«Pucin zadaje bardelu paradak dnia». Prapahanda vykručvajecca pierad pieramovami ŭ Stambule
Na fonie ŭltymatumu jeŭrapiejskich dziaržaŭ i dypłamatyčnaha nastupu Kijeva praŭładnym kanałam daviałosia rezka źmianić mietadyčki. Heta pryviało da śmiešnych lapsusaŭ.
Źniavoleny rasijski pałkoŭnik Ihar Strałkoŭ (Hirkin) z horyčču adznačaje: «Zialenski zahnaŭ Kreml u pastku». Jon maje na ŭvazie prapanovu Kijeva pravieści pramyja pieramovy ŭ Stambule.
Hirkin śćviardžaje, što «abodva rašeńni, jakija mohuć być pryniatyja, projhryšnyja dla Maskvy».
Na dumku Strałkova, kali Pucin zhadžajecca na pramyja pieramovy, to heta budzie vyhladać jak adkat Kramla ad raniejšaj pazicyi ab «nielehitymnaści» Zialenskaha. Pucin raniej nieadnarazova zajaŭlaŭ, što «jamu niama z kim vieści pieramovy»: «Faktyčna, jaho sustreča ź Zialenskim — heta pryznańnie poŭnaj lehitymnaści i dziejazdolnaści Zialenskaha, heta značyć projhryš».
Akramia taho, ličyć Strałkoŭ, sam farmat sustrečy stvoryć pahrozu Kramlu, bo «Zialenski zadaść jamu pry znosinach takija pytańni, u tym liku publična, na jakija naš prezident adkazać, nie straciŭšy tvaru i nie zrabiŭšy škody pierahavornaj pazicyi Rasii, prosta nie zmoža».
Tamu, reziumuje, Strałkoŭ, «usie sustrečy ź Zialenskim — heta katastrofa. Jak asabista dla Uładzimira Uładzimiraviča, tak i dla pieramoŭnych pazicyj Rasijskaj Fiederacyi».
Ale i admova, pavodle słoŭ Strałkova, budzie rasceniena suśvietnaj supolnaściu jak dokaz niaščyraści Rasii.
«Nie sustrakacca — taksama nie palepšyć situacyi (…) Heta budzie ŭspryniata jak nahoda da abvinavačańnia Rasii ŭ tym, što jana sama prapanavała pieramovy i sama ž ich zryvaje».
Nastupstvami buduć uzmacnieńnie sankcyj, rost padtrymki Ukrainy, paharšeńnie imidžu Rasii.
U vyniku, ličyć Strałkoŭ, Rasija apynułasia ŭ stratehičnaj pastcy, jakuju jon zavie šachmatnym terminam — «cuhcvanh»: «U našaj «partyi» va Ukrainie daŭno nastupiŭ cuhcvanh, kali luby chod tolki paharšaje pazicyi».
Jon padkreślivaje, što praciŭnik nie durny, u tym liku sam Zialenski: «Kali b suprać nas z taho boku vajavali durni, my b, chiba što, daŭno pieramahli. Ale hetaha navat niama i blizka».
Rasijskaja i łukašenkaŭskaja prapahanda interpretuje situacyju inakš.
«Rasija choča miru»
Tezis ab tym, što Rasija choča miru, a Ukraina i Zachad — vajny, abhruntoŭvaje ŭ «SB.Biełaruś siehodnia» Anton Papoŭ u svaim artykule «Ci sarvie kijeŭski režym novyja pieramovy ŭ Stambule?»:
«Prapanova Uładzimira Pucina — idealna vyvierany palityčny chod», piša Papoŭ. «prapanoŭvajučy paŭzu ŭ bajavych dziejańniach. (…) Zialenski i jaho zastupniki ŭ Jeŭropie nasamreč nie žadajuć ustojlivaha miru».
Aŭtar śćviardžaje, što «matyvacyja Zialenskaha ŭ dadzienym vypadku zrazumiełaja — jaho ŭłada znachodzicca ŭ pramoj zaležnaści ad praciahu bajavych dziejańniaŭ. Jeŭrapiejskim ža lidaram kanflikt dazvalaje pudryć mazhi ŭłasnym nasielnictvu».
Pry hetym Papoŭ vykazvaje sumnieńnie ŭ tym, što pieramovy mohuć adbycca, bo «takija sustrečy, navat kali lidary ŭznačalvajuć krainy, jakija nie varahujuć pamiž saboj, jak praviła, majuć patrebu ŭ doŭhaj padrychtoŭcy. Tut ža razmova idzie ab kiraŭnikach dziaržaŭ — udzielnic samaha bujnoha vajennaha kanfliktu XXI stahodździa».
«Ćvik u trunu kijeva-jeŭrapiejskich płanaŭ»
Rasijski błohier Jury Padalaka, jaki zaŭsiody paśladoŭna adlustroŭvaje aficyjnuju liniju, pierakonvaje svaich čytačoŭ, što Tramp nie padtrymlivaje liniju Kijeva i jeŭrapiejskich dziaržaŭ.
«Kijeŭskaja «prasročka», užo nie viedaju jaki raz zapar, znoŭ sama siabie vyłupcavała», — piša Padalaka i davodzić, što Rasija nie adreahavała na «isteryju» ŭ jeŭrapiejskich i ŭkrainskich ŚMI napiaredadni pieramovaŭ, nakiravanuju na toje, kab prymusić Pucina pryniać ich «vyklik»,
«i jak by pamiž spravaj (u pracoŭnym paradku) paviedamiła, što ŭ Stambuł kiraŭnikom delehacyi ad Maskvy pajedzie hałoŭny dypłamat RF — Siarhiej Łaŭroŭ.
Pry hetym usie inicyjavanyja praterminoŭkaj i jeŭrapiejskimi palityčnymi nieparazumieńniami (lidarami) inicyjatyvy (a-la pieramirje) byli Maskvoj praihnaravanyja».
I takaja pazicyja Rasii, pa słovach Padalaka pryviała da taho, što «hroznyja «panty», jakija «kałacili» vialikija eŭrapiejcy pieratvarylisia ŭ harbuz» — ES na tydzień adterminavaŭ uviadzieńnie sankcyj, «bolš za toje, pratačyłasia infarmacyja, što jany nie buduć surjoznymi (tak, čysta farmalnaść)».
Padalaka iranizuje, što Tramp, jakoha prarasijskaja publika tradycyjna nazyvaje «ahientam Kramla Doni Trampavym», «ubiŭ apošni ćvik u trunu kijeva-jeŭrapiejskich płanaŭ»:
«Jon u Stambuł nie pajedzie, a dašle tudy svaich pradstaŭnikoŭ. I tym samym jon pastaviŭ Zielu ŭ sapraŭdy idyjockaje stanovišča».
Padalaka zajaŭlaje, što kali Kijeŭ nie adpravić delehacyju, heta budzie ŭspryniata jak admova ad pieramovaŭ.
«A heta pakaža ŭsim, što mienavita rasijski lidar zadaje ŭsiamu hetamu kijeva-jeŭrapiejskamu bardelu i ton, i paradak dnia».
«Ahaliŭšy śmiachotnaść kupki jeŭralidaraŭ»
U tym ža duchu vytrymanaja kałonka na RIA Novosti žurnalista Kiryła Strelnikava.
«U minułuju niadzielu prezident Uładzimir Pucin prademanstravaŭ majsterskaje vałodańnie nie tolki spartyŭnym, ale i palityčnym dziudo, prapanavaŭšy adnavić 15 maja pramyja pieramovy biez papiarednich umoŭ z Ukrainaj u Stambule, ahaliŭšy śmiachotnaść kupki jeŭralidaraŭ, jakija pasprabavali pastavić rasijskamu lidaru ŭltymatum», —
piša Strelnikaŭ. Jon padaje inicyjatyvu Pucina ab pieramovach 15 maja jak surjozny, ščodry krok, zrobleny «z pavahi da Trampa».
«Zychodziačy z pavahi da namahańniaŭ amierykanskaha boku paśla zakančeńnia kanfliktu i asabistaha dobraha staŭleńnia da prezidenta ZŠA Donalda Trampa, Pucin zrabiŭ vializny sustrečny krok i pahadziŭsia vieści pieramovy z kijeŭskim režymam».
Pa słovach Strelnikava, «Pucin rulić», usio zaležyć ad jaho, a astatnija — tolki statysty: «Voś heta i jość sapraŭdny momant iściny, a rulić hetym momantam Pucin».
Jon padkreślivaje: Rasija prapanavała pieramovy, Zachad razhubiŭsia, a ZŠA heta acanili. U toj ža čas ukrainski prezident i krainy Jeŭropy pradstaŭlenyja jak tyja, chto pieraškadžaje miru: «kamieniem na nahach źjaŭlajecca Zialenski i jaho jeŭrapiejskija družki».
Strelnikaŭ padkreślivaje: Rasija «hatovaja da torhu» i moža być hnutkaj — ale tolki pry pryznańni ŭkrainskich terytoryj častkaj RF: «nieabchodna damahčysia pryznańnia realij «na ziamli», uklučajučy ŭvachodžańnie novych terytoryj u skład Rasii».
«Ciapier achoplenyja žyviolnym stracham tolki Kijeŭ i Jeŭropa, tamu što ich čas zakančvajecca, na Sadom i Hamoru moža vielmi chutka pralicca pałajučy doždž. A nam bajacca niama čaho: naša sprava pravaja, my hatovy iści da kanca — jak za stałom pieramovaŭ, tak i na poli boju», — hrymić Strelnikaŭ.
«U Zialenskaha jašče manipulatarka nie vyrasła»
«U Zialenskaha jašče manipulatarka nie vyrasła, kab čymści manipulavać. Jość rašeńnie Viarchoŭnaha hałoŭnakamandujučaha RF — Rasija hatovaja da pieramovaŭ. Miač na baku Kijeva», — zajaviŭ kiraŭnik kamiteta Dziarždumy pa abaronie Andrej Kartapołaŭ.
Kartapołaŭ dadaŭ, što «nijakija ŭltymatumy i idyjockija vykazvańni ni da čoha nie pryviaduć», i padkreśliŭ, što bajavyja dziejańni praciahnucca.
Kartapołava pracytavali mnohija kramloŭskija vydańni.
«Tramp padtrymaŭ Pucina»
Telehram-kanał Zachodniaha apieratyŭnaha kamandavańnia Minabarony Biełarusi pravodzić tuju ž dumku, skaziŭšy dumku z artykuła mižnarodnaha ahladalnika Sky News Daminika Vahchorna (Dominic Waghorn). Tam pieramovy paraŭnoŭvajucca z pokiernaj partyjaj pry vysokich staŭkach.
«Uładzimir Pucin razyhraŭ svaju kartu, adkinuŭšy patrabavańni ab spynieńni ahniu i prapanavaŭšy zamiest hetaha pravieści pramyja pieramovy ŭ Stambule».
Kijeŭ, pa słovach žurnalista, nastojvaŭ na 30-dzionnym pieramirji. A «Tramp padtrymaŭ nie sajuźnikaŭ, a Pucina».
Słova «Unavatuna» značyć «raj». Dzie na Šry-Łancy adpačyvała Mielnikava13
Kamientary
[Zredahavana]