Minabarony Rasii śćviardžaje, što arsienał va Uładzimirskaj vobłaści ŭzarvaŭsia z-za «parušeńnia patrabavańniaŭ biaśpieki»
Rasijskija ŭłady, paviedamlajučy, što va Uładzimirskaj vobłaści vybuchnuŭ 51-y arsienał Hałoŭnaha rakietna-artyleryjskaha ŭpraŭleńnia Minabarony, nie chočuć pryznavać, što heta vynik pracy ŭkrainskich bieśpiłotnikaŭ.
Detanacyja bojeprypasaŭ adbyłasia ŭ vyniku ŭzharańnia na terytoryi vajskovaj čaści va Uładzimirskaj vobłaści, zajavili ŭ rasijskim Minabarony.
«Dla likvidacyi ŭzharańnia pryciahnutyja štatnyja pažarnyja raźliki vajskovaj čaści i MNS. Pavodle papiaredniaj infarmacyi, paciarpiełych niama, pryčyna ŭzharańnia — parušeńnie patrabavańniaŭ biaśpieki pry praviadzieńni rabot z vybuchovymi materyjałami», — adznačyli ŭ ministerstvie.
Pra ataku ŭkrainskich dronaŭ pry hetym Minabarony zusim nie zhadva, adnak miascovyja žychary kažuć, što bačyli čatyry bieśpiłotniki. Ranicaj i ŭ samim vajskovym viedamstvie, darečy, paviedamlali pra źniščeńnie troch ukrainskich bieśpiłotnikaŭ nad Uładzimirskaj vobłaściu.
Na terytoryi Kiržackaha rajona, dzie hrymiać vybuchi, abjaŭlena nadzvyčajnaje stanovišča. Taksama pravodzicca evakuacyja žycharoŭ dvuch pasiołkaŭ, Barsava i Mirnaha, paviedamiła miascovaja administracyja ŭ svaim telehram-kanale.
Hubiernatar Uładzimirskaj vobłaści Alaksandr Aŭdziejeŭ paćvierdziŭ infarmacyju pra vybuch i pryhraziŭ žurnalistam i hramadzianam štrafami za raspaŭsiud źviestak ab nadzyčajnym zdareńni «da pastupleńnia pravieranych aficyjnych danych».
Jak piša telehram-kanał «Ostorožno, novosti», vybuchi nastolki mahutnyja, što ich vidać u Kalčuhinie (40 km ad Barsava) i padmaskoŭnym Elektrahorsku (38 km). U Kiržačy była čutnaja sirena, pieradaje telehram-kanał.
U svaju čarhu, telehram-kanał Baza śćviardžaje, što ŭsiaho adbyłosia nie mienš za 10-11 vybuchaŭ.
Pry hetym, jak paviedamlaje telehram-kanał 112, niekatoryja bojeprypasy pad uździejańniem połymia sa składoŭ uźlatajuć i traplajuć u cyvilnyja abjekty. Prynamsi, nibyta jość infarmacyja pra dva padobnyja vypadki. Adna «rakieta», jak śćviardžajecca, upała ŭ horadzie Kiržač u mikrarajonie Krasny Kastryčnik, kala Centra volnaha času, ale nie vybuchnuła. Druhaja zvaliłasia na dačny dom u sadovym tavarystvie «Viaźma».
U vakolicach Barsava znachodzicca 51-y arsienał Hałoŭnaha rakietna-artyleryjskaha ŭpraŭleńnia Minabarony. Jon raźličany na zachoŭvańnie 264 tysiač ton rakiet i snaradaŭ. Častka bojeprypasaŭ zachoŭvałasia prosta pad adkrytym niebam, źviarnuŭ uvahu vajskovy analityk Jan Matviejeŭ.
Paśla maštabnaha nadzvyčajnaha zdareńnia na arsienale va Uljanaŭsku ŭ 2009 hodzie na 51-y arsienał vazili žurnalistaŭ — i pakazvali jaho jak uzorny abjekt, zhadvaje telehram-kanał «Možiem objaśniť». U 2017 hodzie źjaviłasia kryminalnaja sprava ab kradziažy 650 miljonaŭ rasijskich rubloŭ pry budaŭničych rabotach na hetym abjekcie. Usiaho na jaho rekanstrukcyju było tady vydzielena 3,7 miljarda rubloŭ.
Z Łondana Mielnikava vylecieła na Šry-Łanku, u jaje byŭ kachanak spartovaha vyhladu ź Biełarusi22
Kamientary