Palicyja polskaha horada Poznań šukaje mužčynu, jaki čaplaŭsia da 13-hadovych dziaŭčynak z Ukrainy i Biełarusi, a paśla nakinuŭsia na adnu ź ich. Incydent adbyŭsia 5 maja kala 17.30 u lasnym masivie ŭ rajonie vulicy Ku Dembinie (Ku Dębinie), piša Most.
Dziaŭčynki (dźvie ź ich rodam z Ukrainy, adna ź Biełarusi) hulali pa lesie i ŭbačyli mužčynu. Pamiž im i dziećmi zaviazałasia słoŭnaja svarka, jakaja zatym pierarasła ŭ bojku z adnoj ź dziaŭčynak.
«Mužčyna ŭciok ź miesca zdareńnia da prybyćcia patrulnych. U vyniku zdareńnia padletki nie atrymali cialesnych paškodžańniaŭ. Paśla kansultacyi z prakuroram my pravodzim mierapryjemstvy ŭ suviazi z parušeńniem asabistaj niedatykalnaści, ale chočam pierakanacca, ci nie było ŭ hetym vypadku ździejśniena złačynstva seksualnaha charaktaru. Tamu ŭ najbližejšy čas, u adpaviednaści ź dziejnymi pracedurami, usie dziaŭčynki buduć dapytanyja ŭ sudzie. Adnačasova my pracujem nad vyśviatleńniem asoby hetaha mužčyny i jaho zatrymańniem», — pryvodzić miascovaje Radio Eska słovy pradstaŭnika vajavodskaj kamiendatury ŭ Poznani Ivony Liščynskaj.
Pres-sakratar akruhovaj prakuratury ŭ Poznani Łukaš Vaŭžyniak paviedamiŭ, što prakuror budzie rasśledavać vypadak «z punktu hledžańnia sproby prymusu paciarpiełaj da inšych dziejańniaŭ seksualnaha charaktaru».
Akaŭnt poznan_moment u sacsietcy X raspaŭsiudziŭ infarmacyju, što mužčynu było za 50 hadoŭ, jon jechaŭ na zialonym rovary, a dziaŭčynku sprabavaŭ dušyć. Jaje siabroŭki vybiehli na vulicu, kab paklikać na dapamohu.
55-hadovy hvałtaŭnik z-pad Hrodna šmat što paśpieŭ za lipień 2024-ha — i padpisać kantrakt z armijaj Rasii, i zahinuć
Mientusava raskazała, što adčuvała paśla taho, jak jaje fejkavyja zdymki zahruzili na pornasajt
Udzielniki vajny z Ukrainaj, jakija viarnulisia z vajny, zabili ŭ Rasii jak minimum 240 čałaviek
Ciapier čytajuć
Z Łondana Mielnikava vylecieła na Šry-Łanku, u jaje byŭ kachanak spartovaha vyhladu ź Biełarusi55
Kamientary