Praduktovy košyk na Vialikdzień u Biełarusi i Polščy — paraŭnańnie cenaŭ
Napiaredadni chutkaha ŭžo Vialikadnia «Salidarnaść» paraŭnała ceny vielikodnaha praduktovaha košyka ŭ Minsku i Varšavie, a taksama vyznačyła, nakolki vyraśli ceny ŭ hetych haradach u paraŭnańni ź minułym hodam. Vybiraŭsia standartny nabor praduktaŭ na śviatočny stoł: haračaje, zakuski i, viadoma, vielikodnaja bułka. Uvaha źviartałasia i na vybar bulby.
Varšava. «Ašan»
Pierš za ŭsio vybirajucca jajki — adzin z hałoŭnych praduktaŭ Vialikadnia. Upakoŭka 20 štuk pamieru L kaštuje 23,99 złotaha — heta 20,2 rubla.
Dalej — pradukty dla haračaha. Źviartajecca ŭvaha na bulbu — na kolkaść, jakaść i košt jakoj apošnim časam skardziacca ŭ Biełarusi. U Polščy z bulbaj prablem niama: pradajuć niekalki vidaŭ polskaj, jehipieckuju, mytuju i nie. U košyk kładziecca najtańniejšy varyjant — 1,48 złotaha za kiło (1,25 rubla). Heta navat tańniej, čym letaś, tady kiłahram abyšoŭsia ŭ 1,89 złotaha.
Vybirajecca tuška kurycy — 10,48 złotaha (8,8 rubla) za kiło, u siarednim jana zavažvaje na paŭtara-dva kiłahramy. A taksama vendžanyja kurynyja nožki, jak u minułym hodzie. Košt na ich za hod padniaŭsia na 1,5 złotaha. Ciapier jany abyducca ŭ 15,99 złotaha (13,5 rubla) za 530 hramaŭ.
Dalej vybirajucca zakuski. Kavałačak syru «Haŭda» — 7,98 złotaha (6,73 rubla) za 250 hramaŭ. Tut ža i kamambier — 6,98 złotaha (5,9 rubla). Z kaŭbas biarecca nievialikaja pałačka salami — 400 hramaŭ za 11,69 złotaha abo 9,8 rubla. I pałačka francuzskaj ź ćvillu — 18,99 złotaha (16 rubloŭ) za 200 hramaŭ.
Dla buterbrodaŭ uziali doŭhi bahiet — 2,19 złotaha (1,8 rubla), masła — 7,98 złotaha (6,7 rubla) i łasosia — 28,99 złotaha (24,6 rubla) za 250 hramaŭ.
Z sałodkaha: uziali, jak i letaś, paŭkiło «karoŭki», vychodzić amal 10 złotych — heta 8,4 rubla.
I, viadoma, vielikodnaja bułka. U «Ašan» užo vialiki vybar makavych ruletaŭ i vielikodnych kieksaŭ. U košyk idzie šakaładny z kakosam za 12,99 złotaha — heta amal 11 rubloŭ.
Razam vyjšła 159,73 złotaha ci krychu bolš za 133,27 rubla. Letaś vielikodny košyk kaštavaŭ 140 złotych abo 112 rubloŭ.
Pry siarednim zarobku ŭ Polščy 6242 złotych (paśla vypłaty padatkaŭ) siaredni palak moža dazvolić sabie 39 takich praduktovych košykaŭ.
Minsk. «Jeŭraopt»
U minułym hodzie zakuplalisia ŭ «Hrošyku», pakolki tam adnyja z najbolš biudžetnych cenaŭ. Ale mnohich praduktaŭ tam nie było, davodziłasia dakuplać u «Jeŭraopcie». Dy i vybar vielmi adroźnivaŭsia ad polskaha «Ašan», tamu ciapier adrazu pajšli ŭ «Jeŭraopt».
Usie jajki tam pradajucca pa 10 štuk va ŭpakoŭcy, tamu ŭziali dźvie pa 3,62 rubla.
Dalej vybirajecca bulba. Jość tolki adzin vid, i bulba mytaja — 2,59 rubla za kiłahram. Znajści mienavita niamytuju bulbu, jak letaś, akazałasia nie tak prosta. Jana była ŭ kramie «Vitalur» — 1,10 za kiło.
«Z bulbaj biada. Narmalnaj niama. Jaje čyściš, a jana ŭnutry hniłaja. Adzinaja jadomaja — mytaja i fasavanaja. I toje praz raz», — skazała adna z pakupnic.
Dalej — miasa. Tuška kurycy abyjdziecca ŭ 6,79 rubla za kiło. Kurynyja nožki vendžanyja — 6,55 za 430 hramaŭ.
Z kaŭbas, jak i ŭ Varšavie, šukajecca salami. Sierviełat kaštuje 18,6 rubla za kiło, uziali 400 hramaŭ — vychodzić 7,44 rubla. I jašče pałačku salami ź ćvillu — jana ciapier na źnižcy 7,59 za 180 hramaŭ.
Syr vybirajecca «Kłasičny» ad «Brest-Litoŭsk». Kavałačak u 200 hramaŭ abyjdziecca ŭ 5,17 rubla. Letaś jon byŭ prykmietna tańniejšy — 4,39 rubla. Taksama ŭ košyk adpraŭlajecca kamambier ad firmy Danke. Jon ciapier na źnižcy — 7,89 zamiest 9,99 rubla.
Zastalisia buterbrody z čyrvonaj rybaj. Bahiet biarecca za 2,89 rubla, masła — za 4,69 rubla. Jano, praŭda, na 20 hramaŭ mienšaje, čym u Varšavie.
Dalej vybirajecca ryba. U Varšavie ŭziali kavałačak 250 hramaŭ, a ŭ Minsku jość tolki 200 i 300 hramaŭ. Dla čyścini ekśpierymientu paličyli, u kolki abyjdziecca 250 hramaŭ ryby ŭ «Jeŭraopcie» — 24,74 rubla.
Zastajecca sałodkaje. Paŭkiło «karoŭki» zavažyła na 5,7 rubla. A voś vielikodnaj bułki ŭ «Jeŭraopcie» niama. Nijakaha vielikodnaha kieksa taksama nie znajšłosia. Ale jak ža biez cany na hałoŭny pradukt śviata? Tamu pahladzieli canu na kieks z razynkami na sajcie «Hryna» — 6,5 rubloŭ.
Razam vyjšła 94,29 rubla. Letaś za taki košyk zapłacili 81 rubiel.
Pry siarednim zarobku ŭ Biełarusi 2088 rubloŭ (paśla vyliku padatkaŭ) siaredni biełarus moža dazvolić sabie 22 takija praduktovyja košyki.
Ciapier čytajuć
«Što, hrochnuć dziaciej Cichanoŭskaj, kab źviarnuli ŭvahu na maju prablemu?» Jak tupy kamientar aktyvista Dzianisa Daškieviča stvaryŭ jamu prablemy ŭ Polščy
Kamientary