U Ispanii i Partuhalii adnaŭlajuć padaču elektraenierhii i šukajuć pryčynu maštabnaha błekaŭtu

Elektrazabieśpiačeńnie na terytoryi Ispanii paśla błekaŭtu ŭ paniadziełak adnoŭlena prykładna napałovu, zajaviŭ premjer-ministr krainy Piedra Sančes, piša Bi-bi-si.

«Pavodle danych elektrasietak, amal 50% elektrazabieśpiačeńnia ŭžo adnoŭlena. Zadača składajecca ŭ tym, kab praciahvać adnaŭleńnie padačy na praciahu bližejšych hadzin», — skazaŭ jon u telezvarocie, dadaŭšy, što elektraenierhija pastupaje ŭ Ispaniju z Francyi i Maroka.

Premjer nie ŭdakładniŭ, kali padača elektraenierhii budzie poŭnaściu adnoŭlena, i adznačyŭ, što niekatorym rabotnikam daviadziecca zastacca doma ŭ aŭtorak.

Dakładnaja pryčyna maštabnaha adklučeńnia ŭ Ispanii i Partuhalii zastajecca nieviadomaj. Partuhalski premjer Łuiš Manteniehru skazaŭ, što krynica błekaŭtu «vierahodna, znachodzicca ŭ Ispanii», u toj čas jak ispanski premjer Sančes adznačyŭ, što ŭłady zajmajucca pošukam pryčyn. «Usie mahčymyja pryčyny analizujucca, padkreślivaju, nie vyklučajecca ni adna hipoteza, ni adna mahčymaść», — skazaŭ jon.

Adklučeńnie pačałosia niezadoŭha paśla apoŭdnia ŭ paniadziełak i zakranuła harady pa ŭsioj krainie, pry hetym Balearskija i Kanarskija astravy nie paciarpieli.

Partuhalskija ŭłady raniej zajaŭlali, što adklučeńnie mahło być vyklikana redkaj atmaśfiernaj źjavaj, źviazanaj z vahańniami tempieratury.

Ministerstva ŭnutranych spraŭ Ispanii abviaściła nadzvyčajnaje stanovišča i patłumačyła, što takaja miera nieabchodnaja, kab dapamahčy rehijonam, jakija zastalisia biez elektryčnaści.

Na macierykovaj častcy Partuhalii i ŭ Andory taksama źnikła elektraenierhija. Pavodle danych ahienctva Reuters, pa ŭsioj Partuhalii nie pracavali śviatłafory, mietro było zakryta ŭ stalicy Lisabonie i Portu, taksama spyniłasia čyhunačnaje złučiońnie.

U Lisabonie z-za adklučeńnia elektraenierhii nie prymalisia płaciažy pa kartach. Da bankamataŭ byli čerhi. Takaja ž situacyja nazirałasia ŭ Ispanii. Rabota hramadskaha transpartu była parušana, pasažyraŭ evakujavali ź ciahnikoŭ, taksama nie pracavali śviatłafory.

Partuhalskaja enierhietyčnaja kampanija REN (Rede Elétrica Nacional) adrazu paviedamiła, što pieraboi stali vynikam «niaspraŭnaści ŭ ispanskaj elektrasietcy».

«Z-za rezkich vahańniaŭ tempieratury ŭ centralnaj častcy Ispanii ŭźnikli anamalnyja vahańni na linijach zvyšvysokaha napružańnia (400 kV) — źjava, viadomaja jak «inducyravanyja atmaśfiernyja vibracyi»», — adznačaje REN.

Prezident Jeŭrapiejskaj rady Antoniu Košta zajaviŭ, što na dadzieny momant niama nijakich prykmiet taho, što adklučeńnie elektraenierhii było vyklikana kibieratakaj. U Madrydzie mnohija pradpryjemstvy, kramy i restarany apynulisia ŭ ciemry. U mnohich miescach taksama źnik internet.

Pavodle paviedamleńniaŭ miascovych žycharoŭ, u centry ispanskaj stalicy z-za niepracujučych śviatłaforaŭ utvarylisia zatory

Ispanskaja nacyjanalnaja čyhunačnaja kampanija Renfe zajaviła, što ŭ 12:30 pa miascovym časie «ŭsia nacyjanalnaja elektrasietka krainy była adklučana». «Ciahniki spynilisia» i «nie adpraŭlalisia» na ŭsich stancyjach, havorycca ŭ paviedamleńni kampanii.

Mietrapaliten Madryda paviedamiŭ, što jaho rabota «pierapynienaja» z-za adklučeńnia elektraenierhii.

Na štohadovym tenisnym turniry Madrid Open z-za adklučeńnia elektraenierhii pryjšłosia prypynić hulniu. Brytanski tenisist Džejkab Fiernli byŭ vymušany pakinuć kort, paviedamlaje PA media.

Ispanski apieratar elektrasietak Red Electrica paviedamlaje, što pačynaje adnaŭlać elektrazabieśpiačeńnie na poŭnačy i poŭdni krainy.

Adzin z žycharoŭ ispanskaha municypaliteta Val-de-Ušo (za 30 km ad Valensii) raspavioŭ Bi-bi-si, što sihnał jaho mabilnaha telefona nie pracavaŭ kala dvuch hadzin, što, pa jaho słovach, było strašna, bo jon sprabavaŭ atrymać śviežyja naviny pra toje, što adbyvajecca.

Ciapier sihnał adnoŭleny, i jon, jak i inšyja miascovyja žychary, skarystaŭsia tym, što niama elektryčnaści, i pajšoŭ pasiadzieć u kafe za stolikam na vulicy.

Francuzski apieratar enierhasistemy RTE paviedamiŭ, što dapamahaje zabiaśpiečvać elektraenierhijaj ispanskuju sietku.

U RTE zajavili, što ŭžo adnavili padaču 700 MVt dla patrebaŭ Ispanii i pavialičać abjom dapamohi, jak tolki enierhasistema Piryniejskaha paŭvostrava zmoža pryniać bolš.

• 0
• 0
• 0
• 0
• 0
• 0
• 0
• 0