«Nadyšoŭ čas». Kraŭcoŭ zaklikaŭ pasunuć lidarstva Cichanoŭskaj u demsiłach
Sakratar Kaardynacyjnaj rady Ivan Kraŭcoŭ na «Svabodzie» padvioŭ vyniki pieršych słuchańniaŭ z udziełam Śviatłany Cichanoŭskaj. Jon adznačyŭ udały farmat dyjałohu, ale panarakaŭ na prablemy ŭ struktury demakratyčnych sił.
Sakratar Kaardynacyjnaj rady Ivan Kraŭcoŭ ličyć sam farmat udałaj idejaj, bo Cichanoŭskaja, zajaŭlaje jon, «niašmat robić doŭhich vystupaŭ pierad biełarusami, hłyboka pahružanymi ŭ palityčnyja pytańni», a intervju zvyčajna nie dazvalajuć zakranać składanyja temy.
Razam z tym jon adznačaje, pavodle jaho, sistemnuju prablemu: Kaardynacyjnaja rada nie maje realnych ryčahoŭ upłyvu na Abjadnany pierachodny kabiniet abo samu Cichanoŭskuju. «Ad adsutnaści hetaj prymusovaj siły padaje vielmi mocna matyvacyja padrychtoŭki da hetych słuchańnia», — kaža Kraŭcoŭ.
Na jahonuju dumku, bolš šyrokaje pytańnie — budučynia ŭsioj struktury biełaruskich demakratyčnych siłaŭ. Kraŭcoŭ ličyć, što za apošnija hady situacyja istotna źmianiłasia: źjavilisia novyja palityki, adbyvajucca vyzvaleńni palitviaźniaŭ, transfarmujecca hieapalityčny kantekst. Tamu «mahčyma, nadyšoŭ čas, kali demakratyčnyja siły ŭ cełym treba pierafarmatavać».
Jon śćviardžaje, što havorka nie pra źniknieńnie Śviatłany Cichanoŭskaj z palityčnaj sceny: «Jana dakładna nie źniknie, jana samaja viadomaja biełaruska za miažoj».
Adnak, na jahonuju dumku, naśpieła patreba ŭ bolš haryzantalnych strukturach zamiest ciapierašniaj pieravažna viertykalnaj madeli arhanizacyi.
Razvažajučy pra mahčymyja źmieny ŭ struktury demakratyčnych instytutaŭ, Kraŭcoŭ nie vyklučaje refarmavańnia Abjadnanaha pierachodnaha kabinietu. Jon dapuskaje, što zamiest ciapierašniaj «dvuchhałovaj viertykali» ŭ asobie Cichanoŭskaj i Paŭła Łatuški mahła b uźniknuć madel, dzie bolš centralnuju rolu adyhryvała b Kaardynacyjnaja rada — naprykład, z ułasnym prezidyumam i asobnymi palityčnymi kamandami vakoł roznych lidaraŭ.
Miesca Cichanoŭskaj u apazicyjnych strukturach učora na słuchańniach taksama stała pryčynaj chalivaru.
Razvał i likvidacyja apazicyjnych demakratyčnych struktur za miažoju — adno z hałoŭnych žadańniaŭ režymu Alaksandra Łukašenki.
Ciapier čytajuć
Dźmitryj Siemčanka: Ja pryjšoŭ u puł Łukašenki bicca z Rasijaj24
Kamientary