Ci moža pasažyr ź vierchniaj palicy ŭ ciahniku prymusić čałavieka ź nižniaj padzialicca miescam? Nie ŭsio tak prosta

U sacyjalnych sietkach usio čaściej uźnikajuć sprečki nakont taho, jak pravilna dzialić miesca na nižniaj palicy ŭ ciahniku. Z adnaho boku, adzin čałaviek zapłaciŭ kankretna za hetaje (bolš zručnaje) miesca. Ź inšaha — pasažyru, jaki maje kvitok na vierchniuju palicu, moža być niazručna ŭsiu darohu jechać pad stollu. Banalna dla taho, kab paśniedać, patrebny stoł.

Pra čarhovy niepryjemny vypadak raskazała ŭ instahramie błohierka z Bresta. Jana zapłaciła 150 rubloŭ za kvitok u płackarcie z Maskvy ŭ svoj horad. Miesca było na nižniaj palicy. Žančyna pryznajecca: jana lubić paspać, tamu płanavała palažać u «łožku» ažno da abiedu.

— A 7-j ranicy mianie razbudziła žančyna ź vierchniaj palicy i skazała, kab ja vyzvaliła joj častku svajoj palicy. Bo jana choča siadzieć, bolš nie choča lažać.

Błohierka była ŭ šoku i admoviłasia vykanać patrabavańnie susiedki. Skončyłasia historyja tym, što žančyna ź vierchniaj palicy sieła na inšaje volnaje miesca źnizu.

Videa ŭžo nabrała bolš za 1,7 miljona prahladaŭ u instahramie, a ŭ kamientaryjach pačałasia aktyŭnaja dyskusija nakont taho, chto z žančyn mieŭ racyju.

Kab adkazać na heta pytańnie, treba aznajomicca z dakumientami. U adpaviednaści z punktam 5.8 Praviłaŭ prajezdu pasažyraŭ biełaruskaj čyhunki spalnymi miescami, jak praviła, karystajucca ŭ načny čas sutak (z 21:00 da 7:00). «Pry zhodzie inšych pasažyraŭ mahčyma vykarystańnie spalnych miescaŭ i ŭ inšy čas».

Jak tłumačyć pravadniki Biełčyhunki, heta aznačaje, što pasažyry majuć prava vykarystoŭvać palicu jak łožak pieravažna ŭ načny čas. Dniom spać (lažać) na svajoj nižniaj palicy možna, kali čałaviek ź vierchniaj nie suprać hetaha.

U rasijskaj čyhunki praviły inšyja.

Ź vieraśnia 2023 hoda tam stroha rehłamientavana, kali čałaviek ź vierchniaj palicy moža siadzieć na nižniaj. Prapisana, što pasažyr ź nižniaj palicy abaviazany dać susiedu źvierchu mahčymaść pajeści za stałom. Hrafik taki: śniadanak z 7.00 da 10.00 (nie bolš za 30 chvilin), abied z 12.00 da 15.00 (nie bolš za hadzinu), viačera z 19.00 da 21.00 (nie bolš za 30 chvilin).

Asobna tłumačycca, što stolik źjaŭlajecca ahulnaj prastoraj, dastupnaj dla ŭsich pasažyraŭ. To-bok luby pasažyr moža pakidać tam, naprykład, svaje napoi. Adnak prablema bakavych miescaŭ zastajecca: tam stolik — heta pa sutnaści častka łožku nižniaha miesca.

Zabarony na toje, kab pasažyr z kvitkom na vierchniuju palicu siadzieŭ na nižniaj u inšy čas niama, ale ž pra heta treba samastojna damaŭlacca z susiedam. Kali nie atrymoŭvajecca, RČ raić źviartacca pa dapamohu ŭ vyrašeńni kanfliktu da pravadnika. Možna navat paprasić źmianić svajo miesca na bolš zručnaje, kali ŭ vahonie jość volnyja, ale za heta treba budzie dapłacić.

Jašče adzin važny niuans. U biełaruskaj čyhunki niama adroźnieńnia ŭ cenach na kvitki na vierchnija i nižnija palicy. U rasijskaj čyhunki situacyja inšaja: kvitki na vierchnija palicy na 20-30% tańniejšyja za nižnija. Imavierna hetym možna tłumačyć pryncypovyja adroźnieńni ŭ palitycy nakont karystańnia nižnimi palicami.

Tamu, kali płanujecie vandroŭku, źviartajcie ŭvahu na toje, ciahnikami jakoj čyhunki vy budziecie jechać. Bo ŭ biełaruskich ciahnikach pracujuć biełaruskija praviły, u rasijskich — rasijskija.

U hety momant ciahniki Biełčyhunki pa zrazumiełych pryčynach nie chodziać va Ukrainu i krainy Jeŭrasajuza, tamu praviły inšych krain nakont karystańnia nižniaj palicaj nie razhladalisia.

• 0
• 0
• 0
• 0
• 0
• 0
• 0
• 0