Siońnia ŭ Vatykanie pačynajecca kankłaŭ kardynałaŭ. Budzie abrany novy Papa
Vybary novaha Papy aficyjna pačynajucca 7 maja ŭ Vatykanie. U adpaviednaści z katalickaj tradycyjaj, ličycca, što kardynałaŭ na hety vybar nakiroŭvaje sam Śviaty Duch, piša Bi-bi-si.
Kab harantavać čyściniu i sakralnaść pracesu, kankłaŭ — schod kardynałaŭ — adbyvajecca ŭ poŭnaj izalacyi ad źniešniaha śvietu.
Pakul nie budzie abrany pierajemnik Papy Franciška, 133 kardynały buduć začynieny ŭ Sikstynskaj kapele. Pierad hetym kožny ź ich prysiahaje na Jevanhielli zachoŭvać poŭnuju tajnu pra ŭsio, što adbyvajecca padčas kankłava, da kanca svajho žyćcia.
Hetuju «absalutnuju i viečnuju tajnu» abaviazany vykonvać usie, chto znachodzicca ŭ Vatykanie padčas vybaraŭ: ad dziažurnych daktaroŭ da supracoŭnikaŭ stałovaj. Kab vyklučyć mahčymaść prasłuchoŭvańnia, Sikstynskaja kapeła i dva haściavyja damy praviarajucca na najaŭnaść mikrafonaŭ i padsłuchoŭvajučych pryład.
Dla nadziejnaj izalacyi vykarystoŭvajucca elektronnyja hłušyłki, jakija nie dazvalajuć sihnałam mabilnaj suviazi ci Wi-Fi pranikać unutr abo vonki. Usie ŭdzielniki abaviazanyja zdać elektronnyja pryłady — telefony, płanšety, smart-hadzińniki.
U haściavym domie, dzie pražyvajuć udzielniki kankłava, niama ni televizaraŭ, ni haziet, ni radyjo. Pa słovach monsieńjora Paoła de Nikała, jaki try dziesiacihodździ kiravaŭ Papskim dvarom, navat vokny zabłakavanyja, bo niekatoryja ź ich vychodziać na źniešni śviet.
Usie, chto pracuje na terytoryi Vatykana padčas kankłava, prachodziać uvažlivuju pravierku, ale i im zabaroniena mieć znosiny z vybarščykami.
«Kardynały całkam adrezanyja ad źniešniaha śvietu, — kaža Ines San Marcin z Papskich misijanierskich tavarystvaŭ ZŠA. — Buduć tolki racyi dla asablivych vypadkaŭ, naprykład, kali patrebny doktar abo na vypadak «Hej, papu vybrali, chtości, paviedamicie zvanaram u bazylicy».
Ale što, kali chtości parušyć praviły?
«Isnuje prysiaha, i tyja, chto jaje parušyć, ryzykujuć być adłučanymi ad carkvy, — tłumačyć monsieńjor De Nikoła. — Nichto nie advažvajecca pajści na heta».
Da ranicy sierady ŭsie vybarščyki pavinny ŭžo znachodzicca ŭnutry Vatykana — biez telefonaŭ i całkam izalavanyja ad astatniaha śvietu. Z hetaha momantu, na dumku ekśpierta Džona Alena, asabistyja pieravahi buduć važniejšyja za palityku, prynaležnaść da libieralnych abo kansiervatyŭnych kołaŭ i «šum i huł hramadskich dyskusij».
«Ja sapraŭdy dumaju, što ciapier klučavoje — heta dyskusii pamiž kardynałami. Šmat chto ź ich ciapier vykazaŭsia ŭpieršyniu. I nikoli nie viedaješ, nakolki natchnialnym moža akazacca chtości ź ich».
Ciapier čytajuć
«Siadzieŭ užo 50 sutak, zatrymali jaho dziaŭčynu i brata». Sukamiernik raskazaŭ pra radyjoamatara, aryštavanaha za zdradu dziaržavie4
Kamientary