź jakoha miedyja, kab nie stvarać dla Mielnikava pahrozy praz kamunikacyju z «ekstremistami».

— Moža, źjavilisia niejkija naviny pra Anžaliku?

— Nu nie, nie… taksama nichto ničoha nie viedaje, ničoha pakul niama.

— A vy źviartalisia kudy-niebudź… u milicyju?

— Nu… ja asabista nie źviartaŭsia… Heta… tak, praz znajomych bolš.

— Praz znajomych, ale chtości źviarnuŭsia ŭ niejkija orhany? Kali źnikaje čałaviek — treba ž, napeŭna, kab šukali?

— Nu… nu ja… nikudy aficyjna nie źviartaŭsia. Nie viedaju, nie baču ŭ hetym sensu.

— A čamu?

— Nu… tamu… chm… tamu što nie baču… [paśmiejvajučysia] nie viedaju. Nu, nie chaču źviazvacca z orhanami ŭ takim styli.

— Ci vy dumajecie, što jana sama kudyści prosta źjechała?

— Oj! Biez paniaćcia. Uvohule ž… nu ja nie viedaju, u mianie nijakaj infarmacyi niama.

— A dzieci z vami jašče?

— Tak, dzieci sa mnoj. U mianie… jak by [uzdychnuŭ] my raźviedzienyja, u pryncypie, tamu… voś…

— Skažycie, a jak vy źjazdžali? Vy z Polščy razam ź dziećmi źjazdžali?

— Usio, biez kamientaroŭ.

Pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.

7 krasavika žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami ničoha nie viedajuć i tryvožacca.

8 krasavika vice-śpikierka Kaardynacyjnaj rady Stanisłava Hlińnik, jakaja ciapier vykonvaje abaviazki śpikierki, paviedamiła, što 13 sakavika z akaŭnta Anžaliki Mielnikavaj byli spampavanyja fajły, da jakich jana mieła dostup u ramkach pracy Kaardynacyjnaj rady. Siarod ich — stratehičny płan, biudžet, unutranyja dakłady i inšyja apieracyjnyja materyjały pačynajučy ź lipienia 2024 hoda.

10 krasavika telekanału «Biełsat» stała viadoma, što z rachunka fondu Białoruś Liberty, zasnavanaha Anžalikaj Mielnikavaj, źniali hrošy. Zrabiła heta jana sama ci chto inšy, pakul nieviadoma. 

14 krasavika stała viadoma, što rasśledavańnie źniknieńnia Anžaliki Mielnikavaj u Polščy pieraviali na bolš vysoki ŭzrovień — zamiest Varšaŭskaj akruhovaj prakuratury hetym budzie zajmacca Nacyjanalnaja prakuratura. Na dumku śledčych, spravu pavinny rasśledavać prakurory, jakija zajmajucca najbolš važnymi spravami, u tym liku pytańniami špijanažu.

• 0
• 0
• 12
• 21
• 3
• 2
• 9
• 0