Seks-cacki i DHL: jak Rasija z dapamohaj błatnych razhortvała dyviersijnuju sietku ŭ Jeŭropie

U 2024 hodzie Jeŭropa apynułasia ŭ centry niezvyčajnaj i patencyjna katastrafičnaj dyviersijnaj apieracyi. U pasyłki z seks-cackami i kaśmietykaj zakładali zapalnyja pryłady. Rasśledavańnie žurnalistaŭ brytanskaha vydańnia The Guardian Piatra Saŭera (Pjotr Sauer) i Šona Uokiera (Shaun Walker) raskryvaje novyja fakty pra mierkavanuju rasijskuju ahienturnuju sietku, što dziejničała ŭ niekalkich krainach.

U centry hetaj historyi — uciakač z Rasii Alaksandr Biezrukavy, hrupa kurjeraŭ, jakija atrymlivali apłatu ŭ kryptavalucie, i ananimnyja kaardynatary, što dziejničali praz Telegram.

Ucioki z Rasii

44-hadovy Biezrukavy rodam z Rastova-na-Donie. Pavodle rasijskich sudovych dakumientaŭ, jon nie raz pryciahvaŭsia da adkaznaści: za zachoŭvańnie zbroi, rabavańni, kradziažy i narkatyčnyja złačynstvy. U 2019 hodzie jaho abvinavacili ŭ prynaležnaści da arhanizavanaj złačynnaj hrupy, ale jon paśpieŭ uciačy — spačatku va Ukrainu, a ŭ lutym 2024 hoda — u Małdovu.

Pavodle źviestak The Guardian, užo ŭ mai 2024 hoda mužčyna trapiŭ u Šenhienskuju zonu praz Charvatyju. Paźniej atrymaŭ dazvoł na žycharstva ŭ Ispanii dziakujučy fiktyŭnamu šlubu z ukrainkaj, choć u Rasii ŭ jaho zastałasia žonka Natalla.

«Jon nie moh viarnucca ŭ Rasiju, bo byŭ tam u vyšuku, tamu zastavaŭsia ŭ Jeŭropie i čakaŭ, pakul Maskva zdymie abvinavačvańni», — raskazała Natalla ŭ telefonnym intervju.

Ź Ispanii jon pierajechaŭ u Varšavu i pasialiŭsia razam sa svaim znajomym z Charkava Viačasłavam Čabanienkam pa mianušcy «Pončyk», jaki taksama mieŭ kryminalnaje minułaje. Tam ža jon pasiabravaŭ ź Siarhiejem Jaŭsiejevym z Łucka.

«Padpracoŭka»

Uletku 2024 hoda mužčyny pačali šukać padpracoŭku praz rasiejskamoŭnyja Telegram-kanały. Tam jany i znajšli hrupu VWarrior, za jakoj, pavodle polskich uładaŭ, stajaŭ supracoŭnik HRU.

Kiraŭnik dasyłaŭ ananimnyja paviedamleńni z prapanovami kurjerskich zadańniaŭ: treba było pieravozić skrynki z horada ŭ horad za sotni dalaraŭ.

Blizki znajomy Biezrukavaha pa imieni Kiryła (imia źmieniena, bo mužčyna chavajecca ŭ treciaj krainie pa-za miežami Jeŭropy i Rasii) paviedamiŭ The Guardian novyja padrabiaznaści. Pavodle jaho, źmieściva pasyłak vyhladała absalutna vypadkova: «seks-cacki z Kitaja, vibratary, zmazki, kaśmietyka… zdavałasia, heta była niejkaja łuchta».

Suviaź i kaardynacyja išła praz Telegram: VWarrior dasyłaŭ śpisy tavaraŭ, jakija treba było nabyć i spakavać. Pa słovach Kiryły, u VWarrior było niekalki akaŭntaŭ z varyjacyjami nazvy — usie z vykarystańniem słova warrior («vajar»).

Bolšaść pasyłak mužčyny pieravozili ŭnutry Polščy i Litvy, ale jak minimum dvojčy atrymlivali zahad adpravić ich praz DHL. Usie raźliki išli kryptavalutaj.

Vybuchi pa ŭsioj Jeŭropie

U lipieni 2024 hoda adbylisia try vybuchi pasyłak — u Birminhiemie (Vialikabrytanija), Lajpcyhu (Hiermanija) i kala Varšavy (Polšča). Usie jany byli adpraŭlenyja praz DHL ź Litvy. Jeŭrapiejskija słužby biaśpieki adrazu zapadozryli, što za incydentami staić rasijskaja raźviedka. Jany adbylisia na fonie šerahu inšych varožych dziejańniaŭ, u tym liku padpałaŭ, kibieratak, kradziažu danych i napadaŭ na padvodnyja kabieli.

Vyrašalnaj akazałasia čaćviortaja pasyłka, adpraŭlenaja ź Vilni inšym členam sietki Biezrukavaha — ukraincam Uładzisłavam Dzierkaŭcom. U adroźnieńnie ad inšych, pasyłka nie ŭzarvałasia na składzie ŭ Varšavie, što dazvoliła śledčym praanalizavać jaje źmieściva.

Pa najaŭnaj infarmacyi vybuchovyja pryłady ŭnutry pasyłak byli abstalavanyja tajmierami, sabranymi z tannaj kitajskaj elektroniki — takoj, jakuju zvyčajna vykarystoŭvajuć u birulkach dla pošuku stračanych rečaŭ. Hetyja tajmiery zapuskali ŭzharańnie ŭ zahadzia zadadzieny čas.

Vonkava pryłady byli zamaskavanyja pad zvyčajnuju kaśmietyku: ciubiki, padobnyja da kremu ci hielu. Nasamreč jany byli napoŭnienyja ŭzharalnym hielem, u składzie jakoha byŭ, u pryvatnaści, nitramietan — chimikat, zdolny mocna ŭzmacniać siłu ahniu abo vybuchu.

The Guardian publikuje fota źmieściva adnoj z pasyłak, jakuju vydańniu pieradaŭ adzin z udzielnikaŭ schiemy. Heta pieršaja vyjava padobnaha rodu, apublikavanaja ŭ presie. Na im bačnyja čatyry masažnyja paduški, niekalki ciubikaŭ z kaśmietykaj i seks-cacki — usio raskładziena na matracy.

Pavialičyć

Pa słovach krynicy, adpraŭku kaardynavaŭ nieviadomy praz akaŭnt VWarrior. Jon taksama praz pasiarednika apłaciŭ usio kryptavalutaj — mienavita tokienami Tether (USDT).

Jak atrymałasia vyśvietlić žurnalistam, u lipieni z kryptakašalka, jaki, pa słovach krynicy, byŭ źviazany z VWarrior, było pieraviedziena $960 jak apłata za dastaŭku.

Aŭtary adznačajuć, što zastajecca niezrazumiełym, jakuju mienavita rolu Biezrukavy i jaho chaŭruśniki adyhrali ŭ troch uzharańniach pasyłak. Adnak usie kurjery, vidać, dziejničali ŭ ramkach adnoj sietki i pieravozili padobnaje źmieściva.

Testavyja pasyłki ŭ ZŠA i Kanadu

Jak paviedamlaje vydańnie, 1 žniŭnia Biezrukavy i Čabanienka na rynku pad Varšavaj kupili dźvie pary krasovak Nike i šeść kamplektaŭ spartyŭnaj formy. Pavodle atrymanaha ŭkazańnia praz VWarrior, rečy byli adpraŭlenyja dźviuma pasyłkami praz DHL u Vašynhton i Atavu.

Polskija śpiecsłužby naściarožylisia: takija pierasyłki byli ekanamična biessensoŭnyja. Jany zapadozryli, što heta była testavaja dastaŭka, kab pravieryć maršruty dla budučych napadaŭ.

Vyšejšyja čynoŭniki ŭ administracyi Bajdena ŭspryniali pahrozu surjozna. Niekalki čałaviek telefanavali rasijskim kaleham i paprasili ich pieradać Pucinu, kab jon spyniŭ apieracyju.

«Ja dumaju, zvanki mieli ŭździejańnie», — zaŭvažyŭ u razmovie z žurnalistami były supracoŭnik słužby biaśpieki.

Aryšty va ŭsioj Jeŭropie

4 žniŭnia palicyja Varšavy aryštavała Čabanienku. Potym byli zatrymanyja Jaŭsiejeŭ (u Ispanii) i Dzierkaviec (u Polščy). Kiryła schavaŭsia za miežami Jeŭropy — na jaho vydadzieny ordar Interpała za «špijanaž i dyviersii terarystyčnaha charaktaru».

Biezrukavy byŭ vyjšaŭšy ŭ kramu, kali pa jaho pryjšła palicyja. Pa słovach jaho žonki Natalli, siabry papiaredzili jaho ab nalocie, i zamiest taho, kab viarnucca dadomu, jon uciok.

Spačatku mužčyna niekalki tydniaŭ chavaŭsia ŭ nievialikich vioskach u Słavakii, potym vyrašyŭ pasprabavać viarnucca ŭ Rasiju, skazaŭšy Natalli, što lepš ryzyknie być aryštavanym na radzimie, čym budzie dalej chavacca ŭ Jeŭropie. Ale pa darozie, užo ŭ Bośnii, na jaho śled napali polskija śpiecsłužby.

U prymiežnym miastečku Basanska-Krupa mužčynu zatrymała baśnijskaja dziaržbiaśpieka. Paźniej, 3 lutaha 2025 hoda jaho ekstradavali ŭ Polšču. Maskva, u svaju čarhu, adrazu zapytała jaho vydaču pa spravie 2019 hoda, što moža śviedčyć ab jaho kaštoŭnaści dla rasijskich uładaŭ.

Pavialičyć

Fryłansiery zamiest aficeraŭ

Zachodnija śpiecsłužby adznačajuć: ciapier štatnyja aficery HRU amal nie vyjazdžajuć za miažu, a najmajuć «fryłansieraŭ» — čaściej za ŭsio, złačyncaŭ ci ludziej va ŭraźlivym stanoviščy, jakich lohka zavierbavać i dystancyjna instruktavać praz Telegram.

Adzin z vysokapastaŭlenych čynoŭnikaŭ, znajomych sa spravaj, zajaviŭ, što Biezrukavy śviadoma supracoŭničaŭ z HRU, ale mnohija ź jaho siabroŭ mahli nie razumieć usioj karciny.

Kiryła raskazaŭ Guardian, što nikoli nie padazravaŭ, što pasyłki mohuć być źviazanyja z pracaj śpiecsłužb. Jon pryznaŭ, što nie moža być poŭnaściu ŭpeŭnieny, što jaho stary siabar Biezrukavy taksama nie viedaŭ pra sapraŭdnaje pryznačeńnie pasyłak.

Mahčyma, jon viedaŭ bolš, čym kazaŭ. Ale navat kali tak, pa słovach surazmoŭcy, jon nie vieryć, što jaho siabar dziejničaŭ ź niejkich ideałahičnych pierakanańniaŭ.

«Ja ŭpeŭnieny, što jon nie rabiŭ hetaha «dziela Radzimy» — jon prosta chacieŭ lohkich hrošaj. Jon usio žyćcio byŭ błatnym», — kaža Kiryła.

Pavodle acenak ekśpiertaŭ, sproby sabatažu z boku Rasii buduć praciahvacca — a značyć, novyja «kurjery» i «suviaznyja» apynucca ŭ toj ža pastcy.

«Znojducca i inšyja, chto zachoča zarabić hrošaj, i niechta skarystajecca hetym», — padsumoŭvaje Kiryła.

• 0
• 0
• 0
• 0
• 0
• 0
• 0
• 0