Nakolki ŭsio kiepska z ekanomikaj Kitaja? Piekin schavaŭ usiu statystyku, jakaja mahła b dać adkaz na hetaje pytańnie

Na toje, što Piekin pierastaŭ publikavać sotni statystyčnych pakazčykaŭ, z-za čaho stanovicca ŭsio ciažej zrazumieć, što adbyvajecca ŭ krainie, źviarnuła ŭvahu vydańnie The Wall Street Journal. U cełym, jak adznačaje vydańnie, kitajskija ŭłady pierastali publikavać sotni statystyčnych pakazčykaŭ, jakija raniej vykarystoŭvalisia daśledčykami i inviestarami.

Sam Piekin abo maŭčyć, abo spasyłajecca na pierahlad mietadałohii. U 2023 hodzie, kali biespracoŭje siarod moładzi dasiahnuła rekordnych 21,3%, urad prosta pierastaŭ publikavać adpaviedny pakazčyk. Paźniej jaho zamianili novaj mietadałohijaj, jakaja vyklučała navučencaŭ — i ličba raptoŭna źniziłasia da 14,9%. Ekanamisty ździŭlenyja: pavodle mižnarodnych standartaŭ, kali navučeniec ci vypusknik šukaje sabie pracu, jon ličycca biespracoŭnym.

Aficyjnyja pakazčyki rostu VUP — stabilnyja 5% na hod — nie vyklikajuć davieru. Niekatoryja daśledčyki miarkujuć, što realny rost u 2024 hodzie skłaŭ usiaho 2—3%. Daśledčaja hrupa Rhodium aceńvaje jaho ŭ 2,4%, Goldman Sachs — u 3,7%.

Dostup da infarmacyi ŭskładnieny nie tolki dla šyrokaj publiki, ale i dla prafiesijanałaŭ. Paśla pryniaćcia zakona ab abaronie danych u 2021 hodzie mnohija płatformy abmiežavali dostup inšaziemcam da statystyki — ad roźničnaha handlu da spadarožnikavych zdymkaŭ.

Kab atrymać bolš praŭdzivuju karcinu ekanamičnaha rostu Kitaja, ekanamisty ŭsio čaściej źviartajucca da alternatyŭnych krynic: analizujuć kasavyja zbory kinateatraŭ, spadarožnikavyja zdymki načnoha aśviatleńnia, sočać za zahruzkaj cemientnych zavodaŭ i spažyvańniem elektraenierhii, a taksama vykarystoŭvajuć danyja pra pieramiaščeńni ludziej z kartahrafičnych servisaŭ, kab acanić dziełavuju aktyŭnaść u realnym časie.

Cenzura jak instrumient kiravańnia

Kantrol nad danymi staŭ častkaj kitajskaj realnaści. Paśla admieny palityki «nulavoha COVID» u kancy 2022 hoda stała niedastupnaj statystyka pra kolkaść kremacyj. Heta asabliva važna na fonie acenak, što ad virusu mahli pamierci ad 1,3 da 2,1 miljona čałaviek. Paralelna ŭłady pačali cenzuravać abmierkavańnie pandemii ŭ sacsietkach.

Danyja, jakija tyčacca rynku nieruchomaści, taksama źnikli. U 2022 hodzie daśledčy centr Beike paviedamiŭ, što ličba kvater u 28 kitajskich haradach, jakija pustujuć, pieravysiŭ pakazčyki ZŠA. Praź niekalki dzion spravazdaču adklikali z vybačeńniami — nibyta z-za pamyłak. Analityki pierakananyja: pryčynaj była palityčnaja cenzura.

Siarod danych, jakija stali niedastupnymi, — zapazyčanaść apierataraŭ płatnych daroh, kolkaść novych inviestaraŭ na fondavaj biržy. Niekatoryja danyja źnikajuć biez tłumačeńniaŭ. Naprykład, pierastali publikavać źviestki pra pamiery prybiralniaŭ u pačatkovych škołach (paźniej viarnulisia). Statystyka pa sojevym sousie źnikła ŭ mai 2021 hoda i dahetul nie adnoŭlenaja.

Navošta ŭsio heta Kitaju?

Kamunistyčnaja partyja Kitaja daŭno razhladaje «ekanamičny rost» jak padmurak svajoj lehitymnaści. Pryznańnie maštabaŭ biespracoŭja, padzieńnia naradžalnaści abo rostu zapazyčanaści — heta pryznańnie słabaści. I napiaredadni abvastreńnia hieapalityčnaha supraćstajańnia z ZŠA Piekin, vidać, vyrašyŭ: lepš niachaj danych nie budzie ŭvohule, čym jany buduć kiepskija.

Adnak zamoŭčvańnie realnaści prablem nie vyrašaje. Heta dobra vidać, naprykład, na fondavaj biržy.

Viasnoj 2024 hoda, kali zamiežnyja inviestary pačali masava vyvodzić srodki z kitajskich aktyvaŭ, biržy Šanchaja i Šeńčženia raptam pierastali publikavać źviestki pra dziejańni zamiežnych udzielnikaŭ. Indeks CSI 300 praciahvaŭ padać čatyry miesiacy zapar — pakul ułady nie paabiacali novy pakiet padtrymki ŭ vieraśni.

Kali pierastajuć publikavacca navat danyja pra kolkaść pradadzienych ziamielnych učastkaŭ abo kolkaść pryščepak ad tubierkulozu dla niemaŭlat, možna havaryć pra sistemnuju začystku infarmacyjnaha pola. Kitaj pieratvaraje statystyku ź instrumienta analizu ŭ instrumient kantrolu. Ale doŭhaterminovaje nastupstva takoj palityki — strata davieru jak z boku zamiežnych inviestaraŭ, tak i z boku ŭłasnaha nasielnictva, jak niekali było ŭ SSSR, dzie taksama chavali ŭsio. Pakul pad ciažaram nazapašanych ekanamičnych prablem nie abrynulisia spačatku adnosny dabrabyt, a paśla i sama sistema.

• 15
• 0
• 9
• 4
• 1
• 1
• 1
• 0